COGNONS DAL FRIÛL

Midiant de storie dai cognons furlans, si fâs ancje la storie dal nestri Friûl. Ve chi cualchidun di chei de nestre redazion, che o viodês lis firmis vie pal gjornâl.
(gjavâts fûr di «I cognomi del Friuli» di Enos Costantini e Giovanni Fantini ed. La Bassa/LithoStampa.
O ringraciìn i autôrs pe disponbilitât e pe colaborazion).
LANFRIT
Di un non di persone che al varès di jessi par talian Lanfredo, di clare divignince des Gjermaniis, documentât in Italie dal VIII secul (Lanfredus, Lanfridus) e che in documents langobarts si lu cjate ancje tant che Lamfrid (npl 752). Land-fried al pues volê dî “paîs di pâs” o miôr “pâs intal paîs”. Cognon origjinari de Plêf di Vît dulà che si lu cjate dal ’300 a Anduins, passât a Forgjarie (un Lanfrit di Pitas intal 1415 e un Urban di Pietro di Lanfrit intal 1504) e in altris bandis. A Pinçan, un Denel di Lanfrit intal 1450.
TOMADA
Al è il feminin di Tomât, variant dal non Tomâs. Ital 1360 Tomada filia Endici Polca de Moiimaco; intal 1567 Petrus q. Leonardi de Tomada de Usaccho. Dentri dal schedari Corgnali: 1481 mestri Domeni de la Tomade a Udin. Tomàde al jere ancje un mût di misurâ il vin li che il cuinç (unitât di misure di une volte, variabil sui 60-80 litris) si divideve in 48 bocâi impen di 64. Al è un cognon avonde difondût: Udin, Susans di Maian, Nimis, Tarcint, Cjampfuarmit (1581 Jacobus q. Antony Thomada de Villa Campiformy; 1588 Leonardo q. Josephi della Thomata; 1592 Dominicus q. Josepho della Tomada), Gjalarian di Listize, Martignà, Plain di Pagnà, e v. i.
A Glemone, intal 1644 Joannes Franciscus filius ser Thoma dilla Thomada.
STOLFO, STOLF, STOLFA
Al à di lidrîs il non di persone di divignince des Gjermaniis di Astòlfo, puartât in Italie dai Langobarts. Però intal 1420 a Clavais al jere un Cristoforo det Stolfo (Gortani, 1898). Intal 1343 Stolffus de Fana. A Udin intal 1425 ancje Tolf. Dentri dal schedari Corgnali: 1341 Stolfo de Coloreto; 1366 Leon.do Stolfi de Utino; 1415 Petro q. Stolfi a Tarcento; 1485 Francisco q. Vignuti Stolfi de Aviano; 1491 Joh. Stolfi de Topo.
La forme Stolf si cjate a Pordenon (1613 Zuan de Stolf) e a Sant Vît dal Tiliment; Stolfa a Monfalcon e Gurize; Stolfo a Cjarlins, Nimis, Chions, Daçan, Pordenon. ❚