Sfuei Mensîl Furlan Indipendent
Archivi de Patrie

I Langobarts che a fasin cressi… Romans

Sara Traunero

Par un fin setemane la associazion Invicti lupi e inmanee la plui grande rievocazion des vicendis dai fîs di Alboin

Ai 9, 10 e 11 di Jugn si fasarà a Romans dal Lusinç la edizion numar undis de rievocazion storiche “Romans Langobardorum”.
◆ Al è l’event principâl celebrât intal Comun, e ancje la rievocazion storiche langobarde plui grande su dut il teritori talian: si trate di une ricostruzion fedêl di ducj i aspiets carateristics de vite sul teritori furlan in epoche langobarde.
L’event, che l’an passât al à tirât dongje ben siet mil personis e che al è in disvilup costant, al è organizât dai volontaris de associazion storiche “Invicti Lupi” vuidade dal president Matteo Grudina, che ogni an si impegnin a curâ in maniere meticolose ogni detai, sedi dal pont di viste logjistic che di chel senografic.
◆ Nol è stât dal sigûr un câs individuâ Romans dal Lusinç tant che lûc de rievocazion: chest Comun al è di fat stât fondât propit dai langobarts, e al è caraterizât de presince di une des necropolis langobardis plui grandis di Italie, scuvierte intal 1986 intant che a sgjavavin par fâ l’acuedot locâl.
“Romans Langobardorum” si propon di puartâ ae lûs carateristichis, costums e tradizions dal popul langobart, cu la realizazion di une grande aree plene di atrazions e di intratigniments di diviers gjenar: costruzions, incjampaments, ativitâts di “living history” gjestidis di vincj grups di rievocadôrs storics (che a saran ben 350 in dut) che a vegnin di diviersis regjons di Italie, e ancje de Europe (Austrie, Bulgarie, Cravuazie, Gjermanie, Republiche Ceche, Republiche Slovache, Slovenie, Spagne, Ongjarie). A rapresentaran ducj i popui che si podevin cjatâ in Friûl in epoche langobarde.
◆ Dentri di cheste aree, i partecipants a podaran imerzisi a 360 grâts inte atmosfere autentiche di un vilaç langobart, osservant e partecipant in maniere ative aes tantis iniziativis proponudis e vuidadis dai rievocadôrs storics, che no si limitaran a sfilâ tant che figurants, ma che a intratignaran la int ancje cun dimostrazions, spiegazions detaiadis e coinvolziment diret.
Si trate duncje di une manifestazion che no vûl jessi dome spetacolâr e di sempliç intratigniment, ma che e intint ancje e soredut trasmeti cognossincis storichis veris, distinguintsi cussì pes sôs finalitâts divulgativis e didatichis: grande part de rievocazion e je basade di fat sul insegnament.
◆ L’event al tacarà la sere di vinars ai 9 di Jugn cun ativitâts par fantats e par fameis, tant che par esempli laboratoris di ricicli.
Cun sabide a buinore, a tacaran invezit i tancj events storics, fulcri de rievocazion.
Ogni an “Romans Langobardorum” si fâs ator di une tematiche particolâr: il teme centrâl dal 2023 al sarà “l’artesanât dai dius”, che al vignarà aprofondît cun cualchi dimostrazion di lavorazion dal len (sculture), dal bronç e dal fier (ativitâts de farie), e de lane: e sarà une ocasion par valorizâ e par riscuvierzi i mistîrs antîcs, part ad in plen e preziose de nestre culture, che magari cussì no cul passâ dal timp a van simpri plui pierdintsi.
Cun di plui, a vignaran riproponûts pal secont an consecutîf i zûcs tribâi langobarts, che a rapresentaran une riscuvierte inmagante dai zûcs tradizionâi, cul obietîf di fâ divertî ma ancje di incoragjâ i fantats a tornâ a svicinâsi ai vecjos zûcs dal nestri passât.


