Sfuei Mensîl Furlan Indipendent
Archivi de Patrie

La conversion in Cjargne

pre Toni Beline

Predi in Cjargne e conversion dal popul in non dal vanzeli: pre Antoni al da merit de sô rinassite interiôr graciis ae figure di Pre Checo, al grup di amîs di Glesie Furlane. Ancje lis pagjinis plui bielis dal vanzeli se no si messedin cu la vite concrete de int, a restin peraule astrate, lontane, che no tocje il cûr de int. (pre Roman Michelot)

E je stade dure, a son stâts moments, sore dut par resons di salût e di dificoltâts pastorâls e incomprensions, che le ai zuiade dute, ma chel predi che si rimpinave pai prâts e pes monts de Cjargne, che al jentrave tes cjasis dai cjargnei cun grande confidence e libertât, che al invidave la sô int a no vê pôre, a sielzi simpri la libertât e la dignitât e a paiâ dut il presit che al coventave, nol jere plui chel che al leve daûr dai principis filosofics e teologjics imparâts in seminari e nancje il capelan zelant e indurmidît di Codroip, ma un om che al resonave cul so cjâf, al diseve ce che al pensave, al frontave cui predis discussions di teologjie e di Scriture e al voleve o si iludeve, cun grande ingjenuitât, di ribaltâ la glesie.

Nol covente zontâ che mi à judât un grum, in cheste rigjenerazion, la figure di pre Checo, che si cjatavisi ogni an a fâ la Sense a S. Pieri di Cjargne e ancje il grup di Glesie Furlane che si stave dant dongje in chei agns. Come che mi à zovât in ogni sens la scuele. Tant la scuele di religjon al Stringher di Tumieç, che mi permeteve di vivi a contat cun tante zoventût imbombade di ideis libertariis targadis ’68 ,che la scuele artesanâl fate ogni dì in canoniche pai fruts che no vevin mût di frecuentâ la scuele medie di Darte e, soredut, la scuele elementâr publiche di Treli. Mi à permetût di coltâ sistematichementri il gno cjâf cun libris di ogni ordin e grât (o soi simpri stât un letôr disordenât e passionât di libris, che a son la uniche robe che mi permet di comprâ cence culumie), di imparâ a meti jù lis ideis cun ordin e clarece, par jessi capît de canaie, e, last but not least, di cjapâmi une palanche che mi sigurave la indipendence economiche. E ancje chi o scuen vêi a grât a pre Checo che mi tontonave salt: “Se tu vuelis berghelâ cuintri i superiôrs, tu âs di sigurâti la pignate a misdì! Se no ti cjaparan par fam”.

Nol è che il timp de Cjargne, i cutuardis agns passâts ventisù, a sedin stâts une spassizade a sun di musiche framieç dai garofui. A son stâts agns impegnâts e tormentâts. Sul imprin, mi pareve di jessi il rapresentant esclusîf di Jesù Crist e di vê la privative dal Spirt. Mi someave che se no metevi la lenghe, se no corezevi, se no mi intrometevi, se no fasevi sintî la mê vision religjose, la mê “veretât”, o tradivi la mê mission di pastôr. E al sucedeve cu la int come che al sucêt cuant che si tire la cuarde. Un al tire di une bande e un al tire di chê altre e, dal moment che nissun nol à voie di pierdi, ognidun al tire plui di chel che al covente e al riscje di viodi tal compagn di zûc un aversari e di lassâsi, ae fin, plui lontans di chel che si jere al inizi. Parcè che ancje la int e veve lis sôs resons, la sô filosofie e teologjie, il so cjâf e il so cûr. La gracie grande che il Signôr mi à dât e je stade chê di metimi dongje de int e de sô bande, e no cuintri, e di cirî in ogni so compuartament, ancje chel che no rivavi a capî, lis lôr resons e la lôr buine fede. Cussì no si sin cjatâts a tirâ un di une bande e un di chê altre, ma ducj o fasevin la stesse strade e si devin une man par lâ indenant te stesse direzion: la direzion de incjarnazion de fede, vadì il tentatîf sincîr di incjarnâ la eterne veretât dal vanzeli te veretât storiche de mê int. O ai capît che la veretât teologjiche o teologâl e restave astrate e sterpe se no jentrave tal cjâf e tal cûr de int, come la semence tignude sul cjast. Si veve di semenâ la veretât tal cjamp e tes cumieriis de int, par dâi concretece ae veretât e spiritualitât ae storie. Dut chest al voleve dî une robe sole: che no jeri jo il pastôr dai miei fedêi, ma ancje jo o jeri piore, e no des plui fedelis, e che o vevin insiemi di lassâsi cjapâ e compagnâ dal unic pastôr, il Signôr Jesù, il vêr responsabil de parochie, il vêr mestri e catechist, il vêr plevan dal paîs.

di pre Anton Beline

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +