IL FERÂL. Une mestre inesorabil

O vevi stât ancje jo in companie cun pre Antoni e cui amîs a Milan e mi ricuardi benon la visite in chê glesie di «San Bernardin ai vuès». Al è ben dificil capî il sens di chês parêts sfodradis di vues. A prin colp la vision e je impressionante: une montagne di vues umans ben metûts in ordin a mût di decorazions! E pûr la muart e je e e reste une realtât, ancje se, umanamentri, no masse golose. San Francesc al è rivât a clamâle adiriture «sûr». Sapience e insegne che al è plui savi pensâ a la muart che platâ la cuestion: e sarès dome ilusion, parcè che il probleme al reste. Se si rivàs a pensâ cun serenitât, e fasarès di sigûr mancul pôre. Frecuentâ il cimitieri al pò deventâ une grande scuele.
(pre Roman Michelot)
Amîs cjârs e brâfs nus àn invidâts, ospitâts, compagnâts par Milan e cussì intun pâr di dîs o vin podût passi il voli e l’anime cun tantis bielecis: Brera cui siei cuadris, sant Ambrôs cu la sô storie, il Domo cul so ricam di miârs di statuis, san Laurinç cui siei misteris. Po nus àn mostrât la Ca’ Granda, la cjase de culture universitarie, là che si fevele tant e di dut e salacor ancje masse, e, tacade, un’altre scuele, cuntune mestre ben plui severe, che no dîs nancje une peraule.
O feveli de glesie di san Bernardin “alle ossa”.
In cheste glesie e je une capele e in cheste capele, tal mieç, al è un altâr cu la Madone che e cjale il Crist muart. Tes parêts torator no ’nd è ni altârs ni statuis, ma grancj ricuadris cun dentri intassâts miârs di vues e di crepis. Par denant e je une rêt, che ur impedìs di colâ jù. Lis crepis a son disponudis a dôs a dôs a forme di une grande crôs. Adalt, parsore dai curnisons, e je dute une rie di crepis e ancje lis decorazions a son fatis alternant crepis e vues des gjambis e dai braçs. Chês cassis di vôi cence lûs che mi cjalavin, chês bocjis çondaris che mi berlavin cence sun e la mestre che mi mostrave ce che al è il vivi e il finî dal om. Diu, ce scuele, e ce scuelârs e ce mestre!
Par prin mi è vignût tal cjâf il toc di Ezechiel 37, 1-14, cu la domande-sfide: «Puedino tornâ a vivi chescj vues?». La reson e pent pal no; se si à voe di vê une spere di lûs tocje bati il troi stret e scûr de fede, contentantsi de lûs di un feralut in plene gnot.
Po mi soi fate une domande banâl: «Chestis personis, oms e feminis, che a àn vivût in chest cuarp, cumò ce vite ano, dulà sono, cemût sono?». La Bibie nus dîs che «lis animis dai juscj a son tes mans di Diu» (Sap 3, 1) e che, a la fin, dopo dal grant judizi, i triscj «si ’nt laran tun cjastic eterni, i juscj invezit te vite eterne» (Mt 25, 46). Ma cumò?
Po o ai pensât a la justizie e a la crudeltât de muart, l’uniche che no cjale propit in muse nissun. Di cheste “classe” particolâr, cui rivial a disserni il destin che ogni scuelâr al à vût biel che al jere in figure? Di fat no si savarès cui che al è stât siôr e cui puar, cui sant e cui brigant, cui cleric e cui laic, cui paron e cui sotan, cui in benedizion e cui in maludizion. Parcè che la muart e je nivelament e ogni nivelament al à parintât cu la muart. Tignìnlu a ments ogni dì, in cheste nestre societât che nus nivele, nus scompon, nus cope l’anime e nus fâs cerçâ la muart biel che o sin ancjemò in vite. Di fat il simbul classic de muart al è il falcet, che no si lasse fâ dûl de bielece provocant dal garoful ni de umiltât consolant de viole.
Ce che invezit no rivavi a acetâ al jere il fat che chei vues che mi cjalavin cence viodimi a jerin stâts personis veris come me, cu lis lôr pôris e passions e misteris e miseriis. E che ancje jo o varai di ridusimi cussì. Come se jo, l’unic, no ves di fâ la fin di ducj.
Di frut o passavi par Ospedalet e mi fermavi dongje di une maine là che e jere sculpide une crepe di muart cu la scrite: «O tu che guardi in sù, io fui come sei tu; tu sarai come son io. Pensa a questo e va con Dio». Invezit di deventâ seri e pinsirôs, o montavi in biciclete come un archet e mi inviavi sivilant viers la vite. Anzit viers la muart. O eterne, imperdonabil infantilitât, che nancje la uniche robe serie e che nus met a puest no rive a fânus deventâ seris e cul cjâf in sest! ❚
Antoni Beline, Cirint lis olmis di Diu, vol. 4 p. 13