Sfuei Mensîl Furlan Indipendent
Archivi de Patrie

GRIGNEI DI STORIE. Sul “fîl” de storie

............

“Mor” inte lenghe celtiche al vûl dî “neri”. Par vie des moris che, cuant che a son maduris, a àn chel colôr alì. I latins, par distinguilis di chês dai baraçs, lis clamarin “morus celsa”, ven a stâi “altis”. Chi di nô si è mantignude inte lenghe la lidrîs celtiche, cussì pai talians la plante e je il “gelso”, dal latin “celsus”, e par nô invezit il “morâr”. In cuintritindince. Anzit, tante la impuartance di chest len, che il so non al è deventât il mût par indicâ ducj chei altris. Come la rose pes rosis. E in efiets, il morâr in Friûl al rapresente alc di plui che no un len e une frascje. Al è un simbul, un toc di anime, une sclese di memorie plantade in profonditât come lis sôs lidrîs te tiere.
LA CUISTION DES GALETIS_ Dome tal 1740 i contadins de Patrie a àn otignût il permès de Dominante di podê plantâju sui confins dai cjamps. Un permès sudât, scombatût, pratindût e a la fin vinçût a la arogance di une Siore avonde ludre che e veve pôre di une concorince te produzion de sede, massime intune contrade di cuintribandîrs e cramârs come la nestre, masse dongje dai confins imperiâi par no fâ pensâ a plui di cualchidun che i trois par Viene o par Lubiane a jerin plui salutârs di chei che a menavin su la Lagune. Si capìs, lis galetis a fasevin gole! Ma pai contadins furlans a àn rapresentât par secui une forme di resistence, la uniche integrazion pussibile ae miserie di ogni dì. Massime tal periodi dal an cuant che l’Invier al jere a pene finît e la stagjon agricule no jere ancjemò scomençade. Si tacave a comprâ un vignarûl di ûfs di pavee fra Sant Zorç, ven a stâi ai 23 di Avrîl, e Sant Marc, ai 25. Il cicli si sarès sierât dome a Sant Zuan, ai 24 di Jugn, date solstiziâl, cuant che la galete, dopo jessi stade sbroventade, e podeve jessi vendude al cramâr di passaç, fate salve cualchi pavee sparagnade de aghe bolint par vê une riserve di ûfs bogns pal an daspò. Trê Sants dai cavalîrs duncje, e trê datis impuartantonis tal calendari rituâl de nestre int.
LA TRADIZION PAGANE E CHÊ CRISTIANE_ Datis impastadis di sapience antighe, di fiestis paganis ancestrâls messedadis cu la culture cristiane, a opare de sapience dimostrade di simpri de Glesie di Aquilee; che in cualchi maniere a jentrin tal zûc di simbui e di tradizions e che a mertaressin di jessi studiadis fin te lôr lontane lidrîs, là che fede, lavôr e tradizions a formin chel istès glimuç che al fâs la trame de Storie. Di une once di semence (ven a stâi cirche trente grams) si podevin produsi fin a 75,80 chilos di galete. E o fevelìn di une sole once. Par fâle scludi, la semence, si le meteve sot dal materàs di sclofe, tal cliput, magari doprant il jet dai vecjos, che a podevin durmî un alc di plui e duncje ur regalavin ai ûfs cualchi moment di cjalt in plui. E vuai a fâ il jet, intant, par no disturbâ la cove. Chei cavalîrs a varessin mangjât plui di 1.000 chilos di fuee in 40 dîs di vite. E chest, dome par dâ la idee de grande impuartance de produzion tal vivi cuotidian, tal paisaç agrari, tal imagjinari coletîf dai nestris vons. E cul vuadagn di chê once, si podeve rivâ a paiâ l’afit dal cjamp, o un pâr di scarpis gnovis al nuviç, o un bon gustâ par dute la famee, la dì des gnocis: il gustâ dai cavalîrs. Bisugnarà spietâ i studis agronomics di Antoni Zanon, te seconde metât dal ‘700, e po dopo tal ‘800 il contribût adiriture di Louis Pasteur, che al fo ospit de filande Kechler di Sant Martin di Codroip, se tante potenzialitât e podarà restâ jenfri i confins dal Friûl, cence jessi dispierdude sot la sgrife dal Leon di Sant Marc.
LA INDUSTRIE DE SEDE IN FRIÛL_ Une potenzialitât ben valorizade de Austrie (in clâf anti Vignesie) dal 1797 fintrimai al 1866, cuant che ancje i cavalîrs di bigate – compagn di ducj chei altris nobii furlans lôr coparis, che a fossin conts o marchês – a saran fats talians, puartant un grant contribût ae economie dai regnicui piemontês, ancje se i libris di storie a àn un biel fevelâ dome des modernizazions voludis dal Cont di Cavour, chel Camillo Benso tant nomenât ancje pal disvilup de industrie dal filât. Fra ‘800 e ‘900 a forin principalmentri lis feminis, ancje in Friûl, a lavorâ in filande. Zovinis e fantatis, massimementri. La lôr epopee e je stade cjantade par prin di Elio Bertolini come di nissun altri mai, seguît in maniere magjistrâl di Pauli Patui. Bisugnarès pensâ ai lôr sacrificis, ae lôr fadie, cuant che si emozionìn devant des cjalcis di sede fine che a cjarecin sensualmentri lis gjambis des feminis di Gustav Klimt, o a la vieste di cjamare lizere di Eleonora Duse, la femine dal Vate dai talians. Probabilmentri, daûr di ogni svolaç la firme e pues sei chê di une frute furlane che no varès mai podût permetisi di rasintâ chê sede se no te aghe bolint di une filande. ■
ANGELO FLORAMO
_____________________________________

