Sfuei Mensîl Furlan Indipendent
Archivi de Patrie

La ereditât di Aquilee e je la capacitât di integrazion di culturis diferentis

............

«La Europe e à centatis e intrigosis disfidis devant di se, che e à dibisugne di grampâsi a dut ce che i pues coventâ par tornâ a dissegnâ un costrut di convivence. Di Aquilee e de sô storie si pues cjapâ sù a plenis mans».
Il president de Fondazion Aquilee, l’ambassadôr Antonio Zanardi Landi, al met adun cussì i motîfs che a fasin di Aquilee il puest plui naturâl dulà fâ svilupâ iniziativis come chê di puartâ chenti i reperts dal Museu dal Bardo di Tunisi, segnâts dal maçalizi dai teroriscj, o ben chei che a rivaran a Jugn di Teheran, olme di chê culture persiane sflandorose che e jere grande prime che Rome e nassès.
rapuarts che a vegnin di lontan: «Tal museu di Aquilee – al ricuarde Zanardi Landi – e je la statue di chel african che al è muart achì, ma  al pant la sô grande voie di tornâ a cjase, si ben che al ves cjatât un bon acet e un biel stâ».  E cheste je dome une des storiis, par vie che «dut tal museu paleocristian, insiemi ae stesse citât, al è la testemoneance vivente dai africans, dai balcanics e ancjemò di cetantis altris gjernaziis che si son dadis adun chenti».
Duncje, cu la mostre dal Bardo – in trê mês si son moltiplicâts par 9 i solits visitadôrs dal Museu, rivant a passe 14 mil di lôr – Aquilee e à davuelt un rûl in sintonie cu la sô storie e culturalmentri strategjic: meti ae puartade di man de Europe interie la pussibilitât di viodi e di cognossi di dongje la art dal ôr mediterani de Afriche. «Al jere un grant interès su chel mont par vie dai atentâts a Tunisi, e Aquilee e à contribuît a fâ cognossi la culture maraveose di chê tiere».
cumò i tocje al iran che cun Zenâr al è tornât tal mieç dai discors dal mont par vie de fin dal embarc. «Po ben, ancje in chest câs l’interès al è grandonon», al dîs Zanardi Landi che al cor sù e jù di Teheran par meti adun la mostre. Dal sigûr l’ambassadôr al à un repert che i plâs: «Al è un basament cun parsore trê leons in bronç che si corin daûr un cun chel altri. Une opare dal VIII secul prin di Crist, di straordenarie elegance». Une opare cussì «no pues no fâ rifleti sul nivel culturâl dal popul che le à produsude».
in sumis, tal puart di aquilee no rivavin dome marcjanziis, ma lis personis e lis ideis. «La sô grande ereditât e je la capacitât di integrazion di culturis diferentis, che al è il probleme centrâl de Europe di vuê», al considere Zanardi Landi. E al va indevant: «Chest concet no si pues dome dîlu, bisugne fâlu vivi, di mût che la fuarce comunicative e evocative e deventi cent voltis plui fuarte. Lis mostris stadis e chês che a vignaran a van in cheste direzion», al siere. ❚
✒ Antonella Lanfrit

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +