Sfuei Mensîl Furlan Indipendent
Archivi de Patrie

GRIGNEI DI STORIE. La nassite dal nestri Stât

............

“Tam pro papa quam pro rege bibunt omnes sine lege”, ven a stâi “a ti bevin cence misure pal Pape e pal Imperadôr”. Cussì a cjantavin i students de Ete di Mieç – magari ancje chei de Universitât di Cividât volude dal Patriarcje Bertrant – cuant che a jerin te ostarie e a gjoldevin dal savôr dal vin e de ligrie, visantsi ancje te baldorie goliardiche di chê creture mostruose che e separave i doi plui grancj podês dal mont: il Pastorâl di Rome e la Spade de Gjermanie. Cui jerial plui impuartant, il Pape che al consacrave l’Imperadôr o l’Imperadôr che al  protezeve il Pape? La origjin di cheste contraposizion, che i storics a clamin “lote pes investiduris”, e je une vore antighe. La lidrîs lontane si le cjate adiriture tal timp di Costantin il Grant, tal IV secul, là che l’Imperadôr, une volte ricognossude la legalitât de religjon cristiane, al pretint di controlâ la sô struture intune jerarchie che e viôt il popul dai fedêi vuidât te plêf di un plevan, ducj i plevans indreçâts dai vescui e ducj i vescui sogjets ai Patriarcjis o ai Metropolits che a vevin di rindi cont dome al Imperadôr. Cheste situazion e condure tai secui, tant che la dinastie dai Otons di Sassonie, tal secul IIX si svante adiriture di nomenâ i vescui jenfri il grup dai siei plui fedêi feudataris, provocant clarementri une crisi cul podê de Glesie di Rome. Al è stât propit un di lôr, Oton II, a capî pe prime volte la impuartance strategjiche di vê un vescul fedêl e amì dal Imperadôr di Gjermanie in Aquilee, ricognossude tant che sede antighissime e prestigjose, che cun Grau e varès podût presentâ un centri di control impuartant tal cûr de Europe, jenfri i popui latins, todescs e slâfs. Duncje, la prime grande donazion di cjistiei al patriarcje Rodoalt, siglade dal 983, e cite Udin, Feagne, Buie, Braitan (Braçà) e Sante Margarite dal Gruagn tant che podês sogjets in maniere direte al Patriarcje di Aquilee. E di li indenant, i Patriarcjis gjermanics di Aquilee a son stâts i prins a favorîle tal so sflandôr economic, politic, culturâl e religjôs. Tra ducj, al bastarès nomenâ chel Popon di Treffen che – tra lis altris robis – al à firmade ancje la risistemazion romaniche de Basiliche, fondant une des corts plui innomenadis in Europe par bielece, sapience e grandece.

Dissen di Gianni Di Lena
Dissen di Gianni Di Lena

INDRÌ IV E GREGORI_ Bielzà tal 1054, la Glesie romane e veve proponût une svolte cetant autoritarie, declarant che dome il Vescul di Rome al veve la autoritât su ducj chei altris patriarcjis e metropolits e che dome la autoritât di Rome e varès podût esprimisi in materie di Fede. Chest impontâsi centralistic al veve procurade la division cun Costantinopoli e la feride mai plui sanade che e varès dividude la Glesie Ocidentâl Romane di chê Orientâl Ortodosse, spacant in doi la Europe cristiane. Tal mieç, il Patriarcjât di Aquilee, che pe sô tradizion antighissime, la sô fondazion Marciane, la origjinalitât dal so credo (che dispès te storie al veve procuradis fraturis schismatichis di puartade enorme), al rapresentave alc di difarent rispiet ae autoritât di Rome, cjalant plui vulintîr – ancje par vocazion gjeografichee storiche – a Nord e a Est, là che si slungjave la sô diocesi enorme. La crisi plui fuarte e sclope però daspò dal 1076, cuant che imperadôr di Gjermanie al è Indrì IV, mentri che pape al è Gregori VII. Dôs personalitâts une vore difarentis: il princip zovin cuintri il pape vecjo. Il moment al è une vore delicât: lis citâts che a son daûr a formâsi inte aree Renane e in chê Padane a tachin a orientâsi politichementri. Tant il Pape cuant l’imperadôr a àn bisugne di bêçs, di aleâts, di une rêt di supuart ae lôr politiche. Ma se il Pape, di cualchi an, al è elet dai cardinâi e il so mandât al dure fin ae muart, l’Imperadôr al scuen rapuartâsi cu la invidie e la gole dai siei plui grancj princips che no spietin altre ocasion che di cjapâ il so puest. Cuant che Gregori al scomuniche Indrì, ducj a puedin sintîsi autorizâts a copâlu. Al à pierdude la sô sacralitât. Al scuen domandâ perdon, umiliantsi, fin denant dal Pape che – par mortificâlu – no lu spiete nancje a Rome ma a Canosse, sul Apenin. La strade de Gjermanie e devente cussì un calvari. Pericolose, vierte a ogni vuaite, esponude a ogni pericul. Al pues fidâsi dome di pôcs, e specialmentri di chei Vescui Princips che di secui a son plui fedêi ae Corone che al Pastorâl. E fra di lôr, al è ancje chel di Aquilee, ven a stâi Siart.
SIART_ No savìn cun precision la date de sô nassite, ni la sô cariere. Ma al jere fi dal Cont di Beilstein, in Renanie. La sûr, Friedgunde, e jere badesse dal convent di Sante Marie in Aquilee, chel volût dal Patriarcje Popon. Probabilmentri al veve studiât dirit, stant che l’Imperadôr Indrì IV lu veve volût dongje di se tant che Cancelîr, une cjarie cetant impuartante, une specie di Segretari di Stât. Nissune maravee duncje che, sistemade la crisi politiche a Rome, l’Imperadôr a Pavie, cul famôs diplome dai 3 di Avrîl dal 1077, lu nomene Duche dal Friûl e Princip cul titul di Marchês di Istrie e Margrâf di Carniole. Nol baste. L’Imperadôr al vûl passâ la Pasche in Aquilee, tant che segnâl di grande benvolence. Daspò, Siart al seguìs il comitât imperiâl fin a Ratisbone par difindi i dirits dal Imperadôr devant dai Princips Todescs e dal Cleri. Insome, une figure impuartantone te storie de Europe e pe nassite istituzionâl de Patrie dal Friûl. Al murarà a colp tal Avost di chel stes an, intant che al è ancjemò impegnât te sô mission diplomatiche. Al lassarà ai siei sucessôrs un Principât tra i plui impuartants de Ete di Mieç, destinât a jessi sovran, come che si sa, fin al 1420, cuant che il Leon di Vignesie, cul jutori di cualchi princip nostran, i darà une sgrifade che e coparà il Stât. Il Stât, ben si intint, no la Patrie, che e continuarà a vivi te sô identitât fin in dì di vuê. ■
Angelo Floramo

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +