Lenghis, dirits e minorancis. Levrat (ONU) i tire lis orelis ae UE

Za timp indaûr o vevin marcât il fat che la Europe e someave simpri plui inviade su chê strade che le puarte a passâ dal jessi e dal volê jessi «unide inte diversitât» al jessi «unide» dome tal no fâ nuie a pro o tal fâi cuintri… ae diversitât stesse.
◆ Cheste ande si veve palesade in particolâr in azions specifichis – o azions mancjadis – de bande des istituzions de Union Europeane (UE) in cont di lenghis, dirits e minorancis. In cheste suaze si intivin in particolâr lis posizions cjapadis sù de bande de Comission Europeane (CE) cuintri dal disvilup concret des dôs Iniziativis dai citadins europeans (ICE, une sorte di propueste di leç europeane di iniziative popolâr) fatis indenant vie pai ultins agns cul intindiment di indotâ la UE di une sô normative di tutele des minorancis: chê cognossude cul non di “Minority Safepack”, che la sô storie e jere tacade ancjemò tal 2013, e chê plui resinte, che il so titul al è “Politiche di coesion a pro de avualance des regjons e de sostignibilitât des culturis regjonâls” e che e à cjatât la rispueste negative de bande de CE vie pe prime part dal 2025.
◆ Tal imprin di chest an, cheste situazion e à cjatât une gnove e impuartante conferme in chê che e je stade la azion di monitorament fate dal Relatôr speciâl de ONU pes cuistions che a tocjin lis minorancis, Nicolas Levrat. Dai 19 ai 28 di Zenâr stât, Levrat al à fat une lungje schirie di incuintris e di audizions a Bruxelles, intes sedis istituzionâls de UE, e ancje inaltrò, de citât di Lussemburc fintremai a Viene e a Budapest, cul intindiment di tirâ dongje informazions e documentazion par meti adun un studi specific di dimension planetarie che al vignarà presentât l’an che al ven in ocasion dal Consei ONU sui Dirits dal Om.
◆ Intant de sô visite europeane, Levrat si à cjatât cui rapresentants di organizazions no governativis tant che la Rêt Europeane pe Avualance des Lenghis (ELEN) e chei de Aleance Libare Europeane (ALE-EFA), il partît politic a nivel european che al ten dongje diviers partîts e moviments che a son espression di nazionalitâts e minorancis e che par chel a mostrin une atenzion specifiche propit bande dai dirits linguistics e de tutele.
◆ Tra lis cuistions che a son stadis sometudis a Levrat e jere la contradizion di fonde che e tocje la UE: di une bande i siei valôrs di fonde a son chei «de dignitât umane, de libertât, de democrazie, de avualance, dal Stât di dirit e da rispiet dai dirits dal om e in cheste suaze dai dirits des personis che a fasin part di minorancis», di chê altre la sô azion direte e chê dai siei Stâts membris no ur va daûr ma ur fâs fintremai cuintri. Altris argoments a tocjin la rapresentance politiche des minorancis stessis, a ducj i nivei istituzionâi e tal câs specific dal Comitât des Regjons, e l’impat negatîf des politichis de istruzion inte plui part dai Stâts che no calcolin par nuie – o che a calcolin masse pôc l’insegnament, l’aprendiment e l’ûs des lenghis minorizadis.
◆ Levrat al à cjapât sù cun atenzion lis osservazions e salacor lis lamentazions che a i son stadis fatis indenant. In spiete de redazion de sô relazion finâl che e vignarà presentade ai 7 di Març dal 2027, al à dât cont daurman de sô “mission” in ocasion di un incuintri cui gjornaliscj, a Bruxelles ai 28 di Zenâr. In chê ocasion, cundut dal ûs di un lengaç diplomatic, nol à mancjât di marcâ che inte UE ai dirits linguistics e ae tutele des minorancis no ur vegnin dadis chês garanziis concretis e justis che a coventaressin. In struc: la Europe e à di jessi plui Europe, pardabon. ❚