Nadâl, plui che lusôrs e colôrs, lampadinis che a cimiin e a corin, panetons e mandolât e je ocasion di interioritât e spiritualitât, di valôrs umans condividûts. Al nas un frutin che nol cjate udience e puest te societât. E lis gjerarchiis e autoritât di cualunche gjenar no si nacuarzin di lui. Ma i piçui e tibiâts in lui a cjatin sperance e udience, dignitât e coragjo. Cu la solite fantasie e profonditât pre Antoni nus puarte a pensâ, partint dai progjets di Diu te storie umane, a la nestre scjale di valôrs, a ce che o ritignìn plui impuartant e che al merti di impegnâsi e scombati.
pre Roman Michelotti
Diu al mandà l’agnul Gabriel intune citât de Galilee che i disin Nazaret, li di une fantate, imprometude a un om di non Josef de cjase di David: la fantate e veve non Marie.
Supìn chestis peraulis une par une par scuvierzi l’operâ mistereôs di Diu inte storie.
Ogni salvece e partìs di Diu e cuant che al vûl lui, l’unic che al cognòs il segret dal “timp”. E lui al opere midiant des creaturis, strade plui naturâl, par onorâlis cul cjapâ part a un plan di salvece. L’agnul al è mandât; nol pues lâ dibessôl, stant che la legjitimazion dal so viaç al è il mes che al à di puartâ. E cussì ancje Gabriel al partìs pe grande trasfierte. Dulà laraial il mes di Diu e ce strade sielzaraial?
Se Diu al è il trassendent e plui in là di ogni idee o inmagjinazion, o pues sielzi ancje une inmagjin “materiâl”, savint che si trate di une mê fantasie.
Ce nons sono scrits inte agjende di Diu, cun tant di direzion e di numar telefonic? O pues scrupulâju dal zîr che al à fat il puestin Gabriel.
Di tante int dal mont d’in chê volte o ancje dome de Palestine, in teste nol jere il numar di telefon dal prin predi e nancje chel di Erode o dal governadôr o dal president de bancje di Gjerusalem. Nol jere nancje Gjerusalem, ma Nazaret, un paîs che di li nol podeve saltâ fûr nuie di bon. E a Nazaret, in teste e jere une fantate di non Marie, imprometude a Josef. Une cjase siguramentri cence telefon o segreterie telefoniche, parcè che nissun nol pierdeve timp a clamâju. Ma Diu nol à dibisugne di telefon; al preferìs fevelâ diretamentri al cûr.
Rivant a la nestre situazion di vuê, furlane, cuâi sono i prins nons segnâts inte agjende di Diu? Siguramentri nol è chel dal vescul di Udin e de curie e nancje chel dal sindic o dal prefet. Come che nol è chel dal plevan di Visepente.
(al va indenandt a pagjine 19)
(di pagjine 14)
Parcè che Diu nol cjale timbris o targhis o istituzions, ma il cûr. A saran ancje chei, ma no fra i prins. Almancul no par dirit.
Cence volê robâi a Diu il segret dai cûrs, o crôt di cognossi plui di cualchi persone che siguramentri e je segnade fra i prins te agjende di Diu. Int che e vîf lis beatitudinis cence salacor nancje cognossilis; int che e à une fede granitiche cun dutis lis sdramassadis de vite. Int che e da simpri cence mai domandâ nuie, convinte di vê dome dovês e nissun dirit; int che no si dismentee di nissun, ancje se nissun no si impense di jê; int che e da e e lavore in plene gratuitât, cussiente de “inutilitât” aparint dal so dâ e dal so scombati; puaris fontanis là che ducj a van a bevi e tancj no àn nancje il pudôr di sierâ la aghe dopo bevût.
Cuissà là che al à svolât Gabriel in chescj dîs? O speri in tancj paisuts de Cjargne o de Sclavanie, in tantis borgadis dal Friûl là che no àn sintût nancje un glon di cjampane. Nol baste celebrâ il Nadâl par sigurâsi la presince dal agnul. Anzit o crôt che al sedi lât là che no ’nd jere ni lûs ni sperance, là che la vite e à cjapât il colôr fumul de muart. Se veramentri Diu al è alternatîf a nô e no mafiôs.
A proposit di agjendis, che ducj a ‘nt vin screade une: ce nons vino scrit par prins? Trops puars e piçui vino segnât, par jessi in sintonie cu la agjende di Diu? ■
pre ANTONI BELINE
Publicade su la Vite Catoliche ai 15.01.1994
Cirint lis olmis di Diu vol. 1, pagj 18
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +