Gnove leç pe Rai: nuie furlan in television

“O fasaRai”, “mai dî Rai”, “ti malediRai”… O sin aromai stufs di cjatâ zûcs di peraulis par descrivi la solite situazion: a dispiet di leçs e di principis costituzionâi, ancjemò une volte la television di Stât, che e je stade fate di pôc une leç gnove che le regule, no previodarà trasmissions in lenghe furlane.
Ce isal sucedût?
Vinars ai 31 di Lui, il Senât al veve fat bon il dissen di leç dal Guvier in cont de riforme de Rai e dal servizi radiotelevisîf public, lassant fûr il furlan, il sart e chês altris minorancis autoctonis di Italie e previodint trasmissions dome pes minorancis “nazionâls”, vâl a dî chês che a àn un Paîs forest daûr. Si à dismenteât cussì la esistence de Leç 482/1999, i impegns internazionâi cjapâts pe protezion des minorancis nazionâls, e il principi di fonde dal ordenament talian, che al vâl compagn par dutis lis comunitâts.
E cussì, ai 21 di Otubar la leç e je rivade ae Cjamare: lait a leisi La Patrie dal Friûl di Setembar cun dutis lis declarazions dai politics di chenti, che a imprometevin di meti man ae cuistion. Il risultât? Un emendament presentât de onorevule Gianna Malisani ritirât in Comission e un emendament presentât dal onorevul Gian Luigi Gigli ritirât in aule. Dut chel che si à otignût al è stât la aprovazion di un gjeneric ordin dal dì li che il Guvier si impegne a viodi de cuistion tal decret atuatîf de leç. O fasaRai, o viodaRai… Lis solitis peraulis, insume.
Par justificâ la situazion, cualchidun al à fevelât di distinzion – cence nissune fonde juridiche – tra “minorancis nazionâls” (francês, sloven, todesc) e lis “minorancis linguistichis talianis” (furlan, sart e v.i.). Pecjât che ancje chest “principi” falât al sedi subit discognossût de stesse leç aprovade, cuntune coerence dute ae taliane vie: i ladins dal Trentin-Sud Tirôl le tutele le varan, lôr che a van a sburt di chê regjon, pardabon autonome. Al solit, in Italie i dirits a valin par cualchidun sì e par cualchidun no, a seconde dal santul che tu âs (nissune polemiche sui ladins, si intint: bon par lôr).
O fasìn buine ancje nô la conclusion amare dal president de Assemblee de Comunitât Linguistiche Furlane Diego Navarria: «Cumò nol reste altri che ricori ae Cort Costituzionâl.» ❚
Redazion