I LIBRIS SIMPRI BOGNS. Di là de rêt al timp dai manicomis

Iolanda Mazzon, Di là de rêt, Pasian di Prât, 2005
«E il timp nol passave mai. A voltis e jere cussì stufe che i vignive voie di urlâ, ma e stave ben cidine par pôre che le sintìs la infermiere e dopo le metès tal repart des furiosis. I someave che lis speris dal orloi a fossin fermis, che no levin mai indevant, e par provâ se al coreve, e meteve l’orloi dongje de orele par sintî miôr».
E je la storie di une pierdinte, contade in chest romanç curt (112 paginis) editât pe prime volte intal 1972 e ripublicât par cure de Societât filologjiche furlane e dal Osservatori regjonâl de lenghe e de culture furlanis cu la grafie normalizade.
La peraule “manicomi” no si cjatile mai, ma al è evident che di chest si trate. Il disasi mentâl al jere viodût tant che une colpe o parfin un mieç par deliberâsi di un parint che al dave fastidi, magari par cuistions di ereditât o di cunfins. No par nuie la storie e je ambientade intal gurizan, prime de leç 180 dal 1978,
che e à cjapât il non di Franco Basaglia, il psichiatre che al à vierts i manicomis.
La protagoniste, Tranquila, e à vude une brute infanzie: bandonade dal pari, la mari muarte zovine, sfolade a Turin in timp de prime vuere, dome la none Ursule i à volût un pôc di ben. Lis cusinis, i compagns di scuele e parfin i grancj le cjolin vie, parcè che e je imbranade, simpri fûr di puest, inadate, e à pôre di dut, no sa rimpinâsi sui arbui, e crôt che Sant Nicolau i puartarà almancul cualchi siop. Di grande, i siei siums a son vencui che le lassin scaturide e cence flât cuant che si dismôf. E nissun le capìs, cumò che la none no je plui. Dome Daniza, une femine slovene, ancjemò plui disgraciade di jê, e sa scoltâle.
La rêt dal titul e je chê reâl de cjase di cure che le siere dentri sul imprin de storie, ma ancje chê metaforiche che par dute la vite i gjave la pussibilitât di meti adun un progjet pal so avignî, magari cun Pepi, chel scuasi cusin che i plaseve tant e che e veve discorût con lui daspò che al jere tornât de Spagne e po de Russie.
Ma ancje lui al è destinât a finî mâl. Insumis, cuant che, finalmentri, cheste femine e rive a jessi di là de rêt, si cjate devant di une rêt ancjemò plui penze. E cuant che i rive chel fregul di fortune, al è masse tart. ❚
Laurin Zuan Nardin