IL FERÂL. Paîs e citât

Cence volê lâ a scomodâ Esopo che al jere de idee che campagne o citât no jerin la stesse robe nancje pes surîs, o scugnìn ameti però che, te storie dal om, si à simpri vude cheste rivalitât che no je dome di bêçs o di comoditâts o di luianiis che no tegnin il pont. La sielte jenfri campagne e citât e je, in font, une sielte di civiltât.
La citât e je nassude e cressude cul nassi e cressi de industrie. La int dal borc, che te ete di mieç e veve lis sôs buteghis sot dal cjiscjel dal cont o te contradis aventi un ciert pont i à parût di stralozâ, di lâ tal larc, là che e podeve sfloregjâ cun plui libertât. E je nassude la borghesie, la siorie e la mafie citadine cun dut il ben e il mâl che chest al compuarte. E stant che la culumie tancj viaçs e fâs di parone ancje te crepe e no dome te panze, si à tacât a viodi dut in funzion de citât, deventade il sflandôr de regjon, il sium plui grant di ogni puar ledanâr, la brame di ducj chei che a volevin deventâ alc. E si à finît par fâ crodi che la citât e jere vite e il paîs muart; di une bande dome lusôrs; e di chê altre dome pecjis.
La diviersitât fra campagne e citât e à cjapât pît ancje pe fuaree diferent che al veve il contadin e il citadin tal produsi la sô opare. Lis fabrichis a van indenant cu la teniche, che e je sogjete a la matematiche e a la fisiche e a dutis lis siencis «esatis». La campagne, cuant che si à voltât e semenât e coltât, pò stâi ancje che nol nassi nuie, se il timp o la stagjon no son conforme. Di lì al è facil che al nassi un sens di sfide tal citadin, che al è lui paron espotic di ce che al prodûs, a la cuâl che chel di paîs al è simpri in forsi, stant che no dut al dipent di lui. Chest a nivel psicologjic.
Però o vin di dî, par dovê di cussience, che un cert mût di fâ politiche al à simpri cirût di judâ la citât a cressi magari a sproposit e no i à dade une man al paîs, che al è lât calant parcè che no si viodeve mieç di sortide: o sclâf dal paron o di chel altri Paron.
Parcè la pulitiche àe simpri privilegjât la citât a scapit de campagne? Salacor par une inicuitât che nancje lôr no àn il coragjo di ametile. L’om di paîs al à un orloi che al va planc e prime di gambiâ al pense e al torne a pensâ fintremai che i va vie ancje la sium. L’om di citât, al contrâr, no vint nuie fûr dal so lavôr e des sôs mans, al à dut interès a gambiâ cu la sperance che al gambii in miei. Al è plui puartât a gambiâ ma al à ancje mancul fermece di ideis. Che di fat in citât baste une plere e la int ti cor daprûf, robis che no sucedin tai paîs.
Al è clâr che, come che a son metudis lis robis cumò, no si pò butâ jù la citât e tornâ ducj in campagne. Però si à di cirî une politiche e une culture che ti fasin capî che a coventin chê e chê. Campagne e citât a son peadis e a podin sgambiâsi ognune i siei valôrs. La citât e à lis sôs ativitâts «terziariis»; la campagne e à chês altris dôs, lis primariis e lis secondariis, se o volìn lâ indenant cu la logjiche. Citât baste une, tun puest a puart e che e funzioni; paîs plui a ‘nd è miôr al è. Parcè che se in citât si à la brume de «culture», in campagne si à il lat de culture, che cence di chel no ven fûr la brume.
Cu la politiche bastarde di cumò, invezit, a àn fat in mût che dut al vedi di disgotâsi te citât e ancje chei de campagne a àn di imparâ i vizis e cjapâ sù lis disgraciis di chei che a àn vude la brute idee di lassâsi inceâ dai neons e dai sunsûrs di une vite mate e discjadenade. Bisugnarès che un Stât san al judàs la int a restâ in campagne, cun dutis lis comoditâts di lâ in citât par un sanscugnî. Che a ‘nd è pôcs, a jessi sancîrs. Nol è dit che une Universitât e scuegni jessi par fuarce in citât o une scuele miezane tal centri plui impuartant. Il Manjon, che nol jere propit tant stupit, al diseve, par esempli, che lis scuelis pai mestris a vevin di fâlis dutis in campagne, di mût che chei che a studiavin sui libris a vessin·la pussibilitât ancje di studiâ il grant libri che al è tor di nô.
Tant a dî che la tiere e je dut.
No stait a vignî fûr che chei di citât a son plui indenant di chei di paîs. In ce? Parcè che a àn plui machignis, o plui sunsûrs o l’ultin cine o il semafar? La civiltât e varès di jessi prin di dut progrès, e progrès al vûl dî lâ indenant. Ma lâ indenant di oms, no di mats o di disperâts. Par chel o disìn che si trate di civiltât. E si à di vê il coragjo, cuant che si fevele di certis robis, di spiegâ ancje il metri che si dopre. Se a mancjin i ponts di orientament si pò lâ indenant, indaûr, di ca, di là, e ancje lâ vie di cjâf. Come che al sucêt in chestis citâts fatis sù par copâ la culture e 1’om, impen di servî la culture e l’om.
Cualchi volte al ven di scrupulâ che a vedin volût a pueste fisca la vite di paîs e la campagne e lis pioris par che ju oms a deventassin ducj pioris sot de bachete di un lazaron, che al pò sei une persone o un partît o une ideologjie o un Stât.
Chi di nô, in Friûl, o vin ancjemò la furtune di vê une vite paesane e une citât che no je propit tant ingjaulade di fânus svariâ. Cirìn mo di no vê il complès dai stupits: di lamentâsi parcè che Udin nol à dutis lis perlis di un Milan o un Turin o une Rome o un Napoli. E stin atents, che lôr, tratant di sassinâ une int par dopo doprâle, a saressin bogns ancje di dînus che o sin indaûr e che o pucìn di medioevo e di ledan. Simpri miei puçâ di vîfs che no puçâ te casse, come là jù, che si stan copant in non dal progrès!
PRE ANTONI BELINE
La Patrie dal Friûl n. 7-8 Lui – Avost dal 1980