CULTURE – ART-Â. Friûl e furlans par imagjins

Cent fotografiis che a fevelin de femine. Di cuant che e leve a marcjât tai agns Cincuante, cence lassâ in bande il lavôr tai cjamps, fin in dì di vuê, clamade a cumbinâ famee, lavôr e interès personâi, passant pal boom economic e la rivoluzion dal feminisim, procès che i àn permetût di concuistâ spazis di autonomie e di slargjâ la sfere dai siei dirits, mudant, di fat, lis dinamichis des relazions tra oms e feminis. Sessante agns di storie dal Friûl, viodude de bande dai cambiaments de condizion feminîl, a son documentâts intune mostre fotografiche a vile Ciani a Lestans te suaze di «Spilimbergo Fotografia 2010», ancje a traviers i diferents mûts di rapresentâ la femine. La mostre «La femine te fotografie in Friûl, 1950-2010», par cure dal Centri di ricercje e archiviazion de fotografie di Lestans, e je vierte fin ai 3 di Otubar dal miercus al vinars des 4 daspomisdì aes 8 sot sere; la sabide e la domenie des 10 e mieze di matine a misdì e mieç e, tal dopomisdì, des 4 fin 8. La jentrade e je libare.
Andrea Paolella, zovin fotograf emilian, di mistîr al fâs il ricercjadôr in chimiche, ma tal cûr al cove la passion di fermâ in blanc e neri imagjinis necessariis di veretât sociâl e gjeografiche. Necessariis tant che i 70 scats, selezionâts di un grum di istantaniis su lis olmis di Pier Paolo Pasolini, in mostre, fin ai 30 di Zenâr dal 2011, a Cjasarse. Par cuatri agns, Paolella al è lât a cirî cjasis, placis, stradis, paisaçs che il poete al ricuardà tai siei scrits e tes letaris ai amîs. Un viaç par imagjins tai lûcs che lu ispirarin – di Bologne a Cjasarse e dulintor, fin a Rome – e a traviers dai siei amîs di zoventût – di Nico Naldini a Giuseppe Zigaina – che, prime di chei romans, a ‘nt spartirin lis esperiencis poetichis e lis bataiis leteraris. La mostre «I lûcs di Pasolini», si podarà visitâ tal Centri studis «Pier Paolo Pasolini» dal lunis al vinars des 3 aes 6 dopomisdì, la sabide des 3 aes 7 dopomisdì e la domenie des 10 e mieze di matine a misdì e mieç e, tal dopomisdì, des 3 fin 8. La jentrade e je libare.
Altris lûcs a son chei che si puedin viodi fin ai 29 di Avost tal Museu de art dal fari e des curtissariis a Manià, te suaze di «Spilimbergo Fotografia 2010». La mostre «Silvio Maria Bujatti e i mestris dal paisaç furlan» (vierte ducj i dîs, fale che il martars e il miercus dopomisdì, des 9 e mieze di matine a misdì e mieç e des 3 e mieze aes 6 e mieze sot sere; jentrade libare) e je une antologjie di fotografiis origjinâls de colezion di Carlo Innocenti e di altris acuisidis dal Craf, li che Bujatti, cognossût tant che «mago dal flou», Attilio Brisighelli e Carlo Pignat a documentin il teritori furlan de prime metât dal Nûfcent.
Erika Adami