◆ A dut chest si zontaran tancj spazis par ativitâts di ogni gjenar, destinadis a dutis lis etâts: de mostre de ativitât dai falconîrs, cun esibizions didatichis par cure dai “Acrobati del Sole” di Cividât, ae aree dulà podê cognossi i animâi de “Piccola fattoria Cumugnai” di Aquilee, dal marcjât artesanâl al spazi dedicât aes mostris artistichis e fotografichis.
◆ A intratignî i presints a pensaran lis musichis nordichis folk dal grup “Ragnarók”, lis dimostrazions spetacolârs di alenament e bataiis dai soldâts langobarts, la gare di cusine “Cunvivium Langobardorum”. No mancjaran lis ativitâts sportivis, la aree ristôr une vore furnide e un spazi didatic pensât propit par fruts e fantats.
A vignaran ancje organizadis dôs conferencis che a laran a aprofondî cualchi tematiche storiche interessante: sabide aes 18.15 si tignarà la conference par cure dal ricercjadôr storic Leonardo Sernagiotto, dal titul “La vuere e il zûc. Simulazions belichis e adestrament militâr inte alte Ete di Mieç”. Domenie aes 19.30 e sarà invezit la conference dal ricercjadôr storic Walter Tomada dal titul “I fîs de Tiere. Di Alboin a nô”.
◆ Come ogni an, a vignaran proponudis dôs rivisitazions di caratar teatrâl che a ripuartin ae lûs rituâi de epoche langobarde: sabide aes 16.00 si fasarà la cerimonie di incoronazion dal re langobart Grimoalt, intant che domenie aes 20.30 si tignarà il rituâl funerari langobart cul recupar di une tombe de necropoli di Romans.
La rievocazion e sarà ancje la ocasion par presentâ doi gnûfs documentaris, prodots di “Invicti Lupi” e cu la regjie di Simon Vrech di Base2 Video Factory, intitulâts “La donna longobarda” (aprofondiment de figure de femine in epoche langobarde) e “La religione dei longobardi” (aprofondiment dal passaç dal paganisim langobart ae religjon catoliche), che a vignaran proietâts sabide aes 21.30.
◆ Al è impuartant infin rimarcâ che l’event al sarà organizât cun grande atenzion pal ambient si tratarà a ducj i efiets di une “ecofieste” che e furnirà cussì ancje un bon esempli di tutele dal ambient ai voi di ducj i partecipants.
“O soi tant sodisfat e gratificât dal fat che “Romans Langobardorum” al vedi vût une cressite esponenziâl dilunc des undis edizions seguitivis fatis fin cumò, che lis colaborazions e lis sinergjiis cun ents e volontaris a sedin cressudis, che il public al rivi simpri plui numerôs, che il non “Invicti Lupi” al sedi simpri plui cognossût e rispietât pe cualitât a nivel internazionâl. O ai crodût simpri une vore inte fuarce divulgative e intal impat culturâl che al pues ufrî il mont de rievocazion storiche, massime cuant che si lavore cun passion e dedizion su la storie dal nestri teritori”, al declare Matteo Grudina.
◆ “O soi convint in maniere ferme che, in graciis de rievocazion storiche, midiant di progjets inovatîfs e bogns di adatâsi al contest di cumò, o podìn miorâ lis cundizions culturâls e sociâls de popolazion. Di un pont di viste culturâl parcè che dome cognossint il nestri passât o podìn cirî di costruî un futûr miôr; di un pont di viste sociâl parcè che la culture e pues e e à di deventâ un strument di sostent, un strument che cun chel lis gjenerazions zovinis a puedin cjatâ une gnove forme di lavôr par restâ e par inricjî il nestri Teritori. Cun cheste vision, di un an a di chel altri o ai cressût lis ativitâts spietant lis ocasions favorevulis, la mê cressite cualitative e chê dal grup. Il gno obietîf al è che “Romans Langobardorum” al ledi indenant a miorâ e a disvilupâsi di un an a di chel altri, in mût di judâ la cressite dal nestri Teritori e des gnovis gjenerazions che prime o dopo a puartaran indenant, tal gno puest, cheste mission: l’obietîf al è lassâ il mont un pôc miôr di cemût che lu ai cjatât.”
◆ A vuê, la associazion “Invicti Lupi” e je daûr a progjetâ la costruzion di un museu tal viert, e li ricostruî un vêr vilaç langobart dal secul VI che al mostri cemût che al jere Romans tal timp che al vignì fondât dai langobarts. Al sarès il prin vilaç langobart esistent a nivel internazionâl, che traviers di chel si laressin a recuperâ lis tradizions artesanâls dal teritori e a cressaressin i spazis e lis oportunitâts par davuelzi lis gnovis iniziativis culturâls e sportivis.
◆ Chest progjet – in zonte ae iniziative dal Comun di Romans di recuperâ cualchi repert storic (che cumò al è a Cividât) e di esponilu intun gnove preparazion museâl – al puartarès il paîs a disvilupâ ancjemò di plui tant dal so potenziâl e a deventâ un pôl culturâl a ducj i efiets. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +