Sfuei Mensîl Furlan Indipendent
Archivi de Patrie

Il Birifici Artesanâl “Casamatta” di Enemonç

Marta Vezzi

“La sielte di vierzi un birifici artesanâl in Cjargne e je stade cjapade pal fat che di simpri o ai volût fâ chest mistîr.” Cussì si presente il zovin Andrea Menegon, che tal Setembar dal 2017 al à scomençât la sô ativitât intal piçul paisut di Enemonç, che al conte pôc plui di mil abitants.
◆ “Une volte – al va indenant Andrea – o zuiavi di balon a nivel professionâl in serie D tal Salò. Dopo mi soi fat mâl e o ai scugnût molâ chel mont, par chest o ai tacât a svicinâmi al gno sium di cognossi di dongje il mont de bire. A 29 agns, tal mês di Setembar dal 2017, o ai viert la mê birarie e à finît 6 agns. Vint devant l’Invier, i prins timps o ai podût organizâ benon la ativitât che e à tacât a lâ miôr vie pe Primevere dal 2018. O ai sielt Enemonç parcè che jo o soi di achì e o ai doprât la cjase, il stali e il prât di mê none che e je mancjade intal 2009.
◆ Cumò o cîr alternativis, parcè che al è rivât il moment di ingrandîsi o di sielzi altris stradis. Lis pussibilitâts a son dôs: la prime e je chê di movi la produzion e di tignî la vendite al detai dulà che e je cumò; la seconde invezit e je chê di fâ la part invernâl, che cumò no vin, doprant la ostarie dal paîs, ma par cumò cheste e je dome une mê idee e nuie di concret. Viodarìn ca di pôc, insome. Di cualchi timp o ai un dipendent simpri di Enemonç che al è pardabon brâf. Vie pal Istât la mê compagne e gjestìs il chiosc.”
◆ Un dai elements impuartants de bire di Andrea e je la aghe, che e rive drete de fontane Siace su la mont Peçêt inte Val di Preon a 1847 m.
◆ “Intun an – al conte Andrea – o fasin 10 cualitâts di biris: 6 a son fissis e cun chês altris o fasìn a rotazion, lant daûr dai prodots di stagjon. O doprìn materiis primis di chenti, tant che la salvia sclarea secjade, la camamile, la mîl di tale, i fîcs che vie pal Istât o tirìn jù dal arbul che o ai daûr dal birifici. La rivendite e je vierte dut l’an e o vin clients di dute la Italie. Tancj mi ordenin ancje dal sît. L’an passât o vin sierât a 85.000 litris, che no je une produzion grandone, ma o sin simpri une realtât artesanâl. La bire e à i siei timps di maturazion e o preferìs dî “no ‘nd ai”, pluitost che vendi un prodot fat mâl.”
◆ La sielte dal non “Casamatta” e je stade fate par ricuardâ i biei timps che Andrea al à passât a zuiâ tal Ferare, cuant che il miercus lui e i siei amîs a fasevin fieste intun locâl di Bologne che si clamave cussì. Il ricuart di chei timps al è restât ancje tal logo, cun dôs mans incrosadis che a fasin il numar 22, ven a stâi il so numar di maie cuant che al jere zuiadôr di balon. Dongje dal numar 22 al è un triangul che al rapresente la piche di une mont, sore vie e je la corone e la scrite par latin dal steme comunâl di Enemonç Oppidum inter montes tutum.
◆ La etichete de bire e à il so colôr, e la bire stagjonâl e cambie ancje il logo, par esempli chê estive si clame “Siesta” e e dopre un sombrero messican.
◆ “Se un al vûl fermâsi a vivi in Cjargne, al cjate sigûr dificoltâts, ma vint une mentalitât plui vierte al rive a frontâlis cence fastidis e al cumbine dut istès. Di Istât si lavore ben parcè che e je tante int che e ven chi di nô, soredut de citât, e dopo si puarte a cjase lis butiliis di bire. O ai viodût in chescj ultins agns int che e scomence ancje a preseâ cheste tiere di Cjargne. La mont e je biele ma si scuen ancje valorizâle cun progjets e ideis. Dome cussì, planc a planc, i risultâts ju stoi viodint. Mi pâr che vivi la mont cumò al è plui biel di cualchi an indaûr, e chest graciis a progjets che a son stâts fats, come chel dai trois che a son stâts insiorâts cun segnaletiche e v.i.”
Par cognossi alc di plui o curiosâ:Par cognossi alc di plui o curiosâ: https://www.facebook.com/birracasamatta – www.birracasamatta.com ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +