IL FERÂL. La tribù dai furlans

La emigrazion, pai furlans e je stade simpri un probleme. No par nuie i furlans pal mont a son 3-4 voltis tant dai furlans in Friûl. In cheste stagjon di Istât, tal timp des feriis, un pôcs di emigrants a aprofitin par tornâ culì, tai lôr paîs e di plui bandis si organizin fiestis e moments di riflession. Ta cheste rubriche o proponìn, su chest cont, une clâf di leture fate, za cualchi an indaûr, di pre Antoni.
pre Roman Michelotti
Il mont de emigrazion furlane al è in grant ferment di ideis e di programs, par podê stâ daûr te maniere plui positive a cheste acelerazion che e cjape dentri ducj e dut e no sparagne plui nissun. Pal Istât che al ven, il «Friuli nel mondo» al sta inmaneant la prime «Convention de furlanetât tal mont» e par in chê volte i dirigjents di Borc dal sâl a varessin intenzion di aprovâ cun largje partecipazion democratiche il gnûf statût, un imprest fondamentâl ancje se no suficient par frontâ lis tematichis urgjentis e emergjentis de diaspore furlane.
Che l’ent primarûl al sedi stagjonât e un pêl inrusinît nol è un misteri e nol è un scandul. Te stesse situazion a son dutis lis istituzions nassudis tun contest completementri diferent e che si cjatin a sunâ une musiche stonade come timp e come notis. Come timp parcè che i prins distinataris no son plui e i ultins no ur interesse. Come notis parcè che, culì come par dut, al vâl l’invît incorât e inteligjent dal salm 96 «Cjantait al Signôr une cjante gnove» o, se o preferîs, «Cjantait al Signôr alc di gnûf». E dome Diu sa trope dibisugne che o vin di musiche cree! Pardut.
Cuant che o pensi al «Friuli nel mondo», cun dut il rispiet par tante int che e à crodût e scombatût e spindût e paiât di persone par une cause che le ritignive sante, plui che a une plante cressude tun biel prât o tun ronc, o pensi a chê flore che e nas e e cres sot dai arbui, framieç dal patùs, cjapant e supant de vitalitât dai fradis plui grancj e vivint di une vite di eterne dipendence. Come un parint puar che al spere di cjapâ alc dal parint siôr e par chest al scuen vivi in perpetue penombre e sotanance. Là che l’arbul grant, o il bosc, al è, come che ducj sa, chel de Democrazie Cristiane. O sin in chel contest, in chê culture, in chei valôrs e disvalôrs. No dîs une plante parassitarie, ma sigurementri no autonome e duncje sotane, ricatabil e doprabil. Come la Filologjiche e altris ents plui o mancul benemerits. Ents là che si sistemave cualchi amì colât in disgracie e là che la paronance vere i tocjave simpri a un esponent dal partît. Il fat che al sedi ancjemò l’on. Toros, ancje se president emerit, le dîs lungje su la gjerontocrazie che e à regnât li dentri. Toros al è chel che, dal 1967, al à ricatât il vescul Zaffonato e fat lâ in vacje la mozion firmade di 529 predis. Une mozion che, par cumbinazion, e veve tal prin dai cinc ponts propit il mont de migrazion: «fâ un progjet par tornâ a assorbî in timps curts la diaspore migratorie che e sta copant soredut i paîs di mont». Se cheste e je politiche pe migrazion, mi fâs frari.
Mi visi che une volte, fevelant cuntun diretôr dal Ent, metût li dopo di jessi stât silurât de presidence di une comunitât, mi è sbrissât di dîi: «Voaltris o sês metûts par fâ stâ i furlans pal mont, parcè che, se a tornin dongje, o restais cence pagnut». Mi à incenerît di ofesis ma no mi à dât tuart.
