Cuinte pontade. Autonomie come categorie spirituâl

A van indenant lis pontadis di un intervent di pre Antoni dulà che al presentave un dai aspiets di fonde des bataiis di pre Checo Placerean: la autonomie.
Lui al è stât om, predi, insegnant, inteletuâl, oratôr, profete, visionari, libar e al à lassât segnâi, intuizions, iniziativis che cul timp a àn cjaminât cu lis gjambis di chei che lu àn seguît.
Cualchidun si domande: Cuant varìno un gnûf pre Checo? Magari cussì no, i profetis no si ju invente. A son dons di Diu, de storie. Un al nas e al scuvierç in se temperament, inteligjence, libertât, luciditât di vision, coraç, passion, scletece, armonie di cualitâts e les met in vore. Preìn il Diu de storie che no nus lassi a lunc cence profetis, cence lûs tun mont tant ingredeât e plen di fumate come chel di cumò.
pre Roman Michelot
Une volte, fevelant tune cunvigne de Union Valdôtaine, al à dit: “Il podê prime al cîr di copâti. Po al cîr di comprâti. Se nol rive nancje li, al cjape la tô idee e le sassine”. Mi cjatavi in Cjargne, al inizi de mê cariere sventurade e des mês bataiis. Lui mi à dit: “Se tu vuelis jessi libar, se tu vuelis dî dut ce che tu pensis, cîr di procurâti la bocjade di bessôl, di jessi paron de tô pignate”. E mi à conseât e invoiât a fâ i esams di mestri e a mantignîmi di bessôl.
◆ Cun cheste disposizion interiôr, cun cheste categorie morâl e spirituâl, pre Checo si è butât ad implen inte sô ativitât di mestri, di predi e di politic. “É sceso in campo” par doprâ une peraule deventade storiche o fatidiche. E chest al è un dai merits no secondaris; forsit il plui grant di pre Checo, sigurementri chel che lu à caraterizât di plui. I predis e i mestris, a mût lôr, a son simpri stâts oms di culture. Ma si tratave di une culture sierade, astrate, di erudizion o di evasion. Pre Bepo Marchet al è l’esempli plui splendit di inteletuâl olimpic e solitari. Pre Checo al à operât il passaç pericolôs ma fondamentâl fra la culture astrate e la azion concrete. ◆ Al è passât dal libri al popul, puartant la culture al popul e il popul ae culture. In chest al è stât judât ancje dal fat, pluitost râr, di une grande unitât interiôr, don di nature e di fature, che lu puartave a jessi simpri se stes e simpri libar, tant in glesie che in scuele che in place che framieç dai berdeis de vite di ogni dì.
◆ Par solit, il predi no si impace di politiche (in sens atîf e declarât, no di supuart), l’inteletuâl no si interesse di religjon e il politic al va pe sô strade. Lui al à rivât a cumbinâ chestis trê dimensions in maniere armoniche fra di lôr e a trasfondilis te ativitât concrete e prosaiche. Parcè che al jere un predi e un inteletuâl che al vignive dal popul e al viveve framieç dal popul e al supave ancje cence rindisi cont i umôrs dal popul, dal so popul di Montenârs e dal popul furlan. No si pues imagjinâ pre Checo fûr o cence il popul furlan.  ❚