IL FERÂL. S. Simon: a cuant un premi pe zurie?

O sin te stagjon di premis leteraris, juriis al lavôr par sielzi i miôrs scrits. Cui sa se i adets a valutâ il merit des oparis a son miôr dai scritôrs concorints. Cualchi an indaûr la jurie si jere lamentade disint che i tescj a jerin puars par contignût e forme leterarie pôc furlane.
A lei cheste piçade di pre Antoni al pararès che nancje i judiçs no jerin miôr dai judicâts, e che la lôr maniere di scrivi par furlan e jere une vore sclagne. Puedial il mestri jessi piês dal arlêf? Ma al dì di vuê o crodìn che lis robis a sedin gambiadis, in miôr. O no?
Lis peraulis in corsîf lis veve metudis pre Antoni tal origjinâl.
pre Roman Michelotti
***
S. Simon: a cuant un premi pe zurie?
O ài cjapât in man il libri di Gianni Gregoricchio «Îr e doman», che al à vinçût il premi di San Simon dal an passât. Une vore lungje, impegnative e ancje, di ce ch’o ài rivât a lumâ, scrite ben. Dome che mi à copât la relazion de zurie, metude juste a prin intro. No parcè che e dîs ben dal libri (mancjarès!), ma pal mût di scrivi. O crôt che, di mont in ca, no sedi stade componude une pagjine cussì fenomenâl, degne di jentrâ adimplen tai gnûfs libris de gnove scuele par furlan. Sintit dome ce robonis:
«Il romanç ecelent di Gianni Gregoricchio al presupon un grant impegn e une lungje vore di composizion. Cun dut ch’al imbraci une lungje dade di timp, nol à mai coladis stilistichis… Il larc senari uman, ben ricognossibil, al è chel di un paîs dal Friûl di mieç… In chest fonz (?) si insede e si distache la liende di une vore di personis, ma soredut ch’e (e la gramatiche?!) dal protagonist. Il madressiment dal so caratar… La conte si davuelç cence pierdi mai il so ritmi e la sô sostance. La lenghe e je avonde rigorose, nobil e essenzial.
Lis formis masse dialetâls a vegnin evitadis. Il romanç al è imbombât di une atmosfere ricje di estrose umanitât e di une cjarie poetiche positive, che no concêt nuie al sentimentalisim e a la retoriche».
Chi un dôs osservazions a conventin.
Prime: cemût fasie a dâ un judizi su la bontât di une opare int cussì analfabete?
Seconde: une zurie taliane che e ves butât jù un judizi cussì imbastardât di furlan e malsestât, no si saressie smierdade par simpri? E cui varessial olsât di clamâle ancjemò a Codroip o in altrò?
Il consei plui imbrucjât, par chel che al compre il libri, al è di sbregâ daûrman la prime pagjine, par no ingomeâsi prin di tacâ.
Pe cronache, te zurie a jerin Ottorino Massa, Andreina Ciceri Nicoloso, Giorgio Faggin, Giovanni Frau e Alan Brusini. No si sa cui che al è stât l’autôr materiâl de traduzion par furlan, ma in chescj câs o che si è solidaris tal gjavâsi o che si à di jessi solidaris tal cjapâ lis colpis.
La Patrie dal Friûl, n 8-9,
Avost-Setembar 1985 ❚
pre Antoni Beline