A vinci une ricercje di doi fantats dal Stringher dedicade a “Lis peraulis de enogastronomie furlane”
Zovins e storie, il premi de Fondazione Friuli al va a doi students dal istitût Stringher e a un student dal Sello. Il premi “Fondazione Friuli Scuole”, rivât ae cuinte edizion, al è stât assegnât pe categorie “elaborât storic” a Matteo Di Benedetto e Fabrizio Giusto dal istitût Stringher e, pe categorie “lavôr artistic”, a Simone Galfano dal liceu Sello. La edizion 2022, inmaneade simpri in colaborazion cu la associazion Friuli Storia, e à vût tra i siei temis “Il Friûl tai secui e tal mont”: ai partecipants al jere stât domandât di studiâ la storie de regijon dentri dal contest internazionâl. Di Benedetto e Giusto a àn realizât une ricercje origjinâl sui prodots alimentârs locâls intitulade “De tiere al plat. Lis peraulis de enogastronomie furlane”: il lavôr al cjape in considerazion i ingredients principâi, dai cereâi ai liùms, aes cjars, lant a analizâ sedi la etimologjie dai nons in furlan che lis manieris che si doprin in cusine. Galfano al à invezit presentât un video che al rapresente un viaç tai lûcs simbul de regjon, dal fontanon di Goriude in val Racolane al sacrari di Redipulie, ai puescj dal taramot, fintremai ae stazion di Triest.
◆ La cerimonie di premiazion e je stade fate al cine Visionario di Udin cu la partecipazion dal president de Fondazione Giuseppe Morandini, l’assessôr Fabrizio Cigolot e il president de jurie Andrea Zannini de Universitât dal Friûl, moderâts dal diretôr dal Messaggero Veneto Paolo Mosanghini. «Chest concors – al à dit Morandini – al à une valence particolâr par vie che al intint coniugâ il studi dal passât dal nestri teritori cu lis gnovis tecnologjiis. Di fat, par frontâ la complessitât dal reâl o vin di meti dongje lis competencis umanistichis, e tal stes timp cognossi lis nestris lidrîs».
◆ «I students – al à spiegât Zannini – a àn interpretât il teme dal concors in maniere origjinâl, sotlineant i leams de storie dal Friûl e dai furlans cu la storie plui in gjenerâl, e dant une vore di atenzion ae storie viodude come trasmission di esperiencis jenfri gjenerazions». Chest an il concors al à vût ancje il coinvolziment des trê scuelis secondariis di prin grât di Udin: i students dal Bearzi a àn ideât dôs pagjinis Facebook dulà che a àn contât a vons e gjenitôrs un pâr dai events significatîfs dal Nûfcent. I students de Bellavitis a àn fat un video su lis puartadoris cjargnelis de prime vuere mondiâl e chei dal Ucellis a àn prontât un cuistionari indreçât a vons e gjenitôrs, par contâ cemût che e je cambiade la vite jenfri dôs gjenerazions. Viodûts i bogns risultâts, la Fondazione e sta valutant la oportunitât di dedicâ la prossime edizion aes scuelis mezanis, cuntun premi di pueste par lôr. ❚