I leams fra Friûl e Egjit: lis intuizions di pre Pressacco

I leams jenfri Aquilee e Alessandrie di Egjit a forin sul imprin intuîts di bonsignôr Guglielmo Biasutti, ma dome cun pre Gilberto Pressacco cheste ipotesi e fo rinfuarcide.
Cûr dai interès de sô ricercje e fo la difusion dal cristianisim in Aquilee e tal tierç volum de Opare Omnia, intune des ultimis intervistis sul argoment, Pressacco a proposit di une cunvigne che e jere a pene stade al disè: «E intindeve di dimostrâ che in cualchi pas dal Gnûf Testament e ancje dai paviments musîfs de citât si rivin a scuvierzi leams strents tra lis glesiis di Aquilee e chê di Alessandrie».
In chê ocasion, Pressacco al spiegà che «o vin cirût di tirâ fûr dut ce che si rivave de Letare ai Romans e de Letare a Timoteu di Sant Pauli. Il professôrs Douglas Campbell dal King’s College di Londre al à dimostrât che dentri dal an 50 a Aquilee al jere rivât a insegnâ un mestri judaic cristian de corint di Apollo, si no adiriture lui stes. E Apollo al è il grant opositôr di Pauli». Si sa po che Pauli al dîs di jessi rivât fintremai al Iliric. Te taule taronde conclusive di chê cunvigne su Aquilee e Alessandrie, al siere Pressacco te interviste, «o ai volût un confront diret fra i professôrs Luigi Moraldi e Campbell, dulà che al è saltât fûr che fermâsi al Iliric al voleve dî che no si podeve lâ te provincie di Aquilee, la Venetia et Istria, par vie che li a vevin bielzà plantade la Glesie i siei aversaris».
«Aquileia-Alessandria d’Egitto. Le radici comuni», a partî dai studis di Pressacco, al è stât ancje il titul di une cunvigne dal 2009 e i ats a son stâts publicâts de Forum edizioni. (A.L.) ❚