Sfuei Mensîl Furlan Indipendent
Archivi de Patrie

Gurize, struc de Europe come che e varès di jessi

Agnul Floramo
PLACE DE VITORIE E IL PIÇUL CIMITIERI EBRAIC DI VAL DI ROSE, ROŠNA DOLINA

La citât dulà cerçâ il spirt profont di une Miteleurope
che e je inricjide ancje de identitât furlane

La Contee. Cjamps, orts, vignâi. Culinis che bielzà ti contin di un “altrò” stranît. E il so cûr. Une citât che inte sô storie e à simpri respirât a plen plui di une anime. Anzit, la sô bielece estraniante e je propit poiade su la intersezion, il miscliç, l’incuintri. Lu dimostrin i siei cuatri nons: Gurize par furlan, Görz par todesc, Gorica par sloven. E biele ultime – magari cussì no! – Gorizia par talian. Ti baste jentrâ sot dal tet dal marcjât cuviert, che purtrop al sta murint, scjafoiât dai discounts de globalizazion, par sintî i acents di une piçule Babêl, a seconde dal bancon là che tu vadis a cjoli alc. Di fat, ancje il percors par lâ a comprâ il pan, o lis patatis, i pomodoros o adiriture il pes, al dissegne chê topografie complicade che di chestis bandis si fâs struc di une Europe come che e varès di jessi e che purtrop e stente, o ben chê dai popui braurôs di autodeterminâsi tacant propit de lôr lenghe: lidric, rati, pivo, riba, formadi. Tu cjaminis sot dal cjistiel (une invenzion architetoniche studiade par propagande, un fals storic macroscopic, cun tant di leon di Sant Marc sul so porton!) e ti pâr di jessi a Lubiane, o a Cracovie, a Zagabrie o fintremai a Lublin. Dilunc di chê vie che si clame “Rastello” – parcè che fin dai timps de Ete di Mieç e rapresentave il “rastrellum”, il ristiel che al divideve la campagne de prime cinturie di cjasis sot dai muralons – la Storie e somee inçopedâsi su lis targhis des buteghis, pituradis plui di cent agns indaûr, o sul polvar che si poie pardut, scurint i veris, come se il so lâ si fasès plui lent su lis pieris scuintiadis che a ripetin il to pas. Di gnot, cui ferâi dai lampions che a sossedin une lûs zale e flape, la magjie e je ancjemò plui fuarte, e par cualchi moment ti pararès di jessi tornât tai timps di Franz Josef, che al jere sigûr di jessi il prin servidôr di dute chê sdrume di int che secont lui la sô corone e rapresentave, de Galizie fin in Dalmazie passant par Gurize. Il gnûf cors screât dai Savoia, dal 1916 inlà, batiât cul grant maçalizi che cualchidun si ustine ancjemò a clamâ “Grande Vuere”, al varès dimostrât che no simpri il cambiament al è a bon pro. Di sigûr chi, come prime azion politiche al à scancelât trê lenghis. Un clâr esempli di “logocidi”, e perdonaitmi il neologjisim. E chei che a copin une lenghe, prime o dopo, a savaran copâ ancje un popul. Come che a varessin dimostrât di savê fâ tal zîr di pôc. Chi no esist la “movida” che e snature chê altre grande citât dal Imperi, Triest. Chi no rivin lis nâfs di crociere ogni sabide di Istât, a spudâ fûr une umanitât vuede e volgâr, che e torzeone come un trop di pioris cence sintiment cirint un “pub”, un “lounge bar”, un puest che al prepari “street food”. A une cierte ore no zire anime vive. E mi vignarès di dî “mancumâl”, ancje se plui di cualchi economist mi tirarès une sclopetade tal cûl dome par vêlu pensât. Ma in chel cidinôr, par chei che a àn la dimension juste de anime, si rivin ancjemò a intercetâ lis fantasimis di une Storie che je ancje part de nestre identitât furlane. Par cerçâ il spirt profont di une Mitteleurope finalmentri libare dal “brend” inventât par fâ casse inte buteghe che e space prodots cu la marche FVG, bisugne pierdisi intes straducis che di chi a cirin il slarc de Stazion de Ferovie Transalpine, là che ancje vuê i trens a partissin dilunc di