CULTURE – E-MARILENGHE. Furlanication

Furlan lenghe «trendy»? Ae direzion www.furlanication.org si cjate il sît di un progjet indreçât a fâ de marilenghe un imprest cool, ehm… di «figos», o miôr… par bulos!. Cheste operazion, mitude in pîts un an e mieç indaûr di Viva Radio adun cu la Arlef e la Regjon e je pensade di pueste pe mularie. Cemût otignî chest risultât? Stramp ma vêr, declarant vuere a la invasion di anglicisims te lenghe curinte, pensant di provâ a sostituî tiermins come download, trailer, outing, gossip e v.i. cun curispuindints furlans, tantis voltis in clâf simpatiche (par esempli mountain bike che e devente «rimpinete»). Dut chest lavorant su la psicologjie dai fîs di chei de gjenerazion dai «Paninari» traviers trasmission radiofonichis e imprescj informatics che a son il pan di ogni dì pai zovins: internet, mp3 e sms. Tes pagjinis si puedin discjamâ i files audio des trasmissions, ven a stai piçulis lezionutis o quiz dulà che une preseabile vôs di un fantomatic professôr di divignince gjamaicane clamât Mister Mestri al ten banc fevelant par furlan cuntun acent inglês patoc; chest personaç nus mene ae scuvierte di manieris plui «nestris» par descrivi il mont contemporanei soflant vie il polvar di parsore di chê lenghe che no si vûl che e resti indaûr jessint fevelade dome dai vons. Insome, chest Furlanication e je stade une idee par sigûr divertente; la strade de dinamicitât dai mieçs misturade ae simpatie e a un fregul di autoironie e je rivade a tirâ la atenzion de mularie.
Pecjât però che il progjet al somearès lât strucj, in fats la sô ultime fase no je mai stade screade te version online (tal sît si lei che a varès dovût scomença tal zenâr dal 2009).
Une volte finidis lis trasmissions radiofionichis il sît al pararès jessi stât dismenteât. Chest al pues jessi un pecjât, vidût che l’unic video di une lezion di Furlanication presint tal portâl di Youtube di bessol al à vût su par jù 11.000 visitis, pûr jessint stât cjariât di un utent privât incolant l’audio di une sole lezion di Furlanication e no ripuartant nissune informazion sul progjet di origjin (joi!). La cure che e je stade mitude te realizazion di cheste piçule ma inovative opare e je di preseâ, un poc piês e risulte chê investide pe part online, che e risulte statiche e frede te ete dal Web 2.0, pecjât parcè che e je la uniche che e reste a disposizion dai utents jessint consultabile dapardut e a cualsisei ore.
Michele Calligaris