Al è mancjât Eraldo Sgubin
Ai 5 di Zenâr, a 92 agns, al è mancjât il professôr Eraldo Sgubin, personalitât di riferiment pal mont de lenghe e de culture furlanis, par tancj agns vicepresident de Societât filologjiche furlane pal Friûl di soreli jevât. Grant il so impegn pe valorizazion dal teritori cormonês e de sô storie. Za insegnant e preside, al è stât atîf tal mont dal associazionisim par dute la vite (al à fondade la associazion Amîs da Mont Quarine, che al è stât ancje president).
Parochiis in Europe a Vençon
In ocasion dai “Incuintris di Vençon” di Glesie Furlane, domenie ai 18 di Fevrâr, par confrontâsi sul progjet diocesan des colaborazions pastorâls, pre Rizieri De Tina e pre Claudio Como, dal Cep – Colocui european des parochiis, a contaran ce che al sucêt tes parochiis in Europe. Apontament aes 3 e mieze dopomisdì te sale Patriarcje Bertrant a Vençon; prime, aes 3, Gjespui in Domo.
“Maman!” su Telefriuli
Fin al mês di Jugn, ducj i vinars aes 5 e trê cuarts dopomisdì, cun replichis il miercus e la domenie ae stesse ore, al larà in onde “Maman!”, il program televisîf dut par furlan dedicât ai frutins di trê a sîs agns, une coproduzion de Agjenzie Regjonâl pe Lenghe Furlane e di Telefriuli. Cun Daria Miani e Chiara Donada, che a intratignaran i fruts cun zûcs, contis e cjançons, Manuel Buttus/Siôr Timp e Tui e Tuie, doi tuiuts afetuôs, ma un pôc pastrocjons, che a animaran il spazi dai cartons animâts.
Libri in lenghe a “Geo”
Su la sene Rai un libri dut in lenghe. “Sul troi di Aquilee”, il diari di viaç scrit par furlan di Christian Romanini e publicât di Glesie Furlane, al è stât tra i protagoniscj de pontade di “Geo” su Rai3 dai 19 di Zenâr, dedicade al Cammino Celeste, che il libri di Romanini al conte il prin toc tra nature, culture e identitât.
