«O fasìn musiche messedant la nestre storie artistiche e culturâl, miscliçant lis lenghis»
Il pît al bat il timp, il cjâf al tache a movisi, lis gjambis a scomencin a balâ e la temperadure si alce. Il sudôr si messede ae bire che e svole, e la lenghe furlane e je rivade ancje a Viene.
A van ator in biciclete, vistint salopettes coloradis par sunâ al tramont dilunc dal Danubi, a fiestis di students e matrimonis, puartant ligrie, compagnie e calôr cun cjançons in furlan che a fevelin di cusine e mangjâ cul lôr stîl up-tempo rock’n’roll. A son “i Radiatori”.
La lôr storie e scomence tal 2014. Ulisse Viezzoli, fi di art e plui zovin vincidôr dal Premi Friûl cul so grup grup punk blues tindint al psichedelic “Ulisse e i Ciclopi”, al è juste rivât a Viene. Dominik Heizmann, vienês di nassite, al fâs za zirâ i cjâfs e saltâ il public ai concierts cun diviersis grups locâi e cun braùre al sune il liron, lis percussions classichis, il tambûr e la marimba.
I doi zovins si cjatin intal “Türkenwirt”, un spazi creât dai students par mangjâ insiemi e par scoltâ musiche, e dal nuie a tachin a discori su cemût che si fâs la plui buine paste pe pize.
Cussì, di chel incuintri e de passion pe musiche, a nassin “i Radiatori”. A scomencin la cariere insiemi a altris doi amîs sunant covers rock’n’roll. Cul invecjâ e la necessitât di cjatâ lavôr, i cuatri dai “i Radiatori” a son restâts doi: Uli e Dom, che deventâts grancj amîs e coincuilins, si divertissin a sunâ e cusinâ insiemi, e dopo svariadis aventuris, tal Març dal 2017 a tornin a jessi atîfs cun gnûfs tocs plens di entusiasim, e a messedin dutis lis ispirazions dal rock internazionâl, poliglot, dai agns 60 fin vuê.
«O sin un grup “fai-da-te” – al conte Viezzoli -. Si preparìn dut di bessôi e o continuìn a sperimentâ cu la musiche, messedant la nestre storie artistiche e culturâl, miscliçant lis lenghis e fasint in mût che ognidun al interpreti la musiche in maniere libare. No coventin masse robis. Nus baste la musiche, la int e a son lis personis che a fasin il puest».
Cuntun spirt gnûf, e indipendents di machinis e di amplificadôrs, “i Radiatori” si son inventâts un mini complet pe batarie che si sune impins, e vie in biciclete a sunin ator par dute Viene a puartâ calôr e ligrie. «”i Radiatori” al vûl dî vivi la vite in mût spontani, onest, in amicizie e cun interazion umane, cence nissune bariere culturâl, e ancje jessi un pelut anticonformiscj».
Il lôr repertori al conte 10 tocs. Cjançons plenis di ritmi e melodiis complessis che a son part di un compromès tra i doi artiscj: Dom al è chel che al fâs i rangjaments des cjançons e Uli al met dongje peraulis “cence sens”. Tra i titui plui cognossûts a vin “Hombre Suburbano”, “Charlie fûr dal Barcon”, “Vonde”, “Reihe um Reihe” e “Ora de Publicitât”, prin toc dal 2018, an che ju puartarà fin in Irlande a sunâ par fiestis e matrimonis. No dismentein però il Friûl: come ogni an, ju cjatarìn ae Fieste de Vierte a Cormons, a Friuli Doc, al Pignarûl di Flumisel, su Radio Onde Furlane e in tancj altris lûcs. Te pagjine Facebook e sul canâl Youtube di “i Radiatori” o cjatais i videos di chest doi ardôs che si fasin clamâ “il scuadron speciâl dal rock’n’roll di ostarie plui veloç che al sedi”: “uptempo-Beisl-rock’n’roll Sondereinsatzkommando”.
di Moira Pezzetta