liniis che a puartin lontan. Tal spazi e tal timp. Cheste citât, inte storie plui resinte dal secul passât, il ‘900, e à vût il stes profîl di Berlin, subit dopo de Seconde Vuere Mondiâl. Dividude in doi di un mûr che al tacave di lontan, ven a stâi di Danziche in Polonie, e che par fortune cumò nol esist plui se no a tocs, deventâts monuments de Memorie, e je indicade tant che un dai simbui di chê Vuere Frede che inte sô crudece – colpe lis divisions politichis e ancje economichis e culturâls – no à mai rivât a scancelâ chê pluralitât di culturis, identitâts e lenghis che si diseve, e che chi a cjatin lidrîs profondis in miârs di agns. Su chê place, la linie di confin e je cumò dome un segnâl sul paviment. Si pues scjavaçâ cence pôre. Anzit, tu puedis restâ cuntun pît di une bande e cuntun di chê altre, come par pissâ su la stupiditât dai umans, a dimostrazion dal fat che l’Umanisim ae fin al vinç simpri su la mostruositât dal Statalisim, justificât dal scjas che e fâs la ideologjie. Ancje par chest, il 2025 al celebrarà Gurize tant che “Capitâl Europeane de Culture”, insiemi cu la sô zimule slovene, Nova Gorica. Segnâl che finalmentri i timps a son cambiâts, tant che la citât e podarès mudâsi di feride crudêl, come che e je stade, in esempli virtuôs, paradigmatic di dutis lis voltis che la Storie e à smorseât popui che invezit, di simpri, a àn savût condividi il lôr destin di fradis. Un esempli maraveôs di cheste prospetive si lu cjate subit dopo dal vecjo passaç che al à il non di “Cjase Rosse”: o feveli dal piçul cimitieri ebraic di Val di Rose, Rošna Dolina. Il so non antîc al è “Beth ha Hayyim”, ven a stâi “La cjase dai vivents”. Scjafoiât di un orent sorepàs di asfalt e di ciment, vie pal dì lu sdrume la confusion dal trafic e vie pe gnot lu incein i “neons” di un dai plui grancj supermarcjâts di Europe. Bisugne cirîlu, sgarfâlu fûr e salvâlu di chê indiference che nus fâs vivi simpri di corse, cence nancje mai pensâ dulà che o stin movint il pas. Une volte dentri, tu âs la impression di jessi stât sparagnât di dute cheste frenesie. Ogni lapide, orientade a cirî Jerusalem, e conte une storie che e ven di lontan. La sô vôs e je fate di piere, e pûr tu sintis la fuarce dal sanc e de cjar che si impastin insiemi in chê intersezion curiose che i umans si ustinin a clamâ “vite”. Sot de jerbe e dai claps e polse une des tantis lidrîs di chest nestri jessi furlans, che purtrop dispès e ven dismenteade: chê ebraiche. Une componente che e fâs part di simpri de nestre tiere furlane: adiriture de lidrîs plui antighe e profonde, chê Alessandrine, peade a dute chê simbologjie sacrâl, cosmogoniche, potente, che e sflorìs di Acuilee e che si trasforme in art, bielece, cjant, paisaç. Par gjoldi ad implen il sens dal nestri itinerari, il consei – par chei che a varessin voie di provâlu – al è di lassâ che il pas al scjampi libar a cirî il spirt de frontiere ancje jenfri i borcs plui piçui, là che il pan al à un savôr diferent, il vin une anime gjenerose. Gabrie Disore, par esempli. Di li al partìs un percors clamât “Abramo Schmid”, che al va daûr dal confin che al separe de Slovenie il teritori furlan. Chi sì che tu lu sintis, l’ôr. E jere la famose “Linie Morgan”, là che i soldâts angloamericans a podevin movisi cence pôre di sconfinâ in Jugoslavie. Cumò al è stât trasformât intun percors di pas. Il troi al puarte fin insom dal Kremenjak (235 m). Di là si pues gjoldi un struc perfet dal Friûl: a Nord lis Alps, a soreli jevât il Cjars, a Sud l’Adriatic. Tal mieç, jenfri chê strente, dut il rest. Ven a stâi la nestre Patrie. ❚

Stin dongje ae Patrie

Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +