Sfuei Mensîl Furlan Indipendent
Archivi de Patrie

I CLASSICS – 7. SANT JACUM, LÀ CHE AL FINÌS IL MONT

............

I lûcs sants
Se la condizion naturâl dal om e je chê dal cjaminâ e par cjaminâ si scuen vê un o plui ponts di riferiment, nol è di maraveâsi se ducj i popui, di dutis lis religjons e culturis, a àn i lôr ponts di riferiment. Che a puedin jessi cronologjic o cosmologjic o peâts a un lûc precîs. O varìn cussì i timps sants o fiestis e i lûcs sants o santuaris.
Dal moment che il cjaminâ dal om al à plui metis pal fat che al à plui motivazions, o varìn fiestis e lûcs peâts ae culture, ae storie, ae musiche, ae archeologjie, ae memorie, ae afietivitât e vie indenant. No ai nissune pôre a dî che al pues deventâ »Santuari» un libri, un lûc, un fat, une esperience, une persone. Cu la stesse impuartance di un santuari religjôs, dal moment che al jude l’om intune sô dimension e dibisugne vitâl. No podìn continuâ a ripeti la falope e la violence de sacralizazion totâl e esclusive, là che a valin dome lis glesiis e i predis e lis funzions. Ancje une fabriche e pues deventâ un lûc sant, dal moment che mi permet di vuadagnâmi il pan par me e pai miei fîs, come che par vieri a jerin santuaris i cjamps, i prâts, lis stalis e i »lûcs» des monts.
Ma chi o feveli dal aspiet religjôs dal om e duncje dai santuaris religjôs. Jo o ai zirât pôc, ancje se chel pôc al è tant rispiet ae pluritât de int che no pues permetisi il lus di bandonâ vacje e vidiel e partî. O ai cirût alore di zirâ cu la fantasie, cu la leture, scoltant cun atenzion e curiositât chei che a àn stât ator pal globi.
Lassant stâ i pelegrinaçs dai musulmans a la Meche, vonde classics e cognossûts, a contin che la usance dal pelegrinaç e je cognossude tai popui di civiltât precolombiane de Americhe Latine, che a traviersin lis monts par centenârs e miârs di chilometris par rimpinâsi su lis spicis plui altis e sacris. Ancjemò di plui vie pe Asie, scune di grande civiltât e di religjositât profonde. Il Tibet al è dut un santuari parcè che la uniche concezion culturâl e je chê religjose e teocratiche. Di fat a fevelin di processions fatis tor ator di cualchi mont sante adiriture in zenoglon. Stesse robe pe Indie, cu lis sôs citâts santis, cui siei flums sants, cui pelegrinaçs viers la risultive dai flums stes, tai glaçârs imaculâts da la Himalaya.
La robe curiose di chescj pelegrinaçs nol è tant il lûc sant o »glesie», ma la sielte e la modalitât dal pelegrinaç. Il zirâ tor ator di une mont al è un fat clarementri religjôs, parcè che un dai ponts di fonde de religjon e je la vision circolâr o cicliche de vite, intindude come forme di perfezion e di assesi. Stes discors pal moviment assensionâl intindût come cirî la spice de mont o la risultive di un flum. La mont, metude in alt e cerclade di nûi, e je il lûc là che Diu al à la sô cjase. In plui e je metude in alt, vadì tal pont plui distant de tiere e plui dongje dal cîl. Ancje il cirî la risultive di un flum e à un significât assetic, parcè che la nassite mi riclame lis aghis primordiâls, vergjinis, che a scaturissin de profonditât de tiere.
Se si vûl purificâsi, no si va là che la aghe e je sporcjade des robis che l’om al bute vie e tant mancul inte fôs, là che l’incuinament al è al colm, ma te risultive, là che la claritât de aghe mi riclame la bielece origjinarie de creazion, chest mont incontaminât che al è in ogni religjon. No sai se al è par memorie di un ben vût e pierdût o come brame di un mont che al è dome tal nestri subcussient. O sai però che si va a cirî cheste vergjinitât, chest mont no comprometût, cheste inocence e armonie.
Ancje i nestris santuaris tradizionâi, cjalant ben, a àn cheste carateristiche. O che a son metûts insom di une mont o che a son fats sù dongje di une risultive o une aghe curint. O ancje, i plui prosaics, tal mieç dai cjamps. In ogni câs intun lûc »altri» rispiet ae prosaicitât dal vivi di ogni dì. Ma sigurementri si preferìs il pont o il lûc là che e partìs une esperience o une storie rispiet al pont là che e finìs.
Cheste leç teologjiche o psicologjiche e spieghe ancje il parcè de sielte dai trê lûcs sants de tradizion cristiane medievâl: Jerusalem, Rome e Sant Jacum di Galizie.
pre Antoni Beline
_______________________________________________
Cirint Sant Jacum ator pal Friûl
CJAMIN DI BURI (UD)
La gleseute rustiche e je al centri dal paîs e e ven za ricuardade intun document dal 1329, ma la costruzion e je dal XV secul. Si jentre passant di un atri cuviert e sierât a nord-ovest cuntun mûr frescjât. Sul colm de façade le glesie e à une bifore cjampanarie. Dentri e à une aule retangolâr cun travadure scuvierte e une abside cuadrade cun volte a crosere e velis costolonadis. Tal 1747 e je stade zontade la sagrestie. Sui mûrs si cjatin frescs di S. Zuan e il Pari Eterni forsit opare di Domenico Pighini, ma l’autôr plui innomenât al è Zuan Pauli Thanner che al à piturât i frescs cun Dotôrs de glesie, i simbui dai Evangjeliscj e i Ss. Bastian e Roc datâts 1532.

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +