Il belanç dal 2015 e lis prospetivis pal futûr in cjamp economic

Cemût isal stât l’an che al è daûr a finî?
I parês si stracin, a son tra di lôr contraditoris, dispès a son fîs di visions masse interessadis e masse di part.
La CISL di Udin, di simpri, cuant che e trate i temis dal lavôr, de societât e de economie, e partìs di un “principi di realtât” san e che no si pues rinunziâi, evitant di fâsi imbroiâ de propagande e vint miôr, a pet di cheste, la informazion oneste.
La CISL di Udin e à sielt simpri, cun di plui, di stâ fûr dal “zûc” de politiche che, se e je al Guvier e edulcore lis situazions e che, se e je ae oposizion, lis piture di neri.
I contignûts, lis analisis e lis propuestis de CISL di Udin no àn mai vût il fin di ingraciâsi cheste o chê bande politiche. L’unic obietîf al è stât e al è chel di perseguî il ben dai nestris rapresentâts, lavoradôrs e pensionâts, duncje dai teritoris e des comunitâts là che a son a stâ e a vivin.
Par fâ chest cun serietât, si impon une proprie capacitât – cence la presunzion di jessi esaustîfs – di leture, di analisi e di propuestis.
IL PONT
Ve, alore, che al va afermât in maniere esplicite cemût che la tant declarade riprese de economie, pardabon di podê auspicâ, si sedi daûr a concretizâ ben planc, masse plan, no tant pes sieltis di politiche economiche e industriâls propriis, ma par fatôrs esogjens, internazionâi. E, cun di plui, la riprese economiche no puartarà cun se une riprese ocupazionâl, stant che dutis, propit dutis lis tecnologjiis di procès e di prodot, a son job killer, ven a stâi a sparagnin lavôr.
E, in efiets, la disocupazion no je in calâ, ma in cressite. Dal rest, prime di assumi cualchidun, lis aziendis a àn di doprâ a plen i propris implants e vendi dopo la plui part de produzion. Al moment, no je ancjemò cheste situazion.
TORNÂ A PENSÂ AI OBIETÎFS
Al è, alore, di meti pardabon al prin puest, e daurman, no dome la cressite de economie, ma la ripartizion de ricjece esistente stant che nol podarà jessi, tant che intal passât, un plui grant benstâ par ducj che al derive dal disvilup. Il disvilup e la cressite no son ni infinîts e nancje bogns in se. Chescj concets a son di tornâ a pensâ.
La nestre provincie e je, in Regjon, chê che e à paiât il presit plui alt ae crisi par vie de crisi industriâl che e à colpît in misure significative sedi il setôr des manifaturis che chel edilizi.
IL RÛL DE REGJON
Al devente culminatîf il rûl che i tocje ae Aministrazion Regjonâl e aes sôs politichis industriâls. E à fat ben la Aministrazion Regjonâl a varâ chel che i disin “Rilanç des Impresis”. Cumò i struments e i intervents che finalmentri, e in maniere meritorie, a son stâts metûts a sisteme a àn di jessi doprâts pe inovazion des filieris regjonâls principâls, pe agregazion des impresis e pe lôr cressite di dimension, pe internazionalizazion des stessis e in particolâr pal aument des capacitâts gjestionâls des piçulis e mediis impresis.
UN OSSERVATORI
Al sarès pardabon util, cun di plui, un Osservatori Regjonâl des impresis che, tacant dai dâts impuartants e utii des Cjamaris di Cumierç e des variis Associazions Datoriâls, al struturi un lavôr di ricercje e di aprofondiment cun intervistis aes singulis impresis sui lôr bisugns e su lis lôr spietis. Dal sigûr al è impuartant cognossi lis situazions economichis e finanziariis, ma al è ancjetant necessari cognossi chês produtivis, di marcjât, di invistiment, de ocupazion e dai profîi professionâi di ogni singule realtât.
E je necessarie une aleance sedi cul sisteme bancjari plui internazionalizât che cul sisteme bancjari locâl, par che e sedi pardabon pussibile la internazionalizazion des nestris piçulis e mediis impresis. Si puedin sperimentâ colaborazions cu lis bancjis za presintis intai paîs plui dinamics e interessants, ancje par cirî compagns industriâi e compagns finanziaris internazionâi. Al reste dal fondamentâl sigûr un aprofondiment dal leam, par altri za in jessi, cu lis bancjis locâls, par aprofitâ des oportunitâts di finanziament ancje public e par gjestî te maniere miôr la partide finanziarie.
La Segretarie de Cisl di Udin no pense, insume, che e sedi buine robe rimetisi ai regâi fats in maniere spontanie dal marcjât, parcè che no viôt inte comissure di cumò e intal prossim futûr nissune indicazion di chest gjenar che e puedi confuartâ. E stime, duncje, che al sedi  necessari il riordin dai struments finanziaris publics (Friulia, Mediocredito, Finest) par che no drenin risorsis ma che a sostegnin il sfuarç di ricapitalizazion, di inmodernament e di internazionalizazion dal sisteme di manifaturis regjonâl. Chescj struments a àn di jessi metûts a servizi dal rilanç de economie regjonâl, tacant dal setôr des manifaturis.
L’an che al è daûr a finî nol è stât un an positîf pal lavôr e pe economie. Impegnìnsi, ducj, par che il 2016 al sedi pardabon l’an de riprese. ❚

✒ Roberto Muradore, segretari de Cisl di Udin