Il drame des impresis di servizis in apalt

La situazion che si è creade, in chescj ultins agns, tai apalts publics di servizis in gjenerâl e di puliziis in particolâr, al è pardabon preocupant. Ancje tal nestri Friûl. Chest setôr al è caraterizât di garis di apalt che a son adiudicadis cun ribàs incomprensibii su la base di aste, e assegnâts ae ufierte plui vantazose dal pont di viste economic.
Cuasi simpri, lis aziendis che a vincin l’apalt a cirin di recuperâ i margjins magris di profit ridusint lis oris di vore e domandant aes lavoradoris e ai lavoradôrs il stes impegn di prime. L’orari e il salari a calin une vore, ma i compits e i obietîfs assegnâts a restin chei istès.
Si sa benon che tal setôr dai servizis il cost plui alt al è propit chel dal lavôr, duncje si interven cuasi dome su chest. Al è pardabon inacetabil che chestis lavoradoris e lavoradôrs, che za no son ben paiâts, a vedin di patî altris riduzions.
Chescj tais a son tacâts, agns fa, tai servizis di puliziis di cualchi caserme de provincie di Udin, cun fuarpeadis al orari di lavôr adiriture dal 30-50%. Po dopo, cu la crisi e cu la leç di revision de spese,  in tancj altris apalts lis maestrancis a àn patidis impuartantis contrazions dal orari di vore. In particolâr, tal apalt dai servizis di puliziis de Universitât dal Friûl, afidât ae Colser di Parma, lis oris a son stadis taiadis dal 13%.
Po dopo, ancje l’apalt dai servizis des puliziis tal Ospedâl Civîl di Udin Sante Marie de Misericordie, afidât ae Markas dal Sud Tirôl, al à viodût un tai des oris dal 15%.
Tal afidament dal gnûf apalt pai servizis di traspuart dai pazients, simpri tal Ospedâl Civîl di Udin, la dite Dussmann Service e à declarât ben 30 lavoradôrs in plui. Al è clâr che l’impegn dal sindicât al sarà massim e al smirarà a limitâ plui pussibil l’impat sociâl.
Di fat, il setôr dai servizis nol à amortizadôrs sociâi, e duncje si à doprade, là che al è stât pussibil, la Casse Integrazion in Deroghe par compensâ almancul un pôc lis pierditis di salari derivadis de riduzion di orari. Si à di capî che chescj tais a van a penalizâ personis cuntune paie za cetant basse e cun dificoltâts seriis di ricolocazion!
La tant famose ma ancje teribil revision de spese publiche e à di tocjâ ducj i aspiets organizatîfs, a 360 grâts, e no colpî massime o dome lis fassis za penalizadis e debilis.
A àn di finî chescj tais malacuarts di orari, di salari e di puescj di lavôr, razionalizant la gjestion dai apalts e eliminant lis straçariis par miorâ, invezit, la cualitât dai servizis furnîts des ditis in apalt e tornâ a dâ considerazion e dignitât aes lavoradoris e ai lavoradôrs che a lavorin in chest setôr. ❚
Athos Di Stefano, FISASCAT CISL di Udin  (setôr Cumierç, Terziari, Servizis)