A Tumieç, Davâr, Vile di Verzegnis, Paulâr e Çurçuvint. Dai 4 di Novembar ai 18 di Dicembar
E torne in Cjargne, cu la sô edizion numar vincj, la rassegne musicâl “I Concierts di Sant Martin”, la manifestazion storiche tacade dal mestri compositôr di Paulâr Giovanni Canciani (1936 -2018) che cumò e continue graciis ae dedizion dai siei amîs e arlêfs. Partant, la associazion culturâl “Gli Amici della Mozartina” – a non des dôs cjasis museu de Val di Incjaroi fondadis dal mestri de Cjargne, che a conservin il miôr de storie dai struments musicâi a tast, ma no dome –, e à inmaneât la gnove edizion che si davuelzarà dai 5 di Novembar fin ai 18 di Dicembar tra Tumieç, Davâr, Vile di Verzegnis, Paulâr e Çurçuvint.
◆ A son dodis i apontaments tra concierts cun côr e orchestre, insiemis musicâi, dal duet al sestet, e soliscj; e no mancjin altris iniziativis no dome musicâls, ma culturâls, in rêt cun altris realtâts associativis de Cjargne.
Lûcs privilegjâts i domos, lis glesiis, i museus, i teatris e i centris espositîfs, inte voie di tignî dongje la int tal non di un Sant, Martin, cetant celebrât inte mont cjargnele, che di fat diviers lûcs sacris a puartin il so non.
◆ La scree de vincjesime edizion, come di tradizion, e sarà tal domo di Sant Martin di Tumieç, li che – aes 20.30 di sabide ai 5 di Novembar – il Côr dal Friûl-Vignesie Julie, cu la Orchestre San Marco di Pordenon, a fasaran scoltâ, su struments antîcs, composizions di larc respîr di Johann Sebastian Bach e Georg Friedrich Haendel, daûr de bachete di Cristiano Dell’Oste e cu la presince dal famôs trombetist Gabriele Cassone.
◆ Joibe ai 10 di Novembar, aes 18.30 inte glesie di Sant Martin a Davâr, i arcs dal Friûl e dal Venit e fasaran scoltâ un program dal titul “La musiche in Friûl tra Baroc e Nûfcent” cun musichis dai furlans Cordans, Foraboschi, Marzona, Rizzi e Canciani.
◆ Vinars ai 18 di Novembar aes 20.30 tal Teatri Candoni di Tumieç e sarà ospite une formazion internazionâl di zovins di talent che a vegnin de Svuizare, riunîts tal Trio Chagall. Vincidôrs di concors di presi, a àn sunât di resint te Kammermusik di Berne, a Mito Settembre Musica di Milan e Turin, te Academie di Siene, a Parîs e in altris grandis placis de musiche culte di Europe. Un apontament di no pierdi.
◆ Sabide ai 26 di Novembar, aes 17 inte Plêf di Sant Martin di Vile di Verzegnis, pre Alessio Geretti al contarà dai miracui di Sant Martin, cun moments musicâi ae arpe di Serena Vizzutti.
◆ Domenie ai 27 di Novembar aes 17.30 tal Museu Cjargnel di Tumieç, al è ospit un altri duet internazionâl: la violonceliste Silvia Chiesa e il pianist Maurizio Baglini cuntun program dut romantic tra Mendelssohn, Schumann e Brahms, cun visite al Museu prime des esecuzions.
◆ Sabide ai 3 di Dicembar, aes 17.00 tal Domo di Tumieç, pre Geretti al sarà cul Ensemble di trombis dal F-VJ par fevelâ de “Glorie di Sant Martin” tra musichis di stamp baroc.
◆ Domenie ai 4 di Dicembar, aes 17.30 tal Auditorium des scuelis di Paulâr, il duet furlan cun Alex Sebastianutto al sax e Sebastiano Zorza ae armoniche, al sarà protagoniscj di un conciert vari dal titul “Ritrats: de classiche al latin american”.
◆ Miercus ai 7 di Dicembar, aes 20.45, al torne il spetacul di solidarietât cuintri lis puaretâts, inmaneât dal Lions Club di Tumieç insiemi cun diviersis associazions di volontariât. Al larà in sene “Rosada!”, il spetacul dal Teatri Stabil Furlan che tante fortune al à vût a Mittelfest. Dut il rigjâf al larà aes fameis de Cjargne che a son in dificoltât (par informazions: spettacolosolidale@gmail.com).
◆ Sabide ai 10 di Dicembar aes 20.30 tal Museu La Mozartina 2 a Paulâr, il tercet “I Amîs de Mozartine” al sunarà musichis di Mozart dentri di un discors dal titul “Conversazions su Mozart, di Salisburc a Paulâr”.
Relatôr Gabriele De Anna e musiciscj il violinist Matteo Macoratti, la violonceliste Jasna Noacco e il pianist Carlo Rizzi.
◆ Domenie ai 11 di Dicembar altri event cun ospits internazionâi. Il violinist di grande nomee Guido Rimonda al sarà cul ensemble Camerata Ducale, cul program “Uno Stradivari al cinema”, aes 20.30 tal Teatri Candoni di Tumieç, cun esecuzions dal miôr repertori di musiche di film, di “Tempi moderni” di Charlie Chaplin a “Notting Hill” di Charles Aznavour, passant par Morricone, Williams, Trovajoli e Piazzolla.
◆ Sabide ai 17 di Dicembar aes 20.30 tal Auditorium des Scuelis di Paulâr, il Corut e la Societât Filarmoniche Nassimbeni di Paulâr si metaran insiemi par un conciert speciâl tal non di Giovanni Canciani, cun sôs musichis e altris dal repertori bandistic di Vot e Nûfcent.
◆ Infin, Domenie ai 18 di Dicembar aes 17 a Çurçuvint, intal centri espositîf “G. Canciani” screât l’an passât, il pianist Sebastiano Mesaglio al presentarà il so ultin disc publicât par Stradivarius cun musichis di Clementi e Hummel, e dopo al vignarà mostrât il film documentari “Caro Maestro” dedicât al mestri compositôr de Cjargne e dal Friûl. Ducj i events, a part chel di solidarietât, a son a jentrade libare e gratuite. Dutis lis informazions su www.lamozartina.it. ❚