O torni su la lidrîs di chescj ents par meti in lûs la lôr limitatece di fonde: jessi plui la vôs dal paron che dal sotan, sunâ la musiche dal alt plui che chê dal bas, cirî di fâ presint lis resons di chel che al sta in alt e nol pues o nol vûl fâ plui che lis resons e lis protestis di chel che al sta in bas e al spiete justizie. Chescj ents a son partîts cun chê di no fâ politiche. Ma si puedial no fâ politiche? Ce sens aie une culture o une assistence cence politiche? No deventie alienazion e droghe? Se un mi dîs di no fâ militance partitiche, i doi reson, ma se un mi dîs che nol fâs politiche, i rispuint che al fasarà simpri la politiche dal paron, che lu paie e lu ricate. O sai, lu ripet, che li dentri e à lavorât tante int e int buine, però i risultâts a son stâts sclagns. Parcè che si à plui fat vaî che resonâ, si à plui cjalât al passât pierdût che al avignî di fâ su, si à plui batût sul folclôr che su la cussience de identitât, sui dirits dai furlans di tornâ dongje, su la precedence tai puescj di vore, su la promozion di une gnove classe politiche, imprenditoriâl, culturâl. Plui che un cjant di resurezion, al è stât viodût e vivût come un cjant di corot. Un «deprofundis», cun dut rispiet par un salm cussì straordenari. Juste e induvinade la reazion di pre Checo Placerean, cu la sô «fieste dal popul furlan stranfât pal mont» di Einsiedeln, là che ogni an al faseve un sorte di discors de corone, cun dutis lis cuistions plui vivis e crudis dal Friûl. Une iniziative disertade e criticade dal Ent iuficiâl.
Oltri che la dipendence dal paron, prin difiet di fabriche, un secont difiet di chescj ents e je la presunzion di vê la esclusive de culture, de emigrazion e vie. Cui lu aial dit? Cui le aie dade? Il popul furlan, tes sôs espressions e situazions, nol è di chel ent o di chel altri, ma al è di ducj. Di chei in cjase e di chei pal mont, che a fasin part a plen dirit de tribù dai furlans. In câs al è l’ent pe emigrazion e no la emigrazion pal ent. E chi o sin jentrâts tal cûr de cuistion. Nol è possibil fevelâ di Friûl, a nissun nivel, cence tignî cont e fâ i conts cul mont de diaspore. Al esist un popul, l’ebraic, che al à vivût par doimil agns cence une tiere, une patrie, un classe dirigjent, un templi e adiriture une lenghe. Ma al veve la cussience di partignî al popul de aleance e chest al bastave par vierzi lis puartis a ducj i fradis dal mont. La politiche dai e pai emigrants, o miei, cui emigrants e à di rifâsi a chest model. Creâ cussience, tiessi rêts, fâ cognossi a lis gnovis gjenerazions la nestre realtât in moviment e no dome il passât, e fâ cognossi ai furlans, ducj, ce che di biel e di bon al è stât e al ven produsût dai lôr fradis pal mont. Colegâsi cu lis impresis, sgambiâsi tecnologjis, privilegjâ la domande e la ufierte, vierza une sorte di «Commonwealth» in piçul. E chest al è possibil vuê plui di simpri, cu lis potenzialitâts tecnichis e comunicativis e la globalizazion. In chest colegament sistematic a àn di cjatâ il lôr puest la lenghe e la culture di partence e chês di adozion, in mût che la vecje plante e cjapi linfe de gnove e la gnove si rinfuartissi te cussience de identitât.
A ben cjalâ, si pues dî, cence nissune ofese, che la politiche vere de emigrazion come fat sistematic e ordenari e à ancjemò di scomençâ. Une buine ocasion par doprâ dute la inteligjence, la creativitât, la sgrimie, la fantasie, il cjâf, il cûr e l’inzegn. Dut chest in grande umiltât, disponibilitât e cence monopòlis, parcè che il mont de diaspore al è di ducj e cence diaspore nol è nancje Friûl.
PRE ANTONI BELINE