I CLASSICS. 9 – CUINTRISTORIE DAL FRIÛL La albe de nestre Patrie

La sgrife di Vignesie
Fintremai che i principâts feudâi da la alte Italie si jerin tignûts poiâts daprûf dai imperadôrs, Vignesie e veve scugnût contentâsi di svuatarâ tes sôs aghis e di traficâ par mâr cui bizantins e cun sarasins. Cun lôr e veve fat afarons, e jere deventade siore, e veve taponât di marmul e di mosaics di aur la fanghere de sô langune; ma no veve vût ni armis ni soldâts ni pratiche par pitufâsi cu la feramente dai esercits todescs. Ancje il patriarcjât nestri al jere stât sigûr di chê bande: juste su lis cuestis da la Istrie, indulà che ai bastiments di Vignesie ur leve ben di podêsi poiâ, e jere stade cualchi barufe e, dopo des barufis, cualchi pat. I patriarcjis talians, masse lontans e masse indafarâts in altris facendis, no vevin bacilât trop di tignî dure chê striche di tiere clapigne, cence risorsis par lôr, e a vevin lassât che Vignesie e poiàs la sgrife dal so leon parsore.
Ma dal Tresinte l’Imperi al jere in plene babilonie, il partît papalin si slargjave fin sot lis monts e i talians a cjapavin pît ogni dì di plui ancje des nestris bandis. Al jere il moment just par Vignesie di saltâ fûr dal so paltan e di meti la çate sul dûr. E començà cu lis tieris plui dongje, spietant cun pazience che i vignìs il dret di rivâ plui in ca.
Par fortune de Furlanie, dopo une file di patriarcjis che no varessin tignût dûr trop a lunc, a’ndi capitarin doi di chei dai comedons di fier: il francês Bertrant di Saint Geniès e il todesc Marcuart di Randeck. A forin i ultins doi umigns di ses che a vebin guviernât il Friûl. Bertrant al rivà chenti vieli di etât, ma no di spirt e, in vincj agns che al durà ancjemò, nol si cjapà un moment di padin (1). Al mostrâ chel stes calôr e chê stesse fuarce tal guvier spirituâl e temporâl dal patriarcjât: il pastorâl e la spade i stevin ben in man, cence diference. Cuintri Vignesie e cuintri l’imperadôr Luduì di Baviere, cuintri i siôrs de Scjale parons di Verone e i conts di Gurize e i duchis di Carinzie, cuintri ducj i prepotents difûr e di dentri si batè tant che un leon.
Al governà il Friûl come sovran indipendent, cjalant nome al interès de sô int; e cundut che al fo simpri dûr e salt te sô strade, dopo che i nemîs che lui al veve tantis voltis pestâts, a rivarin adore di sassinâlu sul plan de Richinvelde, i Furlans lu venerarin come un sant.
Marcuart di Randeck al jere cressût tai pastiçs de politiche ingredeose di Luduì di Baviere e di Carli IV di Lussemburc: al jere un om che la saveve lungje e che al veve navigât une vore tes aghis turbidis de diplomazie. Ancje lui al tignì duris lis brenis dal guvier, si mostrà risolût cuintri la furbarie dai aversaris, ma simpri rispietôs de autoritât dal Parlament furlan. Al fasè meti adun e al promulgà lis “Costituzions de Patrie dal Friûl” che a forin il nestri codiç fintremai ae vignude di Napoleon. Al induvinà lis intenzions di Vignesie e al fo un dai plui cjalts fautôrs di chê leghe cuintri di jê che, tra il 1378 e il 1381, e fasè plui di une volte disbassâ il cjâf ae Regjine dai Mârs. Cun cheste vuere al rivà adore di tornâ a cjapâ Triest e i antîcs dirits su la Istrie.
Ma si pues dî che e fo cheste la ultime sflameade de nestre indipendence. Vignesie no perdonà plui ai furlans lis sgnesulis cjapadis in chê vuere, e a pene muart il patriarcje Marcuart, profitantsi dai pastiçs nassûts par vie di Filip di Alençon (che i furlans no volerin vêlu come patriarcje comendatari) e par vie di Zuan di Moravie (che nol savè cjapâju pal lôr viers) e tacà a furducjâ sot vie, cuntune politiche paziente e sutile, par disponisi a meti il Friûl sot la sô dominazion, in maniere di no vê plui pôre di lui.