La fortune vignude de Cine

Lis cronachis nus contin che a orient de Cine, un popul misteriôs, i Seris (al è di lôr che al ven fûr il non de sede) par prins a rivarin a gjavâ fûr de bave dai cavalîrs il fîl preziôs di destinâ ae tiessidure. Si presum plui di trê mil agns fa. E par secui i imperadôrs cinês a àn tignude scuindude gjelosementri cheste art antighe. Puartâ ûfs de pavee de sede fûr dai confins imperiâi e jere une azion che si paiave cu la muart. Dome tal 582 de ete cristiane, doi muinis de glesie orientâl a donarin al imperadôr Justinian il Bizantin chei grignei. Di li, a forin sparniçâts par dut il Mediterani, massime dai Araps, e daspò – cul jutori dai Normans di Rugjêr II prime, e po dopo dal imperadôr di Gjermanie Fidrì II –, a rivarin fin dongje lis Alps. Ca sù di nô, a son rivâts tor dal 1300, jentrant te vite dai piçui borcs e dai paîs in maniere capilâr, stant che a rapresentavin, massime pai contadins, une forme di economie impuartantone par rivâ a tirâ sù cualchi carantan. A scomençâ dal 1420, cu la invasion de Patrie, Vignesie e fo buine di sfrutâ ancje cheste man di opare furlane a pro de sô protoindustrie, principalmentri concentrade inte regjon lombarde. Lavôr furlan pai opificis comacins, come i rôi de Cjargne pai cantîrs di Sant Marc. Le vin studiade ducj po la storie di Renzo e di Lucia e di ce che al sucedeve su chel ram dal lât di Como, no mo? Ma sal vignìs fûr che come Lucine Savorgnan e Luîs Da Porto, i vêrs Giulietta e Romeo, ancje i nuviçs imprometûts di Alessandro Manzoni a son in veretât une storie di filande dute furlane, e che al puest di un bulo spagnûl la part dal trist chi di nô le varès fate un paron talianot, plui atent ae biele musute di une bigate furlane che no ai siei cavalîrs, saressial alc di maraveâsi? “Chel ram dal lât di Ruvigne…”, al podarès jessi il principi. Ma ancje cheste e je dute une altre cuintristorie, che cualchidun al savarà contâle, une dì sperin no masse lontane. ■
ANGELO FLORAMO

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +