Sfuei Mensîl Furlan Indipendent
Archivi de Patrie

IN CHÊ DÌ. LA ZORNADE DI UN FURLAN DAL POPUL CJAPÂT DENTRI TAL TRAMAI DE STORIE – 10e PONTADE. Sigurd e je la sclave di Ansfrit, siôr langobart di Reunie (Ruvigne) che al aspire a deventâ re dai Langobarts. Al è l’an 698. Svuarbât, al sarà condanât a finî la vite su la tor parsore dal Tiliment. | Il 698 in Friûl: fin de autonomie | Il 698 tal mont: a rivin i Araps

............

Sot, dentri de gose di piere e di baraçs, al cor il Tiliment, come che al fos il drâc di Sigfrît il Nibelunc, che al busine di sbrume blancje e di aghe verde e glaçade, rabiose e sglonfe, juste pôc prime di calmâsi pierdint il so vigôr su la grave blancje dal so jet, cualchi pas plui in là. Dal alt, la spice de torate a controlâ la plane, il Pincion là che il flum si strenç, parsore de Tabine (Pinçon al è il mût di clamà Pinçan in antic: tal sens di pinze che e siere il flum, ndr).

Dicembar. Frêt e glace. I dêts di Jule, il diu dal Invier venerât dai Paris, a cjarecin la jerbe muarte, si ingrimpin sui troncs dai morârs, a brusin i ramaçs scheletrîts e si fasin sintî ancje sot de piel, che si insgrisule. “Zulugne”, le clamin i contadins dal borc, e forsit no san di jessi ancjemò pagans inte lenghe e intal cûr, ancje se dongje dal cjistiel a àn tirade sù la plêf dal diu dai Cristians. Ansfrit al polse dongje dal fûc, involuçât intun grant mantel di lane nere: la sole lûs inte grande stanzie cidine.

La sole anime cjalde, profumade di len e di resine, di bosc e di muscli. E al pâr che lis ombris su lis parêts di piere a tachin a vivi, intun bal antîc, che al sa di liende: a son i cjavai di Alboin, il grant re, lis tendis di piel de Panonie, lis spadis alçadis a colpî. E daûr, une sdrume di Avars e di Sclâfs, un cori di Grêcs e di Latins. Veretât o saghe? Siums. Cjants aromai deventâts liende, materie buine di jessi cjantade dai Skaltz. Ma Ansfrit nol viôt: presonîr di une gnot eterne, sierât dentri di un scûr cence confins, di dulà che no si pues scjampâ plui: crude condane, volude dal re Cunipert in persone, cuintri chel princip di Reunie, chel Forumiulian che al veve olsât il riviel, concuistant prime Cividât, sfidant il duche Rodoalt, e po dopo movint i siei vuerîrs cuintri Pavie, golôs di corone e di fame. “Mi contistu ancjemò ce che ti àn fat, meine herre?”. A fevelâ e je une zovine che e je in zenoglon dongje di lui, il cjâf poiât su lis sôs gjambis, i braçs sierâts come une cinture ator dai siei flancs. Oh, se dome Ansfrit al podès viodile: i siei voi a àn il colôr de glace cuant che la prime lûs dal dì le piture cu la anime dal cîl; ceis neris come la gnot i fasin ombrene; di forment i cjavei, forment madûr, che al slûs di une ponte di ros.

Di rose la bocje, frescje freule di rosade. Sigurd il so non. Fie di une antighe gjernazie dai Wendish, sometude almancul cent agns prime dai Langobarts.

Une sclave, si podarès pensâle, e fie di sclâfs. Ma Ansfrit le ame come che mai al varès amade nissune altre, mai. “La mê spade è à seselade la int di Rodoalt e di Cunipert come che il falcet dal contadin al fâs cu lis rosis di cjamp su la jerbe frescje di Mai. E une dì, cualchidun al varà pûr di cjantâle la imprese. Un dai nestris, che si cjapi sù chê di svoluçâ la memorie di un popul gloriôs e de sô storie. Dal moment che grant al è l’onôr cuant che si combat savint che di sigûr tu pierdarâs. Masse facile la lote che e vedi la vitorie sigure ancjemò prime di tacâ!”.

E vai Sigurd, intant che Ansfrit al sunsure cjareçant i siei cjavei, e lis lagrimis i restin a trindulâ par un pôc su lis ceis, prime di gotâ planc su la piel frescje de muse: “In cjadenis devant dal re, a Pavie, o ai berlade la mê reson: il sium di une concuiste, par svindicâ la braùre di un popul, no la brame di un princip. Ma la condane dal potent, come che simpri al sarà, no podeve ameti perdon ni pietât.

