Si è vierte cul fair play, cu la lealtât, la edizion numar 66 dal “Carnico”, il Campionât cjargnel di balon che come ogni Istât al clame intor di se la atenzion mediatiche e no dome di ducj i passionâts sportîfs furlans. Un moviment che, propit l’an passât, al veve fat cjacarâ di se par vie di un pâr di episodis no trop educatîfs cun scualifichis griviis e une schirie di polemichis. Chest an invezit, intune des primis partidis di Cope Cjargne, si à vude notizie di un biel at, chel dal zuiadôr de Folgore di Divilin. La partide si stave zuiant cuintri la Stella Azzurra di Glemone e Valentino Paschini al à convinçût l’arbitri a tornâ sui siei pas dopo che chest i veve sivilât un rigôr a favôr par un fal di man in aree. Paschini, ponte de scuadre, al podeve vê a disposizion il penalty de vitorie, ma cence nissun probleme al à visât il diretôr di gare che il balon cu la man lu veve tocjât lui e no il difensôr, puartant duncje l’arbitri al cambi di decision. Un episodi che al à cjatât il preseament de scuadre aversarie e di ducj i sportîfs dal Carnico. De bande sô Valentino, 30 agns, di simpri inamorât dal balon, nol cîr masse publicitât e cu la modestie che si puarte simpri daûr, al à volût ringraciâ ducj pai compliments, spiegant che dut câs ats come il so a dovaressin jessi la cuotidianitât intune partide: «O zuìn intun piçul ma tal stes timp grant campionât, ducj a fasin sacrificis tra famee, lavôr e altris impegns, par podê dopo lâ la domenie a zuiâ. Al sarès just duncje che ducj si compuartassin cussì: al vuadagnarès dut il moviment dal Carnico».
Par une biele storie però a è subit saltade fûr une altre che par fortune e je stade ridimensionade in curt. Presumudis peraulis razistis a saressin stadis ditis tai confronts di un arbitri di nazionalitât albanese, in ocasion de partide tra i Mobilieri di Sudri e la Ovarese. Tal refert, il siôr Strazimiri al à scrit di «espressions discriminatoriis» tai siei confronts. Ma cemût che al à scrit ben Massimo Di Centa, sul sît internet carnico.it, cheste volte si è sglonfade la mignestre. Di Centa, gjornalist un grum ecuilibrât, presint ae partide, al à riferît di vê sintût in ducj i novante minûts une uniche vosarie «torne in Albanie» indreçade al arbitri. E o tornìn a ce che o vevin scrit l’an passât a fin stagjon: va ben tignî la vuardie alte, va ben condanâ dal moment lis magagnis, ma atenzion a no volê strafâ sul banc dai imputâts, visantsi che une volte il Carnico, par amission stesse dai protagoniscj, al jere tant plui violent e barufant, e che a nivel sociâl la situazion e je lade un grum in miôr. Par un arbitri che al scrîf un tic masse, al è un altri che al salude il campionât, Andrea Fabris di Resiute, un omenon tant grant cussì come tant simpatic e in gjambe, un arbitri che al à simpri savût interpretâ il so rûl cun inteligjence, cence mai volê strafâ.
Pal rest al è tacât un campionât che, come ogni principi di stagjon, al puarte cun se une schirie di bogns intindiments, grande competizion tai trê zirons, cun soredut la corse a frenâ il predomini dal Cjavaç che tal 2015 al è rivât a vinci dut ce che si podeve. Cedarchis, Vile, Real a son prontis a metii i bastons tes ruedis. In seconde categorie al à saludât, par problemis societaris, il Rapid, la scuadre di Raviei, Esemon Disot e Disore, di chê altre bande e je in bulidure la Gnove Osôf, novitât dal 2015 che, dopo il prin salt di categorie, e vûl rivâ subit in Prime categorie. Cussì come che in Tierce, l’esperiment de Viola di Cjavaç, fat di un trop di zovins, al cîr conferme tai risultâts. ❚
✒ David Zanirato
__________________
Il mont mediatic dal “Carnico”
Cu la edizion numar 66 si fâs fieste ancje te redazion di A Tutto Carnico e di www.carnico.it. Il mont mediatic creât dal 1991 di bande di Renato Damiani che al sta lant indevant a fâ numars di record: 6.000 scoltadôrs di medie par domenie ae radio, 13.000 contats su pes pagjinis dal sît internet dulà che si pues scoltâ la direte des partidis ancje vie streaming. No dome de Cjargne ma ancje chês de Valcjanâl, dal Cjanâl dal Fier, dal Glemonàs e, di dîs agns incà, chês dal Cjadovri. A son tantons i emigrants di dut il mont che si coleghin par no pierdisi nancje un minût de trasmission che e je rivade ae vincjesime cuinte edizion. Lungje vite al Carnico! ❚
✒ Da.Zan.
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +
Nature e Ambient / L’unic che si à di crodiji cuant che al conte chê dal ors
Serena Fogolini
Stefano Filacorda, responsabil sientific pal grup di ricercje dal Ateneu furlan su la faune salvadie Un cors par imparâ a cognossi la faune salvadie des nestris Alps, cun lezions teorichis e pratichis su lis tecnichis di monitorament e di cature dai animâi, massime grancj carnivars, ungulâts e uciei.◆ Al è chest l’intindiment de Winter School […] lei di plui +