Sfuei Mensîl Furlan Indipendent
Archivi de Patrie

IL GRANT LUNARI DAL FRIÛL. Avost

............

RINGRAZIAMENT AL AUTÔR
Su la Patrie di Otubar dal 2013, Zuan Laurin Nardin al recensive “Il grant lunari dal Friûl. Sants, fiestis e tradizions dal cicli dal an” di Mario Martinis. O vin domandât al autôr di proponi a pontadis, mês par mês, cualchi estrat di chest publicazion siore di informazions su lis nestris tradizions e su la nestre storie. Lu ringraziìn pe disponibilitât e pe colaborazion che nus permet di condividi cui nestris letôrs chest grant patrimoni. ❚ ✒ Redazion

.

Avost al è l’otâf mês dal an; clamât Sextilis tal antîc calendari roman parcè che in chel ordin dai mês al ocupave la seste posizion, al cjapà il non di Augustus tal an 8 prime di Crist, par vie che al fo dedicât a chel imperadôr. Secont mês de Istât, Avost al marche la colme de stagjon, ream dal “solion” che al mande il so plui alt sflandôr e il so calôr plui potent tal timp de Canicule. Mês pegri e cuntun cjalt che al scjafoie, Avost al è il periodi de grande polse de campagne brusade dal soreli, li che i raps di ue sglonfs a tachin a cjapâ colôr, la blave e finìs di cressi ingruessant lis panolis, intant che i orts a son plens di verduris frescjis e di ortaiis crocantis. Tignût tant che il mês plui cjalt e ardût dal an, Avost al suie torints e cjanâi, al secje olis e risultivis, al crepe la tiere e al sflocje i vegjetâi; se la lisierte e gjolt dal calôr sui mûrs di clap, il gjat e il cjan a son distirâts te ombrene, come tancj altris animâi a stan parâts sotet dai rais che a brusin e la fontane e gote insom dal curtîl. La canicule e puarte a movisi sanguetis e sborfs, salamandriis e liparis. Par antîc, intant che il soreli al bateve a fuart, i vielis a polsavin te ombrene des piergulis fatis cu lis vîts di “ue amerecane” che a metevin in mostre raps sglonfs aromai cuasi neris, biel che i fruts a zuiavin sot dai puartis, o a lavin tai riui cun bergheladis di gjonde che a rivavin fin aes cjasis intant che a cirivin di cjapâ il gjambar taponât sot dai claps. Lis feminis a resentavin i vistîts te aghe curinte e nete des roiis o di cualchi riul di campagne e a prontavin il gustâ tai fogolârs.
Cûr de Istât, scagn dal ream dal soreli tal segn zodiacâl dal Leon, Avost al è il mês di polse par ogni ativitât produtive e cussì i lûcs di turisim di mont e de marine si jemplin. La int in feriis si straten fintremai gnot fonde tai zardins e su lis teracis li che e cene a viert, o ben e frecuente lis sagris di paîs. Grant lavôr in mont, li che si sfalce la jerbe e si sta daûr ai arments, intant che su la marine e va indevant cun sucès la stagjon de pescje. Tal firmament turchin de gnot, lis stelis a cimiin e lis meteoris a traviersin il cîl cu lis lôr codis de cjadude, la lune di arint e slusìs iluminant lis monts, il cidinôr profumât dal boscs e i prâts indurmidîts, lis che si sint il griâ a moments dai prins griîs dumiestics clamâts “avostans” fin a sclarî la vaste distese dal mâr.
Ma il grant cjalt dal Istât propit te seconde part dal mês al ven interot di burlaçs e burascjis che a puartin il cambiament de stagjon e la fin de canicule, adun cul mudament des usancis dal ream dai animâi. Lis cisilis a son in agjitazion e ancje il cîl al è in bulidure dopo che al è tornât il seren, la temperadure e je plui dolce e il vert di ciertis fueis si smamìs. Il soreli, ancje se al è fuart e madûr, nol pant plui i siei rais perpendicolârs, ma ben za inclinâts tal so lâ in rive jù.
Secont la tradizion popolâr, a son lis fiestis di S. Laurinç (10-VIII), de Assunzion de Beade Vergjine Marie (15-VIII), di S. Roc (16-VIII) e di S. Bortul (24-VIII) a regjistrâ la colade de Istât tal calendari di Avost, intant che e je la sagre de Cuarte domenie di Avost, cu lis sôs baldoriis, lis sôs luminariis e i siei fûcs a sierâ pardabon la Istât. Cun di fat, dopo chê domenie, ogni contadin si prepare pe vendeme, metint in ordin ducj i imprescj che a coventin par chest apontament une vore dongje e par ogni altre vore de Sierade. Ancje la temperadure si è pardabon sbassade puartant lis atmosferis dolcis e emozionantis de Sierade. ❚
Mario Martinis

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +