I bêçs a son simpri par chei altris

I 15 musiciscj de orchestre sinfoniche dal F-vg, une realtât nassude a Udin, no saran cjolts a vore a timp indeterminât de Regjon. «Nol è pussibil garantî il lavôr»- al à dite l’assessôr triestin Torrenti. Il cuindicinâl in lenghe furlane “Il Diari” di Mauro Tosoni nol sarà plui publicât parcè che a son finîts i finanziaments.
In sumis la conclusion e je simpri compagne: no son bêçs.
Strani, viodût che e je le stesse zonte dai milions regalâts al Verdi di Triest. Ancjemò e simpri Torrenti: «La Regjon e podarès impegnâsi, in colaborazion cul Ministeri de Istruzion, par ufrî il studi de lenghe slovene ancje tes scuelis a lenghe di insegnament taliane». Cui paial, viodût che pal furlan a scuele i bêçs no son?
Par restâ tal forest. Su propueste di Torrenti, al Program dai intervents de Universitât  Popolâr di Triest, pe conservazion e il disvilup dal patrimoni culturâl e linguistic des Comunitâts dai Talians in Slovenie e Cravuazie, a son lâts 800mil euros.
Pardabon al somearès che, se si vûl, i bêçs si cjatin, ma dome par chei altris. Pai imprescj che in cualchi maniere “a pucin” di furlan, lis cassis a son sieradis a dople mandade. ❚
L’om di Buri