CULTURE – CUSINE. Lidia Bastianich

Par milions di feminis di cjase tai Stâts Unîts e in Australie, cheste siore bionde e ligriose e je la  muse dal mangjâ talian: presentadore di une fortunade trasmission televisive che e insegne a fâ di mangjâ e e spieghe i nestris prodots, autore di best sellers (plui di un milion di copiis vendudis ator pal mont), proprietarie di une ventine di nomenâts ristorants ae mode (massime te «stilose» New York) e coghe «star» clamade a fâ di gustâ par cenis di «vip» internazionâi (ancje par Pape Ratzinger, concuistât cun plats sempliçs de tradizion mitteleuropeane, come craut e strudel).
Un vêr e propit imperi, chel che e à savût meti adun la siore Bastianich, di cualchi an judade ancje dal fi Joseph intune vere e proprie holding internazionâl (lui, in particolâr, al à la sô base operative a Galian di Cividât, dulà che al cure une vigne di 32 etars, votade a produsi vin di ecelence di proponi tai ristorants di famee).
Un imperi nassût e tirât sù dut su la passion, su la voie e sul snait di savêsi meti in zûc, simpri cuntun voli zirât viers la sô tiere mari, il Friûl e la Istrie.
Nassude a Pola tal ’47, la siore Lidia e à vivut il drame di jessi une piçule profughe, prime tal cjamp di smistament prontât dulà che e jere la orende Risiere di San Sabba, e dopo emigrade cu la famee in Americhe, par cirî di tornâ a fâsi une vite.
E tal gnûf continent, la zovine Lidia e à savût incjarnâ un esempli vivent dal «American Dream»: un miscliç de proprie origjinalitât culturâl e de filosofie americane de impreditorialitât, vâl a dî il partî di une idee par fâle deventâ un lavôr, e fintremai une grande oportunitât di «business».
La grande fuarce di siore Lidia, di là de sô volontât ben plantade e dal so talent evident tant che divulgadore, e je forsit stade il fat di jessi cressude in Americhe, tal sens che e cognòs ben il so «target». E sa ben, par esperience direte, che i Americans a son abitudinaris, leâts ai lôr «hot dogs» al «barbeque», ma che a àn ancje une grande fam di culture e di storie. Cun cheste consapevolece, e à capît che jessi une di plui a «contâ ricetis» no jere la vie, ma che invezit dedicâsi a spiegâ prime di dut lis carateristichis des materiis primis, la lôr storie, la lôr origjin gjeografiche, al podeve jessi chel di plui che al coventave par sfondâ sul marcjât. E il marcjât i à dât reson…
Di sigûr, considerant la culture medie dai Americans, dificil proponisi tant che «Friulan Food», e la siore Lidia e à capît ben la necessitât di presentâsi plui in gjenerâl tant che «Italian food». Dut câs, ancje se e à slargjât il discors a un panorame plui peninsulâr, tal so cûr e je simpri ben presint la  cusine de sô «patrie», i plats de tradizion mitteleuropeane li che si base la cusine furlane. Tant di podê rilevâ cemût che, in dì di vuê, la regjon F-VJ e je daûr plan a planc a cjatâ riscuintri tant che identitât autonome tal panorame dal mangjâ talian – «Il Friûl al è tra lis regjons plui preseadis, si poste al cuart/cuint puest», e à vût mût di dî intune interviste al gjornâl de Confidustrie di Udin (Avrîl dal 2010, interviste a firme di Paola Del Degan).
E par cheste afermazion di autonomie dal F-VJ sul plan culinari, dal sigûr la siore Bastianich e à contribuît un biel pôc, metint tai siei menûs plats de nestre tradizion (jote, goulash, frico, broade, polente, jerbis di cjamp e, massime, il nestri vin), fasintju deventâ di fat plats di mode.
Si pues cussì dî che la siore Lidia si è concuistade la nomee di ambassadore dal mangjâ talian. Une ambassadore che e à, dut câs, une passion particolâr pai «nestris» prodots. Une robe che si à di jessi plui che braurôs…
Par savê di plui: www.lidiasitaly.com
Margherita Timeus