Cuant che cualchidun
al voleve distudâ la lûs dal Friûl
Si ere sul finî dal secul passât. A Pordenon e in provincie si viveve avonde ben, lavôr a ‘nd jere, no jerin malegraciis e si stave in pâs. Si sa, inte provincie a jerin (e a son) dôs comunitâts linguistichis autoctonis: la furlanofone e la venetofone. La prime insedade a Nord Est de provincie su doi tierçs dal teritori, la seconde a Sud Ovest su la part che e reste. Pordenon si ten venite ancje se in citât a son tancj i furlans e tancj i forescj par vie des casermis e dai uficis dal Stât. Dut câs si stave in pâs, no jerin grancj contrascj, plui che altri cualchi declarazion fate fûr dal vâs, par solit di Pordenon, in particolâr cuintri Udin (che magari cualchi reson e podeve vê) e – no ai mai capît parcè – di chê cuintri il Friûl intîr.
◆ In chei agns jo i leievi il Gazetin, mi capitave di lei ancje chel altri gjornâl, ma o tignivi la mê sielte. Su la cuistion, come che o ai scrit chi sore, nuie di grâf, cualchi mateç e vie. Invezit, une biele dì (biele par mût di dî), sul Gazetin di Pordenon (su lis distinzions des edizions o tornarai) al ven fûr un articul pesant e ofensîf par nô furlans. E al fo dome l’inizi, di li indenant un cressi di ofesis, dineaments, savoltaments de storie, de gjeografie, de realtât dal timp curint.
◆ Ce jerial sucedût, cuâl il cantin che ju veve scjadenâts? Il casus belli lu veve furnît, cence volêlu, un om che plui pacific di cussì no si cjate: il puar inzegnîr Melzi, in chê volte sorestant de Provincie di Udin. Ce vevial fat di tant grâf di scjadenâ scuasi une vuere? Po nuie di mâl, al veve dome dit che al sarès stade la ore di cjatâ la maniere di meti adun il Friûl storic! Cuistion, par altri, simpri atuâl, ancje ae lûs de volontât dai abitants dal Mandament di Puart, che a àn sielt di tornâ in Friûl a grande maiorance e che no puedin par vie di une leç malandrine.
◆ Un grup di nô (no masse par dî la veretât, che i furlans – no cate di ca o di là – a glotin dut) o vin cirût di ribati, di fâi cuintri, di sclarî i fats, di disvelâ bausiis e vie indenant. A nus ‘nd àn fatis di ducj i colôrs. La miôr e jere la mancjade publicazion des replichis e des retifichis, parcè che al sucedût ancje che lis publicassin cuant che aromai no si capive il sens dal intervent, che le mudassin par fânus someâ ignorants, che la ultime peraule e fos simpri la lôr. A mi mi son rivadis dôs letaris anonimis e adiriture une rafiche di ûfs tirâts cuintri la cjase, causantmi problemis in famee. A chest pont, cualchidun lu varà za pensât: parcè no passâ, no poiâsi a chel altri gjornâl? E volêso che no vessin provât!? E chi mi fermi par caritât de Patrie. ❚
