Sfuei Mensîl Furlan Indipendent
Archivi de Patrie

CULTURE – ART-Â. Vile Gorgo, farie di talents artistics

............

Un gnûf spazi espositîf te campagne furlane, pront a dâ acet a un program siôr di iniziativis e progjets di formazion te art di vuê, cun mostris, residencis, laboratoris e cunvignis. Un program ambiziôs che al è partît ai 22 di Otubar te sietcentesche Vile Gorgo a Noiarêt de Tor, tal borc dal “Guado dell’Arciduca”, toponim che al ricuarde cuant che al jere stazion pal scambi dai cjavai tra i teritoris de Serenissime e chei imperiâi e che al da il non ancje ae associazion culturâl che e promôf il progjet “Painting detours”.
Prime tape, la mostre “Cence di te, cui saraio mai jo?” (cu lis oparis di Luca Bertolo, Francesco De Grandi, Maria Morganti e Marco Neri, ducj artiscj innomenâts a livel talian, cualchidun ancje tal forest), prontade te scudarie e in cualchi spazi privât de vile (vierte fin ai 6 di Dicembar, la sabide e la domenie des 10 di matine aes 5 e mieze dopomisdì), li che il proprietari, l’imprenditôr furlan Roberto Turello, al vîf cu la sô famee. Nol è di ducj investî te culture in dì di vuê, anzit. Duncje, la gnove iniziative e à di jessi saludade cun plasê, ancje parcè che il so fin al è chel di svicinâ ae art di vuê fûr dai spazis tradizionâi, ven a stâi museus e galariis, e di fâlu cu la piture, almancul sul imprin. A dî il vêr, la idee no je gnove. E jere propit chel che si proponevin i ideatôrs dal Spac, il Spazi public pe art contemporanie di Buri, nassût tal 2006 e ospitât te sîscentesche Vile di Toppo Florio. Chel che e diferenzie la propueste di Noiarêt de Tor al è il “workshop”, la residence di artist, che e tacarà in Avrîl e e durarà un mês: la prime in Italie dedicade aes pratichis pitorichis, un progjet pilote, duncje. A Vile Gorgo a rivaran di dute Italie dîs pitôrs – Riccardo Baruzzi, Thomas Braida, Silvia Chiarini, Sara Enrico, Pesce Khete, Ivan Malerba, Gionata Ozmo Gesi, Dario Pecoraro, Vito Stassi e Lucia Veronesi -, ducj sot dai 40 agns, selezionâts dal curadôr Andrea Bruciati, diretôr de Galarie comunâl di art contemporanie di Monfalcon e curadôr dal Premi Moroso pe art contemporanie 2010, e dai protagoniscj de mostre de inaugurazion, achì te vieste di tutor. Lis voris fatis sul puest a vignaran esponudis intune grande coletive.
A diferenziâ il progjet di Noiarêt de Tor e je ancje la volontât di svilupâ la formazion e la ricercje leâts ae mont de imprese, cuntun voli di rivuart pe architeture e pal design. Lis ativitâts intal gnûf spazi a vignaran coordenadis dal studi Atemporary, che sot la egjide di un comitât sientific, al à chê di promovi cunvignis, incuintris e dibatits su chescj cantins.
Vile Gorgo, duncje, tant che farie di talents artistics e lûc di incuintris. Pecjât che dome un dai artiscj coinvolzûts tes dôs mostris e tal laboratori, al sedi de regjon (Thomas Braida, di Monfalcon). A sintî Bruciati, in Friûl-Vignesie Julie, no ‘nd è pitôrs, sot dai cuarante agns, innomenâts in Italie. O miôr, “jo no ‘nt cognòs”. Sperìn alore che la gnove realtât di Noiarêt de Tor e rivi a incentivâ la propedeutiche ae art contemporanie, lant a jemplâ un vueit in cheste regjon, che, al marche ancje Bruciati, e à cetantis potenzialitâts. Magari fasint sisteme cun chei altris museus e istituzions di art de regjon.
Informazions al numar 040.413634.
Erika Adami

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +