Il Friûl che anzit

«Che di chel agâr dulà che e cor la aghe che e puarte il nudriment ae cumierie e nassedi la samence pai furlans di doman».
Cun chestis peraulis al à sierât il so intervent pre Duilio Corgnali te dì de presentazion dal so libri “Il Friûl che anzit. L’agâr” li dal salon dal Consei de Provincie di Udin, che e à ancje sostignude la publicazion di chest volum editât di Glesie Furlane.
Cussì si pues dâ un altri significât a chest titul di une opare che e cjape dentri 5 agns di riflessions e pinsîrs publicâts su La Vita Cattolica dal bonsignôr di Tarcint; une rubriche che e cjape dentri argoments di ogni fate, de politiche al sport, dai fats di cronache a notiziis internazionâls. Une schirie di “agârs” che a puartin a une vision globâl de societât moderne no simpri cussì in linie cui insegnaments cristians, ma che anzit, a voltis nus mostre un mont in lote cui principis di fonde di semplicitât e bon sens.
Bons. Duilio però al vûl sotliniâ no dome i aspiets negatîfs dal om e de societât, nol vûl jessi considerât un “pessimist”, ma ben al inten dâ il sugjeriment par pensâ a cuai che a son i valôrs plui impuartants e dulà che al è cussì facil pierdiju.
Al baste lei par esempli de sô lote par rivâ al ricognossiment de leç 482/99, bataie dulà che lui si è metût in prime linie par fâ otignî ai furlans ce che al jere za di lôr dirit costituzionâl; al è impuartant, soredut pai zovins, viodi cemût che cul impegn e la ustinazion si puedin otignî dai risultâts.
Cussì come ancje la bataie par vê la Universitât dal Friûl, come la convinzion di elevâ il furlan a lenghe utile par fevelâ di cualsisedi argoment, e no dome di confinâlu in cjase. Bons. Corgnali di fat al à volût spiegâ ancje cheste sô sielte di scrivi fûr par fûr par furlan, propit par dâ dignitât ae marilenghe, ricuardant cemût che invezit a lui, te scuele cuant che al jere piçul, i vignive impedît di fevelâlu o scrivilu; e al pense cun afiet ai moments di cuant che i siei fradis i domandavin di leiur lis pagjinis par furlan propit de La Vita Cattolica tal clip de stale.
Un struc di storie personâl che e mostre trop che bons. Duilio al à volût a fuart scombati pe nestre identitât. Come predi furlan, al à ancje dimostrade fiducie pe introduzion dal messâl in lenghe furlane, che di cetancj agns al è pront ma in spiete di une aprovazion.
Te zornade de presentazion, ai 28 di Novembar, a jerin in tancj che a àn volût scoltâ lis sôs peraulis e dâ un piçul contribût, come par esempli il professôr Raimondo Strassoldo che dilunc dal so profont intervent al à sotliniât cemût che bons. Duilio si cjapedi a cûr des sortis dai furlans e dal furlan; «al è un plasê» al continue Strassoldo «lei la veretât tai siei “agârs” che a partissin dai fats sucedûts par sedi spiegâts cun riflession».
Peraulis di preseament ancje di bande dal president de Fondazion CRUP Lionello D’Agostini che al à ringraziât pre Duilio Corgnali pal ûs mai cussì scontât dal furlan te sô opare, «une scriture lizere ma mai banâl che nus zove par tornâ a cjapâ vigôr tal savê di sedi furlans».
Venusia Dominici