Sfuei Mensîl Furlan Indipendent
Archivi de Patrie

GRIGNEI DI STORIE. Intun non la fuarce di une comunitât

............

La plêf: la origjin de peraule_ Blebs: il popul di chei che a crodin. No plui la sdrume di sotans come prime, ma la comunitât, la Ecclesìe, di oms, feminis, vecjos, fruts, vuidâts di un pastôr, il plebanus, che par furlan – come che si capìs a colp – al è il plevan. Te riorganizazion dal teritori volude di Costantin, ducj i plevans a àn di rindi cont ai vescui: episcopus al è chel che al cjale parsore, il sorestant. E ducj i vescui a àn di ubidî a chei di lôr che a vivin tes citâts plui grandis, lis metropolis tant che Rome, Costantinopolis, Aquilee, Alessandrie di Egjit, Milan, Antiochie e vie discorint. Par chest si clamin metropolits. E insom insom, ducj i metropolits a àn di scoltà ce che al dîs il Difensôr de Fede, ven a stâi l’Imperadôr. Chest sisteme cetant articolât, che al cjatarà il so spieli inte societât feudâl volude di Carli il Grant dal secul IX, al cjale ae plêf come ae tessare plui impuartante dal sisteme. E je la plêf l’element plui impuartant, parcè che li la istituzion e fevele cu  la int. Dispès il plevan al ven nomenât e elet dal popul dai fedêi, espression di une sensibilitât che si plante in profonditât, come une lidrîs, tai contescj là che si poie.
La plêf tant che laboratori antropologjic_ Il pape Grivôr il Grant al compliche ancjemò di plui lis robis, sugjerint di tirà sù lis plêfs là che par secui, ancje prime de peraule di Crist, il Popul al veve venerât i siei dius: fonts di aghe risultive, arbui milenaris, grotis, tombis e tumbui pagans a deventin il cûr de gnove Religjon, e il vecjo si messede cul gnûf, creant une spiritualitât misteriose e plene di intersezions. Tal perimetri sacrâl de plêf, i vecjos cults a vegnin avodâts a cualchi Sant che pal non che al à o pe sô tradizion ju evoche, ju sugjerìs. O vin za fevelât des gleseutis dedicadis a Sante Sabide, segnâl di une sorevivence de religjon ebraiche in tiere furlane: ma a sgarfâ sot di cualchi Sant Cristoful, tu cjatis santuaris di Belenos, il diu Celtic dai Solstizis, Siôr de Aghe e dal Fûc (compagn dal rituâl che si celebre te Pasche Tafanie!), o pûr Orion, dai Romans; Sant Vît al è la trasformazion di Svetovid, il sflandorôs siôr dai Sclâfs. E o podaressin lâ indevant, cjatant fûr dute une costelazion di riferiments, pratichis, sugjestions che a fasin de nestre tiere un laboratori cetant interessant pai storics e pai antropolics, e nus consegnin la ereditât dal Timp che al è stât, par che o sedin un fregul plui braurôs di ce che o sin.
Comunitât dai vîfs e dai muarts_ Ma la Plêf e jere ancje une grande bancje dâts, come che a disaressin vuê, là che il Plebanus al dave ducj i sacraments, dal batisim ae confession, la comunion, il vueli dal crisme, il matrimoni e il funerâl. Al segnave dut tal Catapan, il Regjistri des Animis, che cumò pai storics al devente un testemoni di ecezion che nus fevele de nestre int, comunitât par comunitât e secul par secul. Su chel libri a son stâts notâts ancje i events plui impuartants capitâts vie te corlete dal an: taramots, invasions, il passaç di cualchi re, la aparizion miraculose di un segnâl misteriôs tal cîl, une eclìs, o la cruditât di un Invier plui frêt di simpri. Insome, si pues lei la storie de vite cuotidiane, dal sacrifici de int comun, che si ripet dì par dì e si fortifiche, e che al cjape un significât plui profont se considerât dentri dal spazi rituâl de comunitât.
Dut ator de plêf duncje la vite, la muart, la gjonde e il corot_ Rituâi milenaris che a segnavin il passaç sacrâl dal timp de fieste, là che l’om al cjalave cun voi di spiete e di rispiet une Nature potente, segnâl de man divine che le à creade. E cussì, al cjante in rogazion vie pai vecjos tiermins, cun peraulis che a semeavin sbrocadis fûr dal stes cûr de Eternitât. Par leç antighe, il muart al varès polsât par simpri jenfri la sacre cente de comunitât là che al veve spindude dute la sô vite: e cussì, se il cimitieri al jere glotût fra lis vals montanis, di Ivier tocjave spietâ che la tiere si scjaldàs, disglaçantsi cu la Primevere. Gnot invernâl, gnot di muarts che a polsavin sul cjast fin ae prime lûs de Vierte, cuant che di dutis lis cjasis che a custodivin cualchi cuarp e partive lente une procession dolorose fin ae ultime polse, sot dal tor che al vaìve cun vôs di cjampane. Pai fruts nassûts in cualchi casere spierdude si scugnive puartâju a batiâ te aghe sante de glesie mari, vierzintsi un troi te nêf glaçade, cul picinin platât te cosse, cliput parsore di une piere scjaldade tal for. E vie, cjase par cjase, li che un al procurave dulinvie une piere plui clipe pal frut – stant che chê altre si jere aromai disfredade –, un sluc di sgnape pal pari e pal santul, un tic di brût cjalt pe mari e pe santule: une maravee di solidarietât e di umane sapience, chê che ti mobilite i paîs pai fruts a pene nassûts e pai muarts che nus lassin. Che al sedi stât chest, il vêr sium di Costantin? ■
Angelo Floramo
____________________________________________________

Il sium dal imperadôr

Ducj a cognossin il sium di Costantin il Grant che, prime de decisive bataie sul puint Milvio tal 312, al à vude la vision de Crôs e une vôs i à cisicât “in hoc signo vinces”. Ven a stâi, doprant chest segnâl sui tiei scûts e su lis insegnis dai tiei legjonaris tu vinçarâs la vuere cuintri dal aversari Massenc. Fede o malizie politiche? I Cristians, ancje se in clandestinitât, a jerin ben sparniçâts par dut il teritori imperiâl, e di secui a pandevin la lôr fede intune rêt di relazions, e si sostignivin, e a formavin comunitât. Vêju dongje al voleve dî usufruî di une machine logjistiche straordenarie par dâ di mangjâ ai soldâts, mostrâur il just percors di fâ, meti in clâr i pericui di teritoris che dome chei che a jerin a stâ li a podevin cognossi. E cussì, Costantin al vinç. E cul grant concili di Nicee, tal 325, si proclame difensôr de Fede di Crist. Par fâlu, al domande di podê controlâ dute la rêt cristiane. Bulo. Al puartarà a cjase, come vuadagn personâl, une incredibile vuaite par tignî adun l’Imperi, dal Palaç dal Imperadôr a Costantinopolis fintremai al plui puar cristian spierdût in tiere cjargnele. ■
Angelo Floramo

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +