IL FERÂL. I FURLANS. Coordenadis gjeografichis (seste pontade)

Pal “Ferâl”, la rubriche dedicade a pre Antoni Beline, chest an o riproponìn une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
pre Roman Michelotti
***
(seste pontade)
[…] I FURLANS
Coordenadis gjeografichis
Se la storie e à il so pês tal studiâ l’identikit di un popul, un pês no mancul grant e determinant lu à la gjeografie. La vision religjose di un che al vîf in mont e je diferente di un che al vîf in culine e ancjemò di plui rispiet a un che al è te plane o ad ôr dal mâr. Adiriture si pues cjatâ une diviersificazion inte stesse fasse gjeografiche. Un che al vîf tun borc o tun paîs là che il soreli al trai di buinore fin gnot al à une vision religjose plui positive, solâr e magari superficiâl di un che al vîf tun borc platât e cul soreli a tessare, là che la pôre o il terôr di Diu a saran la carateristiche dominant. O ai sot voli doi films classics, “Ordet” di Carl Th. Dreyer e “Il setim sigjil” di Ingmar Bergman. No varessin podût jessi pensâts e zirâts che intune regjon nordiche, cun tant scûr e frêt e cun pocje lûs e calôr, e di doi regjiscj che a vevin respirât chest clime fin te profonditât dal cûr. Pe stesse reson, un baracon devozionâl come chel ator di pari Pio al podeve cjapâ pît e slargjâsi dome inte solaritât meridionâl. Passant duncje des spicis des monts a la marine, o larìn de massime interioritât a la massime esterioritât, de estreme individualitât a l’estreme socialitât.
La mont ti da protezion ma ancje ti delimite. Ti ten strent come tun pugn ma e riscje ancje di no lassâti tirâ flât e cjalâ fûr. Dut chest si tradûs tune religjon dipendente e fatalistiche, intimistiche e ripetitive, che e va une vore in profonditât tal intim de persone ma e stente a slargjâsi parsore vie. Juste il contrari de religjositât di un Furlan de Basse. Chest si pues constatâlu metint a confront, par esempli, la religjositât de int di Cjanâl di S. Canzian (Prât di Cjargne) cun chê di Maran o, plui ancjemò, di Grau. O stoi fevelant simpri di religjositât e duncje di manifestazion esteriôr, che no à un rapuart diret e scontât cu la fede. O podarai dî che a Maran a van plui in glesie che no a Sostâs o a Davausa; no ai motivazions ni provis par dî che i catolics lagunârs a àn plui fede dai anarchics de val Pesarine.
E esist ancje une leç di atrazion, là che il fuart al tire il debul. A confin cul mont slâf e todesc, al è evident che la religjositât e sintarà l’inflùs di une comunitât culturalmentri plui fuarte e omogjenie, di stamp sentimentâl o protestant, come che i paîs a contat cul Venit a cjaparan sù une religjositât di stamp venit, là che il templi al è determinant. Almancul come imagjin sociâl e façade. Mi visi che une volte il vescul Battisti mi fevelave de floridure religjose dal Venit ben plui sflandorose se paragonade al desert furlan. I ai rispuindût, semplificant e enfatizant, che la diference fra i Venits e i Furlans e je che i Venits a van a preâ Sant Antoni di Padue e po a robâ e a imbroiâ e i Furlans a robin e a imbroin cence passâ par Sant Antoni di Glemone, che al è simpri chel.
No vin di dismenteâ i secui di emigrazion e lis contradis là che la nestre int e leve a vore. No si pues capî certs ategjaments anarchics de Cjargne dai prins dal secul se no si ten cont che la clime che a respiravin e vignive di là des monts, dal mont de Riforme e de prioritât de cussience rispiet a la mediazion eclesiastiche.
Duncje, cuant che si fevele di Furlans e di religjon, si à di tignî presint ancje la diferenziazion gjeografiche, la condizion socio-ecomomiche, la ereditarietât psico-somatiche, l’habitat culturâl, oltri naturalmentri al fat che si trate di un dai aspiets plui personâi de vite e partant si varès di concludi che “ognun al à un Signôr par cont so”.
Dentri di chest telâr gjenerâl, si pues intivâsi in cualchi rare isule, une sorte di oasi là che la religjon e à cjatât un humus particolarmentri adat e fecont. Al pues dipendi di une carateristiche particolâr dal paîs o de presince di cualchi predi particolarmentri grant e sant o ancje benvolût, che al à vude la gracie di semenâ a plene man e la furtune di cjapâ sù un racuelt straordenari. Par esempli, il fat che a Çurçuvint a sedin saltâts fûr siet predis no si pues no metilu in relazion a la presince di un predi come siôr Santul pre Luigj Zuliani. Ma ce che tal Venit e sarès regule, culì di nô e je une raritât di cjalâle plui cun suspiet che cun amirazion. ❚
[…] (al va indevant sul prossim numar)
pre Antoni Beline