I COLÔRS E LIS FORMIS DE STORIE: UN VIAÇ INTE ART DAL FRIÛL. Bortul e Ghite

Un lavôr impuartant e biel, bon di dâi sioretât al ingrès de glesie. Cheste e jere stade la domande dal Vescul di Bamberg che, vignint a celebrâ la dedicazion parochiâl, si jere racomandât che la comunitât di Bambergout si sfuarçàs di cjatâ il simbul plui perfet par rapresentâ la potence di Diu su la sente dal mont. I sorestants si jerin preocupâts di contentâ dal moment chel Vescul potent e lontan. Baldrì, marcjadant di pelicis, al veve sugjerît di rapresentâ une Madone biele tant che une dame todescje, une principesse sussiegade e braurose, involuçade intun mantel di armelin. Snider invezit, che al impuartave aur e arint dai teritoris de Sclavanie, al disè che no leve ben une pelice, ma une corone di aur tampiestade di pieris preziosis lusintis tant che il soreli, e une golaine di arint sflandorose come la lune. Il nodâr Ors invezit, om di leç e di dirit, al disè che al sarès parût bon che la int, cjalant la imagjin de lunete, e tignìs simpri presint che la fede e cjate la sô fonde su la leç, e che duncje Marie e veve di jessi rapresentade tant che une Virgo sapiens. Biel, duncje, al sarès stât che il pitôr i ves metût in man un libri, e biel grant.
Il dibatit si slargjave e plui di cualchidun lu stiçave a bon pro dal so partît. Lis ideis a jerin tantis. E cun di plui si metevin ancje lis feminis dai sorestants, che par vanitât a pretindevin di jessi dopradis tant che model par ispirâ l’artist: ma ducj a pensavin, ancje cence vê il coraç di pandi il lôr pinsîr, che Melanie, la femine dal speziâr, cun dutis chês liris di gras e lis frapis inte panzone no varès parût bon a rapresentâ la Mari dal Signôr. E cussì nancje Viole, la fie dal Gastalt, con chei voi spirtâts che e veve, e un nason grant tant che un râf tal mieç de muse.
La dì de cerimonie si svicinave simpri di plui e la nêf e tacave un pôc ae volte a disfâsi, chê nêf blancje e glaçade che come ogni an e veve ben sepulît il paîs, striçant jenfri lis sôs mans fredis dut intor il bosc dal Vescul, come ancje lis minieris e lis malghis e i pascui e lis spicis des monts. Bambergout al jere in ferment. Inte taverne de Acuile nere si batevin sui bancs di len lis scomessis su cui che al varès vinçût. Il judiç o il miedi? Ce varessino viodût su chê lunete parsore de puarte de glesie: une Madone imperante, une severe, une che e contemple la glorie di Diu? Bortul, il pitôr, al jere disperât. Ogni volte che al preparave un stampon come che lu sugjerive cualchidun dai sorestants dal paîs, i vignivin i sgrisui: i sogjets a jerin orents, un plui brut di chel altri, e par tant che lui al metès dute la anime inte sô art, il risultât al jere simpri disgustôs. E lui nol varès mai plui volût che la sô man e fos ricuardade intai secui come chê di un disgraciât che al veve ruvinade la jentrade de glesie parochiâl! Almancul si consolave cu la sô Ghite, che e veve di pôc metût al mont il lôr picinin. Nassût cul respîr profumât de Vierte, sveât e pulît tant che un pipin, al veve une biele vôs par clamâ cuant che la fam lu tignive dismot ancje intal cûr de gnot. Ma la Ghite a dâi di tete al frutut e jere masse biele. E cussì, une sere Bortul le à piturade, sghiribiçant cul so lapis ros suntun sbrendul di cjarte chê sene miracolose: une mari che e nudrìs il so picinin.
La pôre dal paîs cuant che al rivà l’emissari dal Vescul, che al veve il compit di decidi cuâl sogjet doprâ pe lunete! Bortul al fo convocât cu la cartele des provis e cussì, vergognôs, al cjapà sù dut e lu puartà devant di chel sioron vignût di Bamberg a pueste par decidi. Dopo vê cjalât cjarte par cjarte, ae fin i siei voi si iluminarin: «Velu chi – al disè – il simbul perfet de Vergjine Marie: une mari, zovine e biele, che e da di tete a Jesù». A Bortul i vignì un colp! Cu la confusion nol vevial lassât dentri de cartele ancje il cuadri di Ghite cul frut?! ❚ (a.f.)