Sfuei Mensîl Furlan Indipendent
Archivi de Patrie

I CLASSICS. 18 – CUINTRISTORIE DAL FRIÛL La albe de nestre Patrie

............

Il Friûl si dismôf
Nol è di pensâ che il Friûl al sedi stât dal dut indurmidît su la sô sorte dal 1420 in dì di vuê.
Al è simpri stât cualchidun de bande de puare int, predi o studiât, parfin siôr e ancje sorestant, che al veve capide la solfe, ma nol jere rivât adore di fâ grum e movi la int, in gjenerâl rassegnade a restâ furlane, ma ancje sotane. Cuant che i students furlans dal 1965, par vê la universitât furlane, a puartarin ator cartelons che a disevin: «Sveaitsi furlans», a metevin il dêt su la gruse. Si pues cjapâ chel an tant che l’an dal prin dismovisi dal Friûl. La situazion e jere cheste.
Dal 1964, par interès de politiche taliane che i disevin « centro-sinistra», e jere nassude la regjon speciâl Friûl-Vignesie Julie.
E jere tant speciâl che a vevin stabilît a Rome che Triest e veve di jessi la capitâl e i vevin strenzudis lis jentradis une vore di plui che no a dutis chês altris regjons speciâls sicu la Valdoste o il Trentin Südtirol.
I politics triestins e furlans (di nassite) che a àn dât dongje il statût de gnove regjon, a vevin smirât di cûr a slargjâ la braide par Triest, insotanint il Friûl.
Si veve ancje proponût di fâ valê dopli i vôts dai triestins tai rivuarts di chei dai furlans.
No je lade cussì, parcè che il Friûl al dave segns di dismovisi.
A vevin, tai plans che no si scrivin, ancje chê di parâ a tocs aministrativamentri il Friûl:
– cul plantâ la provincie di Pordenon;
– cul zontâ Çarvignan e la Basse cu la provincie di Gurize, par cjapâ dentri Monfalcon in chê di Triest.
Pe lôr belance si tratave di ecuilibri de gnove regjon. Fint in dì di vuê no ur è lade drete, par vie che il Friûl nol jere plui dal dut inçussît.
«Patrie dal Friûl» e cetancj scritôrs par furlan a çocavin i furlans, invidantju a viodi ce che a jerin e ce che a podevin deventâ.
Te prime ete la gnove regjon e tentâ di ingrumâ dut a Triest, puartant vie ai furlans dut ce che e podeve, cirint di fâ crodi che il bon al sarès vignût daspò: miôr al stave Triest, miôr al varès stât il Friûl doman.
Che al è chel di simpri; miôr al sta il paron e miôr al starà il famei. Ma no leve!
Dal 1965 e nassè la storie di vê la facoltât di Midisine tal ospedâl di Udin, par altri ben tressât.
I students i derin dentri: la politiche, cui gjornâi e la cuesture, e cirì di frenâju. Si è dismot un cantin che nol veve di padinâsi plui.
In chel gredei, par che la opare no si smamìs, al nassè ancje il « Moviment Friûl» pe difese dal popul furlan (1).
I partîts di çampe, di diestre e di mieç si insuririn, ancje par vie che dal 1967, il mês di Novembar, e saltà fûr une «Mozion dai predis» cun 529 firmis che e diseve il so dret a la politiche: su la universitât furlane, lis servitûts militârs, la migrazion, i puescj di lavôr, i contadins, la lenghe e la culture furlane. Al fo doprât ancje il vescul par taponâ la cite.
Ma ancje cheste volte al è stât dut dibant.
Cualchidun di sintiment al à ancje dit ai politics di capî i furlans, ma lôr a varessin vût di ameti di vê sbaliade politiche, e che i predis furlans a vevin il dirit di pensâ cul lôr cjâf a pro de lôr int.
Intant, tes elezions regjonâls dal 1968, il Moviment Friûl al vincè 3 conseîrs e cussì pe prime volte si fevelà di etnie e di minorance furlane tal consei regjonâl (2).
Cualchi conseîr furlan nol capive ce che al voleve dî etnie, par vie che no van indenant simpri chei che a àn cjâf, ma par solit chei che no ‘nd àn, al dîs un proverbi furlan. Cun tancj migrants furlans che a jerin, al jere nassût ancje un «Ente», che lu clamarin par talian «Friuli nel mondo».
Cun tant cûr e tantis buinis peraulis, simpri tal zei de mari Italie, al clucì i nestri emigrants, ma ce che al diseve e al faseve nol jere vonde.
Ancje i migrants, massime chei de Svuizare, si jerin dismots e a pratindevin une gnove politiche par no «scugnî lâ» pal mont, e par scomençâ a tornâ in Friûl.
E fo fate a Udin dal 1970 une conference de migrazion, plui par padinâ che altri, ma la micje si jere impiade e no si rivà a distudâle.
Ancje la glesie si è dismote in non dal Friûl.
Dal 1970, l’an che al à viodude la prime stampe dal Messâl Furlan pal an A, lis messis par furlan a son ladis cressint: pe int che e crôt, la messe te lenghe furlane e je stade cetant biele e devote. La burocrazie gleseastiche di Rome e à tentât di fermâ o almancul di frenâ la robe.
I politics (cristians?) di chenti a àn cirût di caparâsi (cuintri) cualchi predi in non da la Italie e dai jutoris dal guvier di Triest e di Rome. Ingraziant Idiu ancje chi nuie ce fâ!
Al è mo vêr, che tantis marutis in Friûl a àn cirût di tirâ sù par talian i lôr fruts, par vie che a crodin che a valin mancul se a son tirâts sù par furlan.
Chês biadis feminis a fasin paiâ ai lôr fruts il sotanisim de pedagogjie di putrops mestris di scuele, che si son dismenteâts che il nazionalisim patriotic nol è une buine dutrine par tirâ sù fruts e che no lein, lafè no! cualchi bon libri di vuê sul cont de lenghe dai gjenitôrs e dai fruts. Ma ingraziant Idiu i furlans ogni tic studiâts a stan gambiant strade: al è un onôr che i fîs a fevelin par furlan o almancul a son sigûrs che al è miôr che il frut al feveli dôs lenghis e no dome une.
Il Friûl, se nol è dismot, si dismôf.
pre Josef Marchet e pre Checo Placerean

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +