Sfuei Mensîl Furlan Indipendent
Archivi de Patrie

I CLASSICS – 23. SANT JACUM, LÀ CHE AL FINÌS IL MONT

............

Cirìn il nestri lusorut
Il pelegrin al à dibisugne ancje de manteline e dal cjapiel. Par parâsi dal garbin che al sofle di ogni bande e des ploiis e dai burlaçs che ti petin intor cuant che salacor tu ti crodis plui sigûr.
Personalmentri o soi un che al patìs frêt. E il frêt no mi fâs dome stâ mâl fisichementri, ma mi gafe la anime cuntune smuarse mortâl. Mi bloche la circolazion e mi paralize il pinsîr. Mi visi che une volte o ai provât tant di chel frêt che o bramavi di lâ intun cjantonut come il gri, a murî.
Stesse robe cuant che il cîl al è neri come une bocje di lôf e a colp al ven taiât dai lamps che a saetin di une estremitât a chê altre. Po al tache a slavinâ e tu tu sês alì, cence difesis, cence ripâr.
Tancj slavins sun cheste nestre puare tiere! Tancj garbins, che ti inglaçavin il cuarp e soredut la anime! E ce pôcs ripârs par cheste int flagjelade dai oms e dai elements!
Prin di dut bisugne fâ il pussibil di no vê glaçade la anime insieme cul cuarp. Par che il calôr de anime al puedi sclipî o morestâ il frêt fisic e l’incontrari. Par chê unitât armoniche traanime e cuarp, tra progrès culturâl e progrès tecnologjic, tratrassendence e inmanence. Dal moment che cheste armonie e covente e no je mai sigure, ma e va concuistade di ogni gjenerazion e in ogni timp, bisugne recuperâ chê spiritualitât e chê sapience e interioritât che o vin scugnût trascurâ par vie dal ricat ossessionant des robis materiâls. Il progrès materiâl nol è un mâl ni un cjastìc di Diu. Mancjarès! Ancje Crist nus à insegnât a domandâ ogni dì il pan che nus covente, te plui largje acezion. Però nus à ancje dit che l’om nol vîf dome di pan.
Par chel i domandi a Sant Jacum che la manteline e il cjapiel de fede, de sperance e dal amôr nus riparin dai aiars edai slavins. Cuant che si à frêt, i rimiedis a son doi: metisi a cjaminâ, parcè che plui si sta fers e plui si à frêt, dal moment che il sanc al circole mancul; strenzisi un dongje dal altri, par scjaldâsi un cul altri come cuant che si jere in file dongje dal spolert o tal clip de stale.
Par parâsi dal frêt de anime, i furlans a àn metisi a cjaminâ, a movisi, a progjetâ, e chest al è il don de sperance. In plui a àn di scuvierzi o riscuvierzi il don de amicizie, dal stâ insieme, dal strenzisi cul leam de solidarietât, dal sclipîsi cun chel amôr che al somee un pôc distudât.
I pelegrins, tornant a cjase, a puartavin une cape cjapade su ad ôr de imensitât dal ocean. Come prove di vê tocjât il confin dal mont e come capare de eternitât. La tradizion de cape salacor e je di divignince paiane, colegade al mît di Venere che e salte fûr des ondis. Un segnâl stralusint di vite che, te concezion cristiane, e devente vite complete cul batisim e cu la gracie.
Mi plasarès regalâi al gno popul cussì strac e disamorât de vite, cussì rassegnât, il don de vitalitât, de vivarositât, la fuarce di no lassâsi somierzi des ondis dal mâr movimentât de vite, ma di rivâ simpri a saltâ fûr plui fuarts, plui temperâts, plui otimiscj. La nestre navigazion, cussì segnade, nus à segnade ancje la anime. Però la memorie di tantis sfidis vinçudis e varès di dânus cussience des tantis potenzialitâts che o vin dentri di nô. Se o vin rivât a tignî dûr cuant che verementri la barcje e jere sotsore, no vino di rivâ cumò, che i timps, par tancj aspiets, a son miôr? Il consumisim, la television, la confusion a saran un mâl, ma no si pues invidiâ i agns de miserie, des vueris, des profugancis, dai taramots. Naturalmentri, come cristian, no mi contenti di un popul spirtât tal lavorâ, tal traficâ, tal ingrumâ, se nol è spirtât ancje te anime e te inteligjence.
I furlans a àn cjaminât fin ai ultins confins dal mont. E cjaminât e scombatût fint tal ultin. A àn dirit duncje di presentâi al Signôr la cape de testemoneance e la capare de eternitât. E che nol mancji mai, in nissune part dal Friûl e in nissun moment de sô storie, la lûs de stele, un segnâl di vite e di sperance che al cjamine parsore di nô, nus segne la strade e nus inlumine la gnot. Come a Compostela. Diu al mande la stele in alt par fânus scuvierzi i tesaurs in bas. Come i rês magjos che a àn cjatât il Frut e Teodomîr che al à cjatade la tombe di Sant Jacum. Une fede che e inlumine la storie, un cîl che nus invoie a sgjavâ insot te nestre tiere par cjatâ culì i tancj tesaurs che Diu al à semenât. Cualchidun si lamente che sul cîl dal Friûl vuê a lusin pocjis stelis. I disarai che lis stelis no son come lis patatis, che a van a cuintâi, ma come lis rosis, che a van cjaladis e gjoldudis une par une. Bisugne però che ancje nô o imparìn a cjalâ il cîl, par scuvierzi la stele. Anzit o vin di imparâ a cjalâ tal cîl dal nestri cûr, là che Diu al preferìs fâ sintî la sô presince. Impussibil che Diu nus vedi cjastiâts in maniere cussì orende di no vênus lassât nancje un lusorut!
pre Antoni Beline

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +