CULTURE. Musicarci tal segn de Zornade europeane de musiche

Al torne Musicarci, il concors musicâl viert ai zovins musiciscj de nestre regjon e inmaneât, in colaborazion cun Radio Onde Furlane, dal Circul Arci Sergio Finotto di Rude. Rivât ae sô cuarte edizion chest an si davuelzarâ ai 21 di Jugn, inte suaze de zornade europeane de musiche.
Par sclarî miôr lis modalitâts di partecipazion e par verificâ il stât di salût de basse a nivel di ferment culturâl e di ativitâts dai circui Arci o vin sintût Zorç Morsut, conseîr da sezion Arci di Rude.
Le scene musicâl da Basse a je une vore vivarose… ce si movial di chês bandis?
«Par chel che al rivuarde la Basse, il concors Musicarci nus à permetût di scuvierzi realtâts che a testemonein la voie di sunâ di bande di tancj zovins. Za tal «piçul» di Rude a son tancj grups musicâi e plui in gjenerâl de Basse a rivin tantis realtâts cognossudis te sene «alternative» furlane. Insumis, la vivarositât che o cjatìn tal nestri piçul comun le riscuintrìn ancje in buine part de Basse furlane».
Par trop che la Basse e vedi une bondance di grups e artiscj purtrop i locâi e lis ocasions par permeti a chestis realtâts di sbrocâ no son tantis, ce pensitu in propuesit?
«Magari cussì no o scuen cjapâ at che di tancj agns e je la tindince a fâ sunâ principalmentri lis cover band. Musicarci al va di chê altre bande: o vin voie di promovi lis ideis gnovis e origjinâls. Di fat il concors al à une formule ibride, parcè che in finâl si domande di sunâ une cover, ma chest al vuûl jessi dome un stimul pe creativitât dai musiciscj. Tai ultins timps o ai di dî che alc si è movût. Baste pensâ ai events proponûts di cualchi associazion locâl come par esempli i conciert li dal ex implant di tîr di Bagnarie o la Hostaria Civiltà Contadina di Dael».
Tu sês ancje un musicist intal grup Hamit che al à partecipât al Premi Friûl. Cemût viodistu la afinitât tra i musiciscj de Basse e la lenghe furlane?
«Tal câs dai Hamit o vin sielt il furlan parcè che si adate in maniere perfete al stît recitatîf des nestris cjançons. Il Premi Friûl par me al à il mert fondamentâl di vê dimostrât cemût che la lenghe furlane si adati ben par cualsisedi gjenar musicâl, dal metal al rap e no dome pai cjantautôrs.
Cheste manifestazion cussì impuartante e à tirât dongje tancj zovins musiciscj a la nestre lenghe».
Alore si din apontament a Rude ai 21 di Jugn cun Musicarci, dulà che daûr dal regolament a parteciparan grups cun etât disot dai 35 agns, cun tocs origjnâi e che a vignaran valutâts di une jurie formade di membris dal Circul Finotto, gjornaliscj di Onde Furlane e musiciscj locâi. Al grup vincidôr, oltri che al plasê e ae sodisfazion, un meretât premi in beçs (500,00 euros).
Let there be rock e buine zornade europeane de musiche a ducj!
Mojra Bearzot