Il cjant dal gjal

A Vile Manin di Passarian e fo fate une cunvigne internazionâl cu la partecipazion dai gjai plui famôs e impuartants dal mont.
A jerin in discussion argoments di chei grues.
Un di chei al veve par teme:
Isal nassût prime l’ûf o la gjaline?
Daspò di une setemane di dibatiment, no vignì stabilide nissune conclusion definitive.
◆ Ma l’argoment che al à vût discjadenât un grues scambi di ideis al è stât:
Ise vere che il cjant dal gjal al fas cricâ il dì?
Su chest teme, par prin al cjapà la peraule il stimât professôr Carioca che al vignive dal Brasîl e che al tacà:
“Cocorocò! Jo o pensi che il lusôr al rivi intal mont dome parcè che o sin noaltris gjai a fâlu vignî cul nestri biel cjant.”
◆ Daûr di lui al intervignì Polish, studiôs olandês cognossudon: “Kükeleküüü a ducj! Ancje jo o crôt che se no fossin noaltris gjai, il mont al restarès simpri intal scûr.”
◆ Al le a dî la sô ancje Gavrilo, un rus grant espert di chestis robis:
“Kukarekù! Jo o soi sigûr che a son propit i cjants luncs e perfets dai gjai che a fasin rivâ su la tiere tant splendôr. E al è ancje par chel che cuant che il gjal al torne intal gjalinâr dutis lis gjalinis lu amirin!”
◆ Par ultin, al cjapà la peraule Crispin, un gjal che al vignive des bandis di Spilimberc.
“Chichirichi!” al tacà Crispin e, par furlan, al spiegà che une volte lui al veve cjapât frêt e cul mâl di cuel i jere vignude la grocje, e cussì nol rivave a cjantâ. In chê dì, ancje cence il so cjant, al rivà il soreli e al fasè lusôr dapardut.
La sô e fo la relazion plui preseade dai partecipants ae cunvigne mondiâl, tant che Crispin al vignì proponût pal Nobel. ❚