IL FERÂL. Diaspore in cjase

Un plevan des mês bandis si cjatave une vore ben cu la superiore, in sens spirtuâl naturalmentri, e al jere su lis spinis parcè che la regule e diseve che, spirât il secont mandât, la superiore no podeve restâ cun chês stessis muiniis. Dopo tant pensât e tant preât, chel plevan al à vude l’ispirazion juste. Invezit di gambiâ la superiore, al à fat partî dutis lis muiniis e cussì la comunitât si è rinovade secont la regule.
Se jo o ai voie di fâ sparî un popul, o copâlu te sô anime e tignîlu in vite par doprâlu di mus, o pues fâ dôs robis: gjavâi la sô clime spirtuâl sparniçantlu pal mont o lassâlu a cjase sô e gambiâi dal dut la sô aghe spirtuâl. Il secont sisteme al è plui carogne. Prin di dut si salve la muse denant de storie e po si gjave l’arbul di lidrîs gjavant la lidrîs al arbul.
Chel che al è pal mont al pues simpri vê tal cjâf la memorie de sô tiere e dal so aiar e clucî la sperance di podê tornâ. Ma cuant che un al devente forest e straneât a cjase sô, parcè che nol à plui cjase, i ven a mancjâ ogni sperance e ogni pussibilitât di riscat.
I furlans si son cjatâts a fâ i conts ancje cun cheste seconde diaspore, plui galiote e periculose. Chei che a jerin a vore in France a sintivin la nostalgjie e il valôr de lôr tiere, salacor cun plui lancûr e intensitât di chei che a jerin restâts a cjase. Parcè che a restavin furlans. Ma se un stât al rive a fâi capî a un furlan che la sô culture e je puare e limitade e in pierdite e che al à dut ce vuadagnâ a butâsi te grande culture taliane, al à rivât a fâ la robe plui tremende di chest mont: a fâ in mût che un popul intîr al odei se stes e lis sôs lidrîs e si copi. Cheste e je veramentri la “seconde muart”, chê cence apel ricuardade te Apocalìs (21, 8). L’infier nol è murî ma restâ vîfs cu la muart dentri e cence viodi Diu. Un popul al à l’infier cuant che al è vîf ma muart par dentri e cence un pont di riferiment spirtuâl e culturâl.
Si pues lâ indenant distès. Di fat o sin lâts indenant. Dome che altri al è cressi di protagoniscj e altri al è cressi di sotans. Altri al è cressi te proprie clime culturâl e altri al è cressi tune clime foreste. Al è juste il contrari. Se duncje i risultâts che o vin sot i vôi no son esaltants, cirìn almancul di dâi al popul furlan, che nol à grancj debits cu la storie e cul mont, chês atenuants che si dài a un delincuent. Soredut no volarès che a fâ la predicje a fossin propit chei che no dome no i àn dade une man ma che a àn judât il paron e il prepotent di turno a butâ la nestre int tal fossâl.
PRE ANTONI BELINE
Gjavât di: Un popul in eterne diaspore, ciclostilât, 1995