Sfuei Mensîl Furlan Indipendent
Archivi de Patrie

Un libri nus jude a tornâ a pensâ al “Model Friûl” e a un sium che al covente ancjemò

............

L’impuartant libri “Caro modello Friuli, Economia, Lavoro – Imprese e Credito dopo la crisi 2008 -2014” dal economist Fulvio Mattioni, al è stât volût a fuart de CISL di Udin che, di agns, si impegne par lâ di là dai stereotips, vint miôr cognossi la vere nature e la entitât de sfide in at par condividint la puartade e frontâle in maniere adeguade, cussì come che si à fat intal post taramot dal ’76. La sfide, tant che chê volte, no je conzunturâl ma di sisteme, di model, di prefigurazion dal futûr.
VÊ UN SIUM
Di masse timp intal nestri Friûl al mancje un sium coletîf. Un sium tant che chel che al à prodot il “Model Friûl”, bon di creâ procès fantastics inte economie, intal lavôr, intes comunitâts e intes identitâts. Atenzion: fantastics, no fantasiôs. E tant reâi di jessi ricognossûts e preseâts in Italie e intal mont. Intai ultins 25 agns si à vût miôr, invezit, cori daûr ciertis ilusions tant che, par esempli, chê di une economie dute terziari e dute “new”, trascurant la economie reâl.
Si à pensât di rotamâ il setôr industriâl, di podê fâ di mancul di piçulis impresis, dai imprenditôrs e dai zovins. L’opuest dal Model Friûl, insume.
Bisugne bandonâ cun urgjence lis ilusions e al va cjatât fûr un gnûf sium coletîf bon di tornâ a dâi un fin ae nestre autonomie, e va furnide une identitât ricognossibile e spindibile ai risultâts dal lavôr nostran e al teritori, a van costruidis prospetivis pai zovins, cussì come che al à scrit ben il sociolic Bruno Tellia intal saç introdutîf al libri.
UN PIL IN SOFERENCE
Il libri al aprofondìs i aspiets leâts ae capacitât evolutive de economie locâl, fermantsi su la minôr capacitât di produsi redit. Il prodot interni sporc regjonâl, di fat, al è calât dal 12% intai ultins 7 agns. Si individuin inte sotvalutazion culturâl e politiche dal setôr industriâl, di une bande, e inte assence di une politiche industriâl, di chê altre, lis causis principâls de crisi in at: il trafic in esportazion al è calât dal 20%, a son caladis lis presincis turistichis e a son stadis pierdudis plui di 1200 impresis di manifaturis.
Si augurisi un pat strategjic tra gnove politiche industriâl regjonâl e sisteme finanziari locâl pe poie dai invistiments e pe difusion dai servizis finanziaris intes impresis piçulis e mediis, cemût che e pretint la politiche comunitarie.
A PAIN I ZOVINS
Il libri si ferme sui temis dal lavôr e de apartheid dai zovins. A paiâ la crisi a son soredut i zovins, tra i 15 e i 34 agns, cuntun câl di un tierç di chei cjapâts a vore in Friûl Vignesie Julie.
Al riclame lis consecuencis de disocupazion zovine di masse (4 voltis superiôr a chê medie), o sedi il pericul di une mancjade inclusion sociâl.
Al evidenzie la esplosion dai lavoradôrs sospindûts e cuvierts in maniere temporanie dai amortizadôrs sociâi ma a pericul fuart di espulsion dal marcjât dal lavôr. L’insiemi di disocupâts, avilîts e sospindûts, al à passadis lis 100 mil unitâts cuntun tas di disocupazion “slargjât” dal 16%.
Al dîs di une situazion che e à di stimolâ la creazion di aleancis sociâls interessadis a concentrâ lis risorsis disponibilis su la economie reâl, su lis impresis e sui lavoradôrs. E che e à di progjetâ un marcjât dal lavôr dulà che al sedi spazi pai zovins!
Il libri dal economist Mattioni al analize la prestazion economiche e di lavôr dal marcjât de nestre Regjon cence, però, lâ daûr ae rassegnazion e, anzit, al stimole a racuei e a vinci une sfide enorme: fâ i conts cu la realtât dal vuê, impegnant dutis lis energjiis par costruî un futûr miôr. Par fâ chest al covente tornâ a jessi un Friûl industriôs, competitîf e vitâl, bon di rinovament e di ricondusi a nivei sostignibii la burocrazie regjonâl ipertrofiche.
Insume, un Friûl che al sedi di gnûf sburt pal disvilup di dute la regjon e oportunitât pai zovins: un gnûf, ricjatât e rinovât “Model Friûl”. ❚
Roberto Muradore, Segretari Gjenerâl CISL di Udin

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +