Il balon, grant amôr dai cjargnei, e l’an “stramp” dal lôr campionât

Chê che si è a pene sierade e je stade la edizion sessantesime cuinte dal campionât cjargnel di balon, il “Carnic” cemût che ducj lu clamin. Un moviment incredibil di int, di zuiadôrs, di alenadôr, dirigjents e tifôs che in part a àn fate ancje la storie de stesse tiere di Cjargne. Un câs unic a nivel talian pal fat che si zuie di Istât, cuant che invezit in dut il rest de penisule i campionâts a vegnin organizâts dal Autun ae Primevere. Un ambient che cul passâ dai agns al è rivât tra l’altri a otignî un obietîf che mai la politiche e je rivade a puartâ a cjase, ven a stâi la convivence di dute la int de mont sot il stes cjapiel, no dome chê de Cjargne ma ancje chê de Valcjanâl, dal Cjanâl dal Fier, adiriture chê dal Glemonàs e di dîs agns a cheste bande fintremai chê dal Cjadovri.
IL RICLAM DAL MONT… IN MONT
Pûr cuntun nivel tecnic di competizion paragonabil a une tierce categorie regjonâl, a son stâts, a son e a saran (si spere) tancj i zuiadôrs che no àn resistût al riclam di chest mont. Ogni domenie, ma ancje vie pe setemane cui alenaments, e par dute la stagjon, e je int che e rive su in pratiche di dut il Friûl. Si cjatin ben, si divertissin e po dopo, vuelistu meti zuiâ cul cjalt e no tal pantan dal Invier furlan?
Il “Carnico” al è particolâr ancje pal riclam mediatic che si puarte daûr: in gracie de trasmission radiofoniche “A tutto Carnico”, ideade tal lontan 1991 di Renato Damian e dal 1993 trasmetude di Radio Studio Nord, ducj si sintin un tic come in Serie A. Radiocronichis in direte, intervistis a fin partide, pagjelis sui gjornâi, discussions e marcjât vie pe setemane su internet e sui social network. Nol mancje propit nuie. Anzit, sì. Si sin dismenteâts de muse brute de medaie. Che chest an forsit plui di altris agns e à pesât un grum. O fevelìn dai episodis fastidiôs che a àn cjatât spazi te croniche dai mês passats. Un tentatîf di cjavonade, plui o mancul riessût o volût, no si è mai capît, di un zuiadôr viers l’arbitri; un at ossen di un altri zuiadôrs viers il public; un pâr di discussions animadis fûr dal cjamp…Dal sigûr no un biel viodi, soredut par chei che di difûr, magari turiscj, si fermin la domenie a viodi un bocon di partide.

I EPISODIS DI CHEST AN? UNE VOLTE AL JERE PIÊS
Cence volêur dâ justificazions di sorte – al mancjarès! -, a son episodis che a sucedin in dute Italie tal mont dal balon e che a van dal dut condanâts cence se e cence ma. Al tocje dî, dut câs, che une volte il Carnico, par amission stesse dai protagoniscj, al jere tant plui violent e barufant. Sintint ciertis contis, si fevelave di pugns, scufiots e cualchi volte e finive ancje a clapadis.
In fin dai fats, si pues meti in archivi une stagjon che dal pont di viste sportîf, che e je la robe plui impuartante, e à viodût a vinci il Cjavaç cuntune supremazie cence paragons (Campionât, Cope, Supercope e titul di cjâf canonîr) e che di un pont di viste sociâl no je stade plui o mancul animose di chês precedentis. Anzit, intant des premiazions di fin stagjon e je stade fintremai une declarazion di matrimoni di un portîr ae sô biele.
A son altris lis cuistions forsit plui urgjentis: il dispopolament e la basse natalitât dai paîs de mont al scurtarà simpri di plui il vivâr. A cjadene, duncje, lis scuadris a dovaran par fuarce fondisi par no sbassâ ancjemò il nivel tecnic; trops dirigjents po dopo continuarano a metisi a disposizion des societâts? Domandis che la Federazion e varà di fâsi al plui prest, prime che il zugatul si rompi, prime che un toc di anime indispensabile de Cjargne e ledi a murî… ❚
David Zanirato