Il balon di aur di Aitana Bonmatí e la Europe travanade di tensions

Chê des ultimis setemanis e je une Europe travanade di tensions. No son dome lis preocupazions e salacor lis contradizions che a divegnin dal lâ dilunc dai conflits in Ucraine e in Palestine, là che la situazion e je simpri plui grivie e penze e nol somee che e sedi in stât di lâ in miôr. A son ancjemò altris cuistions viertis che ancje là che a mostrin une muse positive a palesin in chel istès problemis e contrascj concrets o almancul potenziâi.
◆ Une di chês e je par sigûr chê de formazion dal gnûf guvier dal Ream di Spagne. La lungje tratative tra il leader socialist spagnûl Pedro Sánchez e i rapresentants dai partîts autonomiscj e indipendentiscj che a son espression des nazionalitâts storichis di Catalogne, Paîs Basc e Galizie si à sierade cuntun acuardi che al conferme il numar un dal PSOE intal palaç de Moncloa. Ancje il gnûf esecutîf al sarà di minorance, al sarà componût dai socialiscj e de coalizion di çampe Sumar e al varà la poie parlamentâr de rapresentance di chê che le clamin “Spagne periferiche”.
◆ Dopo dal prin acuardi cjatât pe elezion tant che presidente dal Congrès dai Deputâts de socialiste maiorchine, Francina Armengol, chê stesse maiorance si è dade dongje ancje par inviâ l’esecutîf. La “no oposizion” des fuarcis nazionalitariis e regjonalistis e je il risultât de acetazion de bande dal PSOE e di Sumar des rivendicazions in cont des competencis politichis e fiscâls des autonomiis teritoriâls e soredut a pro de amnistie pai indipendentiscj catalans implicâts intal referendum dal 1n di Otubar dal 2017, che e zovarà ancje a passe setante polizais, e di une gnove consultazion pe autodeterminazion. La propueste di leç pe amnistie e je za stade fate indenant e depositade, cundut che il so iter al sarà lunc, intant che chê di un gnûf referendum e je par sigûr la cuistion plui complicade.
◆ Par intant la partence dal gnûf esecutîf e je stade saludade – si fâs par mût di dî – di une schirie di iniziativis e manifestazions inmaneadis des oposizions de diestre nazionaliste dal Partido Popular, di Vox e di ce che al reste dai Ciutadanos, in place «cuintri di chei che a dividin la Spagne». La clime – tra fanatisim nazionalist e eversion – e somee un tic masse a chê di Capitol Hill in Americhe ai 6 di Zenâr dal 2021, massime dopo che vinars ai 17 di Novembar la Asociación de Militares Españoles (AME), che e ten dongje militârs in congjêt des diviersis fuarcis armadis, e à dât fûr un document dulà che si domande al esercit di jessi atîf a pro de «destituzion dal president Pedro Sánchez».
◆ La ande e je sù par jù compagne ancje a Varsavie, dulà che il president de Polonie Andrzej Duda, esponent dal partît di diestre Prawo i Sprawiedliwość (PiS), intune interviste saltade fûr ai 20 di Novembar stâts sul setemanâl Sieci, avonde dongje de sô aree politiche, al à palesât la sô oposizion viers de gnove maiorance parlamentâr di centri-centriçampe cun democristians, liberâi, socialiscj e verts, che e je saltade fûr dopo des elezions politichis dai 15 di Otubar.
◆ Però a son ancje buinis gnovis. Par esempli e je chê de atribuzion dal balon di aur feminin ae zuiadore catalane Aitana Bonmatí, che cuant che e à ritirât il premi a Parîs e à fat un discors un pôc par francês, un pôc par inglês, un pôc par spagnûl e un pôc ancje inte sô lenghe proprie. Tal Stât spagnûl a son stâts chei che a àn preseât e chei che si son sustâts pes sôs peraulis par catalan. La zuiadore dal Barcelona no si à scomponude e anzit, intune interviste, e à tornât a marcâ che il catalan al è la sô lenghe e che al è so dirit «doprâle e domandâ che e sedi ricognossude a nivel european». Tra cetantis tensions, un messaç di sperance e cun sintiment. ❚