La fin dal Patriarcjât
Par une cuarantine di agns, la politiche di Vignesie – si scuen dîlu – e fo paziente e furbe. No ‘ndi voleve tropis a ocupâ il Friûl in chê volte de vuere disastrose pal patriarcje di Alençon (1381-1394) o sot il guvier di Zuan di Moravie (1388-1394) o in altris ocasions; ma une azion direte di Vignesie e varès dal sigûr dismots i scrupui di Rome e dal imperadôr e lis gjelosiis dai Visconts, dai Fiorentins, di Verone. Il Friûl al jere un dai unics stâts eclesiastics in Italie e un dai plui impuartants principâts feudâi: Rome e l’Imperi no lu varessin lassât restâ intes mans di Vignesie cussì pes matis. Si pues crodi che la Serenissime e vebi pensât di spietâ che il piruç madûr al colàs di bessôl, contentantsi di dâ, ogni tant, une scjassadine al piruçâr
I Savorgnans a forin la sô sgrife e i siei agjents intal patriarcjât; Udin al jere, si pues dî, intes mans dai Savorgnans in chei moments burascjôs, e al ubidì aes diretivis che a vignivin di chê bande, in chel mentri che altris comunitâts, come Cividât, Glemone, Tumieç, a mostrarin di capî plui ben la situazion e di volê passâ parsore di cualchi diference, tratantsi di salvâ l’indipendence dal Friûl.
Cussì a passarin i agns tra vueris di cjistielans e di Comunitâts pro o cuintri i patriarcjis e tra di lôr, indulà che lis risorsis de regjon, la fuarce, la pazience de int a forin straçadis; lis tavielis devastadis; i racolts lâts malementri; purtrop vilis o cjistiei brusâts; une vore di int muarte; ogni ricjece scomparide par man des masnadis di soldadats di venture che a corevin ca e là pe regjon. Vignesie e cirive simpri di vê un arbitrât fra i contindints par imponi condizions daûr i siei plans, e Udin cui Savorgnans i tignivin man. Cussì, plancut plancut, e faseve valê la sô autoritât e la sô volontât in dutis lis nestris facendis. A tignî turbidis lis aghis a judavin ancje i conts di Gurize e i Cararês di Padue.
Si rivà, tra balfueriis di ogni fate, fintremai al 1417. In chel moment la Glesie e jere dute sbregade par vie de Sisme ocidentâl: a jerin trê papis e nissun al capive cuâl che al jere chel just; il Concili di Costanze al jere indafarât a disgredeâ il glimuç e nol veve timp di abadâ a rognis di altri gjenar. Sigjismont di Lussemburc, re di Ongjarie, nol rivave adore di fâsi ricognossi imperadôr cuintri so fradi Vincislau e so cusin Jost, e al veve il so dafâ par vie di une rivolte religjose in Moravie. Patriarcje di Aquilee al jere Luduì di Teck nomenât dal re Sigjismont, ma no confermât ancjemò di nissun pape: al veve cirût altris dôs voltis di deventâ patriarcje e nol jere nancje predi. La sô politiche, cence direzion nete, cence inteligjence, cence risoluzion, e restà in sostance leade daprûf di Sigjismont, che nol veve timp ni mieç di sostignîlu avonde, imberdeât come che al jere in mil imbrois (2).
Vignesie e pensà che al fos rivât il moment bon par slungjâ la çate. Cu la scuse che il gnûf patriarcje al jere in leghe cun Sigjismont e Sigjismont al jere in vuere cun jê, e tacà l’invasion dal teritori patriarcjâl. No fo une imprese tant facile: i Furlans – Comunitâts e cjistielants – judâts a tratis dal cont di Ortemburc e da cualchi trop di Ongjarês, a tignirin dûr fintremai che ur vanzà flât. Il patriarcje, scjampât a cori daûr dal re par vê jutori, ju lassà tai pastiçs. Cussì tra la vierte e l’istât dal 1420, a un a un, cjistiei e paîs a scugnirin molâ. Ogni cjistielan e ogni Comunitât al tratà cun Vignesie par so cont: i cjistielans a domandarin il ricognossiment des lôr prerogativis, lis Comunitâts il mantigniment dai lôr statûts, il Parlament la conservazion dai siei dirits e regolaments. Vignesie e prometè dut, fasintsi paiâ grassis indenitâts di cui che nol voleve jessi sachizât dai siei soldâts.
Cui 3 di Otubar di chel an malandret, e colave la ultime resistence a Plêf di Cjadovri e la indipendence dal Friûl e finive, dopo vot secui e mieç di vite (578 – 1420). I Furlans, obleâts a pleâsi, salacor a pensavin che si tratàs di une burascje di passaç, come che a’ndi vevin provadis altris; invezit no cjatarin plui la fate di dreçâsi: Vignesie ju tignì sot par plui di trê secui e mieç, e dopo si derin di volte altris parons.