I APONTAMENTS

Tal prin apontament di vinars ai 21 di Jugn, aes 5 dopomisdì, al Museu etnografic, in ocasion de Fieste de musiche, si podarà cognossi la storie e lis tradizions dal popul furlan traviers dal art dai suns, in rituâi, fiestis, vite cuotidiane, e amirâ struments come lis craçulis, i sivilots, lis armonichis, ma ancje un rarissim strument dal 1563 di Domenico da Pesaro, une bunkule, une pianole mecaniche e diviersis rapresentazions di senis musicâls sui mobii e tai afrescs di Palaç Giacomelli. In chê ocasion, dilunc la visite, l’armonicist Manuel D’Orlando al sunarà musichis de tradizion furlane.
Domenie ai 30 di Jugn, aes 11 di matine, “Syntagma” e rive a Cjase Cavazzini par presentâ lis oparis leadis ae musiche des colezions Marangoni, Astaldi e Friam, ven a stâi dal comitât italo-american “Friul Arts and Monuments” nassût dopo dal taramot. Oparis dal Vot e Nûfcent, tra lavôrs a teme musicâl dai fradis Basaldella, Candido Grassi, Giacomo Mantegazza, Dino Severini e altris, par une visite che sarà compagnade des esecuzions musicâls de clarinetiste Sara Papinutti.
Sabide ai 6 di Lui, aes 11 di matine, la visite e je tai Museus dal Cjistiel di Udin, tra grancj lavôrs di Domenico da Tolmezzo, Palma il Giovane, Antonio Carneo, Giambattista e Giandomenico Tiepolo, de art antighe al Risorziment, cun spiegazions compagnadis dal ghitaris Pierluigi Clemente cun musichis a teme.
Domenie ai 14 di Lui, aes 11 di matine, si torne al Museu etnografic par cognossi la musiche antighe in Friûl, cu la visite vuidade e il clavicembalist Marius Bartoccini che al sunarà su une spinete rare, copie di un origjinâl dal 1571 realizade di Paolo Zerbinati.
Domenie ai 21 di Lui, simpri aes 11 di matine, i suns de citât traviers de art figurative si mostrin indaûr tai Museus dal Cjistiel, cul duet Fabio Accurso al liût e Alessandra Cossi ae vôs.
Ultime date, domenie ai 28 di Lui, aes 5 dopomisdì, par une visite tal Museu de Catedrâl di S. Marie Anunziade di Udin e tal Oratori de Puritât, tra oparis di Tiepolo, Maffeo Verona, Louis Dorigny, Giuseppe Torretti e altris, cun esecuzions organistichis in ocasion dai 250 agns de muart dal organâr Pietro Nachini, che tra l’altri al à realizât propit te Catedrâl il so centesim orghin, cumò in vie di restaur tal insiemi di tantis iniziativis leadis a cheste personalitât.
Par partecipâ aes iniziativis (al è puest par no plui di 30 visitadôrs) bisugne prenotâsi telefonant al numar 0432/1272591 (di martars a domenie, des 10 di matine aes 6 sore sere). Par prenotâ la visite dai 28 di Lui si à di scrivi a: syntagmaudine@gmail.com
Ducj i inzornaments su la pagjine Facebook “Syntagma – itinerari d’arte musicale”. ❚
A.S.