O vin scomençât chest an dal “Ferâl”, la rubriche dedicade a pre Antoni Beline, riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
***
(setime pontade)
[…] I FURLANS E IL TEMPLI
E cumò si podarès passâ a fevelâ dal teme specific, cun dutis lis riservis e cautelis, ancje parcè che no ai fatis indagjinis specifichis e o crôt che, a diference dai studis storics, nus mancji une produzion leterarie di caratar socio-religjôs fate cun competence e cun passion. Mi tocjarà contentâmi di cualchi intuizion o scandai, lassant a int plui preparade e soredut a la centrâl diocesane un compit che mi somee plui impuartant di tante produzion clonade.
Jessint il rapuart tra religjon e templi un rapuart costant e scontât, al somearès che la regule e valès ancje in Friûl. Invezit mi pâr di podê dî che il rapuart tra il Furlan e il templi nol è cussì romantic e scontât.
Biel che i Romans no podevin vivi cence un templi che al celebràs la lôr glorie militâr e la sdrume dai lôr dius, al somee che i Celts, nestris antenâts lontanons ma reâi, a preferivin cjatâsi fûr, tai boscs e ad ôr des aghis, tune sorte di templi naturâl. La robe si è ripresentade, a so mût e stant ai studis di pre Gjilbert, tai prins secui dal cristianesim aquileiês, che al privilegjave la campagne, cu la frescjece des sôs risultivis e la libertât dai siei spazis, su la fredece formalistiche de religjon dal templi. Se la nestre çocje religjose e je di riunde ebraiche, no vin di dismenteâ che i Ebreus a àn vût un templi sôl fin che ur al àn lassât e po a àn vivût par dibot doi mil agns cence templi, cence predi e cence sacrifici cultuâl, fasintsi lûs cu la peraule ispirade e la tradizion. Cuant che si domandìn avilîts o disperâts ce che al podarès capitâ cence templi e cence struturis, o fasaressin ben a rifleti su cheste esperience uniche e esemplâr, savint che no son i templis che a tegnin sù e a salvin la fede ma e je la fede che e ten sù e e justifiche il templi.
Eclesiologjie tridentine
Ma chi o sin te preistorie o in timps tant lontans di nô che no podìn fâsi une idee obietive in merit. La stesse robe pal timp plui sflandorôs dal patriarcjât di Aquilee, tai prins secui dal cristianesim, cu la sô peculiaritât teologjiche, liturgjiche e musicâl. In realtât il moment fondant dal implant religjôs, ideologjic e cultuâl de glesie catoliche, che al à spartide la storie glesiastiche in prin e in dopo e che al à determinât, modificât e codificât dut l’aparât catolic in dut il mont al è chel dal Concili di Trent (1545-1563). Chel Concili che al à segnade la fin des striis, come che e dîs la int, ma ancje la fin de libertât e dal pluralisim. Un moment positîf e furtunât pe struture romane ma no siguramentri pe vitalitât e pe creativitât dal popul di Diu sparniçât pal mont e insedât te proprie culture.
Cuintriposizion radicâl
Il Concili di Trent al è in funzion antiprotestante, in posizion di Cuintririforme, ancje se i storics di marcje catoliche a fevelin di une Riforme de glesie romane indipendentementri de Riforme luterane. Al è vêr che di cualchi bande si cirive di cambiâ solfe, di tornâ a la purece e a la puaretât dal vanzeli, di finîle cuntun sisteme di vite plui paian che cristian, ma si tratave di câs isolâts e cjalâts cun suspiet, parcè che la centrâl e leve indenant contente e incussiente te sô coruzion. Fra Gjerolamo Savonarola, nemì dai Medici e acusadôr de imoralitât di pape Alessandri VI Borgia e dai scandui de curie romane, al è stât brusât ai 23 di Mai dal 1498 e pôcs agns dopo, dal 1520, il pape Leon X, fi di Lorenzo de’ Medici, al à scomunicât Martin Lutâr.
Jessint un Concili cuintri, al è claramentri ancje un Concili ideologjic, di definizions, di anatemis o scomunichis, di confins precîs, di cuintriposizions claris, di afermazion esasperade di une veretât dineade cu la stesse esasperazion de bande contrarie. E stant che la bande contrarie e à vude la disgracie, o la furbetât, di tocjâ i ponts cualificants di dut l’implant catolic, metint in discussion la mediazion de glesie, la premincence dal papât, il sacerdozi ministeriâl e lis sôs cualifichis esclusivis, vadì la potestât di consacrâ inte messe e di assolvi inte confession, al è come se a vessin metude une bombe sot lis fondis dal templi. Gjavant la funzion mediatorie dai predis, la centralitât dal cult eucaristic, la necessitât de confession auriculâr cul oblic di acusâ i pecjâts “cul numar e la cualitât” e la superioritât dai predis sui sempliçs batiâts, al restave juste il cjampanili e il muini par sunâ la ore di gnot. Nol esist, in dute la storie de glesie, un Concili come chel di Trent, là che il templi al sedi stât riafermât, rinfuarçât, assolutizât. Si pues dî che cul Concili di Trent al cjape la sô inviestidure canoniche il clericalisim, che al varà come reazion logjiche l’anticlericalisim.
Scugnint parâsi dai colps mortâi e ben calibrâts di Lutâr, il Concili al scrîf o al riscrîf une teologjie, une eclesiologjie e une liturgjie specularmentri contrarie. Lutâr al poie la sô dutrine sun cuatri fondis o pilatris: sola Scriptura, sola gratia, sola fides, solum baptisma.
[…] (al va indevant sul prossim numar)
pre Antoni Beline
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +
Nature e Ambient / L’unic che si à di crodiji cuant che al conte chê dal ors
Serena Fogolini
Stefano Filacorda, responsabil sientific pal grup di ricercje dal Ateneu furlan su la faune salvadie Un cors par imparâ a cognossi la faune salvadie des nestris Alps, cun lezions teorichis e pratichis su lis tecnichis di monitorament e di cature dai animâi, massime grancj carnivars, ungulâts e uciei.◆ Al è chest l’intindiment de Winter School […] lei di plui +