La ultime lûs che o ai viodude e je stade la lame incandessente di une spade, pôc prime che la aghe dai voi si suiàs par simpri intune cisade”. Al profume di Primevere il cuarp di Sigurd.

La gnot e à glotude la tiere. Gnot sante, le clamin i Cristians, cuant che un Diu si fâs picinin par salvâ il mont cence spade. Ma i nestris paris, e pense Sigurd cjalant chê gose nere e frede che si vierç fûr dal barcon, a àn simpri crodût che al seti Wotan a tornâ tant che spirt de vite, par rindi feconde Freja, la mari de vite. Al bisugne clamâlu cul fûc, par che nol pierdi la vie. La lûs par vinci la pôre dal nuie. E cjape sù une torce, Sigurd, e e compagne Ansfrit par man.

La cjamare là che si duar, là che si ame, e je propite parsore dal cjamin de cusine. E je la tane plui clipe dal cjistiel. La plui segrete. La strece dai cjavei si sfante, al cole planc il vistît tai siei pîts. Frescje, nulinte, di une bielece che dome un cjantôr al savarès contâle. “Regalimi il flât profumât dai tiei lavris, Sigurd, fie di Baldur”, i sunsure Ansfrit: su la ponte di ogni so dêt un voli, par contemplâle cu la tenarece de man e di une cjarece, propite come Wotan cun Freja. De plêf, la vôs dal côr e pant al Mont: “Verbum Caro Factum est”.

………………………………………………………………

<Il 698 in Friûl: fin de autonomie> L’an che al va dal 698 al 699 in Friûl al segne un moment cetant impuartant inte storie de Patrie: il re langobart Cunipert al convoche a Pavie, inte sede dal ream, il patriarcje di Acuilee Pieri in ocasion di un grant Concili par meti fin al famôs Schisme dai Trê cjapitui, che di fat si siere in maniere uficiâl sul tacâ dal 700. Chest al è un fat cetant impuartant parcè che al segne une pierdite di autonomie de bande dal patriarcjât a bon pro de Glesie di Rome e de bande dal ducât langobart dal Friûl a bon pro dal re in Pavie. La ribelion di Ansfrit di Ruvigne e va lete salacor tant che un tentatîf disperât e gloriôs di oponisi cun fuarce a cheste omologazion, svindicant une alteritât dai Langobarts furlans no dome politiche ma ancje religjose. Probabilmentri Ansfrit al restave ancjemò profondementri pagan, se mai convertît ae eresie ariane. La concuiste di Cividât prime, aprofitant dal fat che il duche Rodoalt, fedêl a Cunipert, nol fos in sede, e po dopo la agression nuie di mancul che de Corone reâl, e manifeste une grande e eroiche volontât di resistence. Che come che la Storie nus insegne, no varà sperance di bon fin.

……………………………………………………………

<Il 698 tal mont: a rivin i Araps> Il Pape di Rome Sergio al sint la dibisugne di une aleance fuarte cui Langobarts in clâf antibizantine, viodude la antighe rivalitât cul Patriarcje costantinopolitan, e cussì al fâs di dut pûr di brigâ par vê al so servizi la spade di Cunipert, stiçant une sô sielte religjose fedêl a Rome e contrarie ae eresie ariane. La motivazion e je ancje sostignude dal interès di eliminâ dal sen de glesie universâl ogni forme di contraposizion e di sburt autonomistic, simpri definît tant che “eresie”: dut chest al incît une vore su la delicade situazion politiche internazionâl.

L’indebiliment dai Bizantins di fat al agjevole, propite intal an 698, la ocupazion di Cartagjin de bande dai Araps, che di li a consolidaran il lôr control su dute la Afriche setentrionâl. La “gnove Tunisi” e sarà il pont di partence par slargjâsi in dut il contest dal Mediterani, di Mars-Allah (Marsala) a dute la Sicilie. O podaressin cuasi sostignî che i agns che a cjapin dentri il 698 e il 700 a podin jessi considerâts la fonde de gjeografie politiche di dute la ete “alte medievâl”.

✒ Agnul Floramo

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Interviste / Friûlpoint, une bandiere dal Friûl

Walter Tomada
Michele Venier, titulâr de Friûlpoint, nus conte de sô dite nassude fasint maiutis in lenghe furlane e che cumò e fâs tant altri, simpri puartant indevant la Patrie in Friûl e tal mont O incuintri Michele Venier, il titulâr de Friûlpoint, te sede e laboratori di Lauçà. Un lûc net e ordenât, ma plen di […] lei di plui +