Il Balonîr de Cjargne: Romeo Patatti

Romeo, cemût âstu tacât cheste strade di “balonîr”?
Fin di zovin o vevi vût chest snait e i miei “mestris” (ju clami “mestris”, che cussì si gasin!) a son stâts Gjelindo Titiliti e Sdrindule, che o sintivi simpri lis lôr barzaletis. Po, uns dîs agns indaûr mi à clamât Andrea Cacitti di Tumieç e cun lui o soi lât in gjite a Klagenfurt cuntune associazion di disabii. Ju vin compagnâts in coriere fin al Minimundus e cun nô al jere ancje Sdrindule che mi à sintût intant che o tignivi compagnie al grup contant cualchi barzalete. Mi à dit “Ven a dâmi une man in Friûl” e cussì mi soi cjapât sù e o ai tacât a zirâ lis sagris.
Ce sensazion ise cuant che si à denant tante int che e rît?
Une sensazion maraveose. Sul imprin o vevi une pôre mostre, sâstu? Un cont al è contâlis denant di cualchi amì intune fiestute in Cjargne (che za se a tasin al è bon segn…). Un altri cont al è cjatâsi come a Cuargnûl che pe prime volte o jeri denant di votmil di lôr pe fieste dal taur. Robis di no crodi! Pense che o vevi za pronte la femine in machine par scjampâ! Invezit o i tacât e no dome a ridevin, ma ancje mi batevin lis mans! E li mi si è viert il cûr! Fâ ridi la int al è dificil ma bielon; fâsi ridi de int al è plui facil, ma ancje mancul biel!(al riduce il Romeo, n.d.r.).
Cuâi sono i tiei prossins impegns?
A Setembar al ven fûr il gno ultin libri di barzaletis: al à la presentazion di pre Toni Beline, che al mi à fat inmò un grant regâl. Lu vevi cognossût cuant che mi à fat la prefazion dal gno prin libri tal 1998: jo lu vevi fat par cjargnel, che dopo lui mal à coret par furlan e lu vin voltât par talian in maniere che a rivedin a leilu ancje a Tumieç! Po a Nadâl o varai di regjistrâ il tierç Cd cun Ferruccio Ceschia de Promodisc di Tarcint che al à regjistrât ancje i miei prins lavôrs. Ma intant, come ogni Istât, o soi ator par dutis lis sagris jù in Friûl.
Ise vere che il comic al à une vene di malinconie dentri?
Ti disarai che jo ogni tant o ai moments di smariment. L’ultin al è stât cuant che al è mancjât pre Toni. Cuant che o jeri jù di cuarde i telefonavi “Pre Toni, vuê no va, e je une zornadate: o ai di cjamâ lis batariis” e lui mi rispuindeve “Passe!” e o stevi mieze ore cun lui, sentât dongje di chê stuie che al veve. Li mi bombardave di peraulis e jo al jere come se o fasès il plen. Cumò però che nol è plui cetant che mi mancje.